کراچی: سندھ حکومت نے خواتین اور بچوں کے ساتھ جنسی زیادتی کے واقعات پر بڑا فیصلہ کرتے ہوئے صوبے بھر میں 27 اینٹی ریپ کرائسز سیل قائم کرنے کی منظوری دے دی۔
تفصیلات کے مطابق سندھ حکومت نے جنسی زیادتی کے خلاف مراکز قائم کرنے کی منظوری دے دی، اس سلسلے میں جاری نوٹیفکیشن میں کہا گیا ہے، پائلٹ پراجیکٹ کے طور پر پہلا سیل پولیس سرجن آفس کراچی میں قائم ہوگا۔
نوٹیفکیشن کے مطابق جنسی زیادتی کا شکار ہونے والے اینٹی ریپ سیل سے استفادہ کر سکیں گے، یہ سیل متاثرہ مردوں، خواتین، بچوں اور خواجہ سراؤں کی معاونت کرے گا۔
میڈیکولیگل ڈیپارٹمنٹ طرز پر اینٹی ریپ کرائسز سیل 24 گھنٹے فعال رہے گا، سیل متاثرین کو میڈیکولیگل سرٹیفکیٹ، ماہر نفسیات، اور قانونی خدمات فراہم کرے گا۔
نوٹیفکیشن میں کہا گیا ہے کہ حیدر آباد میں 2، سکھر، لاڑکانہ اور شہید بے نظیر آباد سمیت دیگر اضلاع میں ایک ایک سیل قائم کیا جائے گا۔
