کراچی: اینٹی کرپشن ایسٹ زون نے سندھ بلڈنگ کنٹرول اتھارٹی کے دفتر پر چھاپہ مار کر ریکارڈ تحویل میں لے لیا۔
تفصیلات کے مطابق اینٹی کرپشن ٹیم نے اسسٹنٹ ڈائریکٹر طارق بگٹی کی سربراہی میں سندھ بلڈںگ کنٹرول کے دفتر پر چھاپہ مارا، ایس بی سی اے حکام نے اینٹی کرپشن ٹیم کو ریکارڈ دینے میں تاخیری حربے استعمال کیے۔
ذرائع کا کہنا ہے کہ اینٹی کرپشن ٹیم کو تاخیر کے بعد اندر آنے کی اجازت دی گئی، اینٹی کرپشن حکام کا کہنا ہے کہ رکاوٹ ڈالنے والوں کے خلاف کارروائی کی جائے گی۔
سندھ بلڈنگ کنٹرول اتھارٹی کے دفتر سے ریکارڈ حاصل کرنے کے بعد اینٹی کرپشن ٹیم روانہ ہوگئی۔
مزید پڑھیں: سندھ بلڈنگ کنٹرول اتھارٹی میں کرپشن کی تحقیقات کا آغاز، نیب نے سربراہ کو طلب کرلیا
واضح رہے کہ گزشتہ سال ستمبر میں نیب نے سندھ بلڈنگ کںٹرول اتھارٹی میں ریکارڈ کرپشن سے متعلق تحقیقات کا آغاز کیا تھا، نیب نے ڈی جی ایس بی سی اے کو بھی طلب کیا تھا۔
قومی احتساب بیورو نے ڈی جی ایس بی سی اے کو7ٹاؤن اور حیدرآباد ریجن کا ریکارڈ پیش کرنے کا حکم دیتے ہوئے طلب کیا تھا۔
نیب نے غیرقانونی شادی ہالز، رفاہی پلاٹوں پر تعمیرات کی اجازت دینے پر رپورٹ طلب کی تھی، اس کے علاوہ سال2011اور2012میں دی جانے والی ایمنسٹی اسکیم کی تفصیلات بھی طلب کی گئیں تھیں۔
نیب نے جمشیدٹاؤن، گلبرگ، لیاقت آباد، صدرٹاؤن، نارتھ ناظم آباد ٹاؤن اور اورنگی ٹاون کی بھی تفصیلات طلب کی ہیں، اور ان ٹاؤنز میں تعینات افسران کی فہرست بھی طلب کی تھی، عمارتوں کی فہرست اور تعمیرات مکمل ہونے کاسرٹیفکیٹ اور لےآؤٹ پلان بھی مانگا گیا تھا۔