بھارتی نژاد کینیڈین گلوکار امرت پال سنگھ ڈھلون عرف اے پی ڈھلون نے کینیڈا میں اپنے گھر پر فائرنگ کے واقعے پر خاموشی توڑ دی ہے۔
بالی ووڈ کے معروف اداکار سلمان خان کے ساتھ میوزک ویڈیو ریلیز کرنے کے بعد گزشتہ روز بھارتی نژاد کینیڈین گلوکار اے پی ڈھلون کی رہائشگاہ پر فائرنگ کا واقعہ پیش آیا تھا۔
بھارتی میڈیا رپورٹس کے مطابق کینیڈا کے شہر وینکوور میں پنجابی گلوکار امرت پال سنگھ کے گھر کے باہر فائرنگ کی گئی تھی اس واقعے کے بعد کینیڈا میں مقامی حکام نے اس سے متعلق کوئی بیان جاری نہیں کی۔
تاہم بھارتی میڈیا نے ذرائع کے حوالے سے بتایا کہ جیل میں بند لارنس بشنوئی اور گینگسٹر روہت گودھرا نے گلوکار کے گھر پر فائرنگ کی ذمہ داری قبول کرلی ہے۔
سلمان خان کے ساتھ گانے کے بعد اے پی ڈھلون کے گھر پر حملہ
اب فائرنگ کے واقعے کے بعد بھارتی نژاد کینیڈین گلوکار اے پی ڈھلون نے فوٹو اینڈ شیئرنگ ایپ کی اسٹوری پر کینیڈا میں اپنے گھر پر فائرنگ کے واقعے پر خاموشی توڑ دی ہے۔
اے پی نے اسٹوری میں لکھا کہ ’ میں محفوظ ہوں، میرے لوگ بھی محفوظ ہیں، ہر ایک کا شکریہ جنہوں نے مجھ سے رابطہ کیا، آپ کا تعاون سب کچھ ہے۔
اے پی ڈھلون نے پیغام کے آخری میں لکھا ’’سب کے لیے امن اور محبت‘‘۔
واضح رہے کہ اتوار یکم اگست کو کینیڈا کے شہر وینکوور میں اے پی ڈھلن کے گھر پر فائرنگ کا واقعہ پیش آیا تھا، لارنس بشنوئی گینگ کے رکن روہت گودارا نے مبینہ طور پر اس واقعے کی ذمہ داری قبول کی تھی۔
سوشل میڈیا پر وائرل ہو رہے ایک میسج میں دعویٰ کیا جا رہا ہے کہ یکم ستمبر کی رات اے پی ڈھلوں کے دو مقامات پر فائرنگ کا واقعہ پیش آیا، ایک حملہ وکٹوریہ آئی لینڈ میں گلوکار کے گھر پر ہوا، جب کہ دوسرا حملہ ٹورنٹو کے ووڈ برج میں واقع ان کے گھر پر ہوا۔
بشنوئی گینگ نے کہا کہ فائرنگ پنجابی گلوکار کی سلمان خان سے دوستی کی وجہ سے کی گئی، پیغام میں اے پی ڈھلون کو دھمکی دی گئی ہے کہ وہ سلمان خان سے دور رہیں اور اپنی حدود میں رہیں، ورنہ انہیں بھی کتے کی مو ت مارا جائے گا۔
یہ بھی واضح رہے کہ گزشتہ ماہ اے پی ڈھلون نے اپنی نئی میوزک ویڈیو Old Money کو ریلیز کیا تھا جس میں سلمان خان اور سنجے دت بھی شامل تھے۔اس گانے کو فینز کی جانب سے کافی پسند بھی کیا گیا۔
