ملتان : سرکاری زمین پر قائم غیر قانونی نرسریوں کے خلاف آپریشن کیا گیا جس میں بیس کروڑ روپے مالیت کی سرکاری زمین قبضہ مافیا سے واگزار کرالی گئی۔
تفصیلات کے مطابق وزیرِاعلیٰ پنجاب سردار عثمان بزدار کی ہدایات پر پورے صوبے میں قبضہ مافیا اور تجاوزات کے خلاف آپریشن کا سلسلہ جاری ہے، ملتان میں ضلعی انتظامیہ نے ممتاز آباد، دہلی گیٹ، عید گاہ چوک اور خونی برج میں گرینڈ آپریشن کیا۔
کارروائی کے موقع پر اے سی سٹی اور ایم ڈی اے کے ڈپٹی ڈائریکٹر اسٹیٹ کے ہمراہ پولیس کی بھاری نفری بھی موجود تھی، کئی تجاوزات گرا کر ریڑھیاں بھی تحویل میں لے لی گئیں۔
تجاوزات کیخلاف آپریشن پر جائے وقوعہ پر موجود تاجروں نے احتجاج بھی کیا۔ اینٹی انکروچمنٹ ٹاسک فورس نے عید گاہ چوک کے قریب کارروائی کرتے ہوئے بیس کروڑ روپے مالیت کی پچاس مرلہ کمرشل اراضی واگزار کرالی۔
قبضہ مافیا نے عرصہ دراز سے سرکاری زمین پر پودوں کی نرسری بنائی ہوئی تھی۔ ضلعی انتظامیہ کے مطابق تجاوزات کے خاتمے اور سرکاری اراضی واگزار کرانے کیلئے آپریشن جاری رہے گا۔
یاد رہے کہ وزیرِاعلیٰ پنجاب سردار عثمان بزدار نے انتظامیہ کو قبضہ مافیا کے خلاف آپریشن ایک ماہ میں مکمل کرنے کا ٹاسک دیا ہے، انہوں نے سختی سے ہدایات جاری کی ہیں کہ ہر صورت قبضہ مافیا کے خلاف آپریشن کو ایک ماہ میں مکمل کیا جائے۔
