اسلام آباد: وفاقی وزیر داخلہ رانا ثنا اللہ اور وزیر دفاع خواجہ آصف کی زیر صدارت اسمگلنگ کی روک تھام سے متعلق اجلاس میں پولیس، کسٹم اور دیگر قانون نافذ کرنے والے اداروں پر مشتمل جوائنٹ چیک پوسٹس کے قیام کی منظوری دے دی گئی۔
تفصیلات کے مطابق وفاقی وزیر داخلہ رانا ثنا اللہ اور وزیر دفاع خواجہ آصف کی زیر صدارت اسمگلنگ کی روک تھام سے متعلق اجلاس منعقد ہوا۔
وزیر داخلہ رانا ثنا اللہ کا کہنا تھا کہ اشیائے ضروریہ کی ملک سے باہر اسمگلنگ نیشنل سیکیورٹی کا مسئلہ ہے، اس مکروہ عمل کو روکنے کے لیے ہر ممکن اقدامات اٹھانے ہوں گے۔
وزیر دفاع خواجہ آصف کا کہنا تھا کہ یہ سنگین مسئلہ ہے، اس کے انسداد کے لیے ہر ممکن کوشش کرنا ہوگی، اس کی روک تھام کے لیے سخت فیصلے لینے ہوں گے۔
اجلاس میں پولیس، کسٹم اور دیگر قانون نافذ کرنے والے اداروں پر مشتمل جوائنٹ چیک پوسٹس کے قیام کی منظوری دے دی گئی۔
سیکریٹری داخلہ علی مرتضیٰ نے اجلاس کے شرکا کو پچھلے اجلاسوں میں کیے گئے فیصلوں پر پیش رفت پر بریفنگ دیتے ہوئے بتایا کہ جوائنٹ پٹرولنگ کا آغاز بھی جلد کر دیا جائے گا۔
بریفنگ میں کہا گیا کہ ایف بی آر میں اشیائے ضروریہ کی اسمگلنگ کے لیے سینٹرل ڈیٹا سیل کا قیام عمل میں لایا جا چکا ہے، اشیائے ضروریہ کی اسمگلنگ کو مؤثر طریقے سے روکنے کے لیے قوانین میں ترامیم کا بھی آغاز کردیا گیا ہے۔
