ARYNews.tv | Urdu – Har Lamha Bakhabar

Tag: APML

  • پرویز مشرف کو بڑا دھچکا، دیرینہ ساتھی ڈاکٹر امجد تحریک انصاف میں شامل

    پرویز مشرف کو بڑا دھچکا، دیرینہ ساتھی ڈاکٹر امجد تحریک انصاف میں شامل

    اسلام آباد: آل پاکستان مسلم لیگ (اے پی ایم ایل) کے سابق چیئرمین اور پرویز مشرف کے وکیل ڈاکٹر امجد نے تحریک انصاف میں شمولیت اختیار کرلی۔

    تفصیلات کے مطابق ڈاکٹر امجد کی وزیراعظم اور تحریک انصاف کے چیئرمین عمران خان سے ملاقات ہوئی اس موقع پر پی ٹی آئی کے سیکریٹری جنرل اور وزیر اعظم کے مشیر نعیم الحق بھی موجود تھے۔

    ڈاکٹر امجد کا کہنا تھا کہ ’مجھے تحریک انصاف کی قیادت اور اُس کے منشور پر مکمل اعتماد ہے اس لیے آج شمولیت اختیار کررہا ہوں، عمران کی قیادت میں ملک واپس ترقی کی راہ پر گامزن ہورہا ہے‘۔

    اُن کا کہنا تھا کہ حالانکہ یہ حکومتی کے ابتدائی دن ہیں مگر اُس کے باوجود تحریک انصاف کامیابی کے ساتھ ملک کر ترقی کی پٹری پر لے آئی اور اب اس کے سفر کا آغاز بھی ہوگیا‘۔

    مزید پڑھیں: ڈاکٹر امجد نے آل پاکستان مسلم لیگ کی چیئرمین شپ چھوڑ دی

    ڈاکٹر امجد کا کہنا تھا کہ ’میں کپتان کے کاررواں میں شمولیت اختیار کر کے ملکی ترقی میں اپنا کردار ادا کرنا چاہتا ہوں‘۔

    یاد رہے کہ ڈاکٹر امجد کا شمار اے پی ایم ایل کے قائدین اور پرویز مشرف کے دیرینہ ساتھیوں میں ہوتا تھا انہوں نے گزشتہ برس اگست میں پارٹی کی چیئرمین شپ چھوڑنے کا اعلان کیا تھا۔

    ڈاکٹر امجد گزشتہ برس جولائی میں ہونے والے عام انتخابات میں قومی اسمبلی کے حلقے این اے 53 سے  اے پی ایم ایل کے امیدوار تھے  البتہ انہوں نے عمران خان کے حق میں دستبردار ہونے کا اعلان کردیا۔

  • ڈاکٹر امجد نے آل پاکستان مسلم لیگ کی چیئرمین شپ چھوڑ دی

    ڈاکٹر امجد نے آل پاکستان مسلم لیگ کی چیئرمین شپ چھوڑ دی

    کراچی: آل پاکستان مسلم لیگ کے سربراہ ڈاکٹر امجد نے پارٹی چیئرمین شپ سے مستعفیٰ ہونے کا اعلان کردیا۔

    ذرائع کے مطابق ڈاکٹر امجد نے اپنا استعفیٰ کورکمیٹی کو پیش کیا جسے منظور کرلیا گیا اور اے پی ایم ایل کے تنظیمی معاملات چلانے کے لیے ہدایت علی خیشگی کو عبوری چیئرمین مقرر کردیا گیا۔

    اے پی ایم ایل ذرائع کا کہنا ہے کہ ڈاکٹر امجد مستعفیٰ ہونے کے بعد پارٹی سے علیحدہ نہیں ہوں گے بلکہ وہ سابق صدر جنرل (ر) پرویز مشرف کے قانونی امور کی نگرانی کریں گے۔

    واضح رہے کہ اے پی ایم ایل کے سربراہ پرویز مشرف نے گزشتہ دو ماہ قبل (22 جون) کو پارٹی صدارت چھوڑنے کا اعلان کیا تھا، یہ اقدام انہوں نے الیکشن کمیشن آف پاکستان کی جانب سے کیے جانے والے فیصلے پر کیا تھا۔

    الیکشن کمیشن آف پاکسستان نے سپریم کورٹ آف پاکستان کی جانب سے نااہل قرار دیے جانے کے بعد الیکشن کمیشن نے پرویز مشرف کا نام پارٹی صدارت سے ہٹانے کا فیصلہ کیا تھا۔

    عام انتخابات میں بھرپور طریقے سے حصہ لینے کے لیے پرویزمشرف کی نااہلی پارٹی رجسٹریشن کی راہ میں رکاوٹ تھی، عدالتی فیصلہ الیکشن وقت سے بہت قریب آیا تو سابق صدر کو سربراہی سے مجبوراً مستعفیٰ ہونا پڑا تھا۔

    یاد رہے کہ سپریم کورٹ نے غداری کیس میں عدم حاضری پر پرویز مشرف کو مہلت دیتے ہوئے کہا تھا کہ اگر سابق صدر عدالت میں پیش ہوجائیں تو انہیں عدالت تحفظ دے گی اور گرفتار نہیں کیا جائے گا ساتھ ہی الیکشن کمیشن میں اُن کی نامزدگی کے کاغذات وصول کر لیے جائیں گے۔

    جسٹس ثاقب نثار نے ریمارکس دیتے ہوئے کہا تھا کہ ’مشرف کمانڈو ہیں تو پاکستان آکر دکھائیں اور سیاستدانوں کی طرح میں آرہا ہوں کی گردان مت کریں، مشرف نہ آئے تو کاغذات کی جانچ پڑتال نہیں ہونے دیں گے‘۔

    بعد ازاں سپریم کورٹ نے 14 جون کو عدم حاضری پر پرویز مشرف کے کاغذات نامزدگی جمع کرانے کا عبوری حکم واپس لیتے ہوئے سماعت غیر معینہ مدت تک کے لیے ملتوی کردی تھی۔

    واضح رہے کہ پشاور ہائیکورٹ پرویز مشرف کو تاحیات نا اہل قرار دے چکی ہے اور اے پی ایم ایل کی رجسٹریشن کا کیس الیکشن کمیشن میں زیر سماعت تھا۔

    خیال رہے کہ سپریم کورٹ میں انتخابی اصلاحات کیس کا فیصلہ سناتے ہوئے پولیٹیکل پارٹیز ایکٹ2017 کی شق203 میں ترمیم کو کالعدم قرار دیتے ہوئے فیصلہ جاری کیا تھا کہ نااہل شخص پارٹی کا سربراہ نہیں بن سکتا ۔

  • پرویز مشرف کسی بھی وقت پاکستان پہنچ سکتے ہیں: اے پی ایم ایل

    پرویز مشرف کسی بھی وقت پاکستان پہنچ سکتے ہیں: اے پی ایم ایل

    کراچی: آل پاکستان مسلم لیگ کے سیکریٹری جنرل ڈاکٹر محمد امجد خان نے کہا ہے کہ سابق صدر مملکت اور سپہ سالار پرویز مشرف کسی بھی وقت پاکستان پہنچ سکتے ہیں۔

    تفصیلات کے مطابق سپریم کورٹ میں چیف جسٹس کی سربراہی میں پرویز مشرف کی واپسی سے متعلق کیس زیر سماعت ہے تاہم اب تک ان کی جانب سے حمتی فیصلہ نہیں کیا گیا کہ وہ کب وطن واپس آئیں گے۔

    مرکزی رہنما اے پی ایم ایل کا کہنا ہے کہ پرویز مشرف کی وطن واپسی کی تیاریاں آخری مراحل میں ہیں، سفر کے انتظامات مکمل کیے جارہے ہیں اور فلائٹس کا جائزہ بھی لیا جارہا ہے۔

    پاکستان جانے کا فوری کوئی ارادہ نہیں، چند روز میں فیصلہ کروں گا، پرویز مشرف

    ان کا مزید کہنا تھا کہ گذشتہ دنوں نادرا کی جانب سے پرویز مشرف کا شناختی کارڈ بلاک کیا گیا تھا جس کے باعث ان کا پاسپورٹ بھی منسوخ ہوگیا تھا تاہم ابھی تک ان کا پاسپورٹ ان بلاک نہیں ہوا۔

    واضح رہے کہ گذشتہ روز سپریم کورٹ میں چیف جسٹس کی سربراہی میں پرویز مشرف کی واپسی سے متعلق کیس کی سماعت ہوئی ، جس کے دوران چیف جسٹس نے ریمارکس دیے کہ مشرف کل دوپہر 2 بجے تک عدالت میں پیش ہوں ورنہ قانون کے مطابق فیصلہ کردیا جائے گا۔

    چیف جسٹس کا کہنا تھا کہ عدالت پہلے ہی واضح کرچکی کہ واپسی کے لیے مشرف کی شرائط کے پابند نہیں، سابق صدر واپس آئیں گے تو انہیں تحفظ دے سکتے ہیں مگر اس گارنٹی کو سپریم کورٹ لکھ کر دینے کی پابند نہیں ہے۔

    جسٹس ثاقب نثار کا ریمارکس میں مزید کہنا تھا کہ مشرف کمانڈو ہیں تو پاکستان آکر دکھائیں اور سیاستدانوں کی طرح میں آرہا ہوں کی گردان مت کریں، مشرف نہ آئے تو کاغذات کی جانچ پڑتال نہیں ہونے دیں گے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • پرویز مشرف نے لیہ سے کاغذات نامزدگی جمع کرادیے

    پرویز مشرف نے لیہ سے کاغذات نامزدگی جمع کرادیے

    لاہور: الیکشن کی بساط پر پرانے کھلاڑی کی ری انٹری ہوگئی، سابق صدر مملکت اور سپہ سالار پرویز مشرف نے لیہ سے کاغذات نامزدگی جمع کرادیے۔

    تفصیلات کے مطابق آل پاکستان مسلم لیگ (اے پی ایم ایل) کے سربراہ اور سابق صدر پرویز مشرف نے پنجاب کے ضلع لیہ سے اپنے کاغذات نامزدگی جمع کرادیے ہیں۔

    اے آر وائی نیوز کے پروگرام ’اعتراض ہے‘ میں خصوصی انٹرویو دیتے ہوئے ان کا کہنا تھا کہ کراچی اور چترال سمیت دیگر حلقوں سے الیکشن لڑنے کا فیصلہ کیا ہے البتہ تحریری فیصلہ آنے کے بعد پاکستان واپس آنے کا فیصلہ کروں گا۔

    ریحام کی کتاب ن لیگی منصوبہ ہے، مقصد عمران کے ووٹ کو نقصان پہنچانا ہے: پرویز مشرف

    ان کا کہنا تھا کہ پاکستان میرا ملک ہے میں جلد واپس آؤں گا، پوچھے گئے سوال پر پرویز مشرف کا کہنا تھا کہ نواز شریف خود سازش اور دھاندلی کرتے ہیں لیکن الزام دوسروں پر لگاتے ہیں۔

    خیال رہے کہ سابق صدر نے دوہزار تیرہ کے انتخابات میں بھی حصہ لینے کا فیصلہ لیا تھا لیکن انہیں نااہل قراردیدیا گیا تھا اس مرتبہ عدالت نے انکے کاغذات نامزدگی کی منظوری عدالت میں پیشی سے مشروط کردی ہے۔

    نادرا نے پرویز مشرف کا شناختی کارڈ بلاک کر دیا

    واضح رہے کہ اب کیا پرویز مشرف عدالت میں پیش ہوکر اپنے کاغذات نامزدگی منظور کروانے کی راہ ہموار کریں گے یا پھر اس مرتبہ بھی یہ سینئر کھلاڑی پولین سے ہی میچ دیکھے گا یہ ایک سوالہ نشان ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • نادرا نے پرویز مشرف کا شناختی کارڈ بلاک کر دیا

    نادرا نے پرویز مشرف کا شناختی کارڈ بلاک کر دیا

    اسلام آباد: نادرا کی جانب سے سابق صدر اور آل پاکستان مسلم لیگ کے سربراہ پرویز مشرف کا شناختی کارڈ بلاک کریا گیا جس کے باعث ان کا پاسپورٹ بھی منسوخ ہوگیا۔

    نادرا ذرائع کے مطابق عدالتی احکامات پر پرویز مشرف کا شناختی کارڈ بلاک کیا گیا ہے جس کی وجہ سے ان کا پاسپورٹ بھی منسوخ ہوگیا اور اب وہ ملک کے اندر جائیداد کی خرید وفروخت نہیں کر سکیں گے۔

    ذرائع کا کہنا تھا کہ یہ اقدامات ایسے وقت میں سامنے آیا ہے کہ جب سپریم کورٹ کی جانب سے پرویز مشرف کو کاغذات نامزدگی جمع کرانے کی اجازت ملی ہے۔

    پرویز مشرف کا وطن واپسی کا فیصلہ، سپریم کورٹ کی طرف سے انتخابات میں حصہ لینے کی مشروط اجازت

    خیال رہے کہ آج عدالت نے پرویز مشرف کو کاغذاتِ نامزدگی جمع کرانے کی اجازت دیتے ہوئے کہا کہ وہ عدالت میں پیش ہوں تو الیکشن کمیشن میں ان کی نامزدگی کے کاغذات وصول کر لیے جائیں گے۔

    واضح رہے کہ چیف جسٹس ثاقب نثار نے پرویز مشرف کی نا اہلی کے خلاف اپیل کی سماعت کرتے ہوئے کہا تھا کہ وہ 13 جون کولاہور رجسٹری آجائیں، انھیں پیشی تک گرفتار نہیں کیا جائے گا۔

    دریں اثنا آل پاکستان مسلم لیگ کے رہنما ڈاکٹر امجد نے میڈیا سے گفتگو کرتے ہوئے کہا تھا کہ پرویز مشرف نے وطن واپسی کا فیصلہ کرلیا ہے، ملک واپس آکر وہ انتخابات میں حصہ لیں گے، ان کا کہنا تھا کہ پرویز مشرف سپریم کورٹ کے فیصلے کا احترام کریں گے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • مقبوضہ کشمیر میں حق کے لیے لڑنے والے دہشت گرد نہیں بلکہ مجاہدین ہیں: پرویز مشرف

    مقبوضہ کشمیر میں حق کے لیے لڑنے والے دہشت گرد نہیں بلکہ مجاہدین ہیں: پرویز مشرف

    کراچی: آل پاکستان مسلم لیگ کے سربراہ اور سابق صدر پرویز مشرف نے کہا ہے کہ بھارت نہتے کشمیریوں کو شہید کر کے دہشت گردی کر رہا ہے، مقبوضہ کشمیر میں حق کے لیے لڑنے والے دہشت گرد نہیں بلکہ کشمیری مجاہدین ہیں۔

    ان خیالات کا اظہار انہوں نے اے آر وائی نیوز کے پروگرام ’الیونتھ آور‘ میں خصوصی انٹرویو دیتے ہوئے کیا، پرویز مشرف کا کہنا تھا کہ کشمیری مجاہدین خود سے بھارتی دہشت گردی کا مقابلہ کر رہے ہیں، نہتے کشمیری تو صرف پتھروں سے بھارتی افواج کا مقابلہ کر رہے ہیں۔

    انہوں نے کہا کہ 1990 میں کشمیریوں کو جس طرح مارا گیا اس کی کوئی مثال نہیں ملتی اور آج بھی ظلم و بربریت کی بھارتی افواج نے انتہا کر رکھی ہے جبکہ بھارت نے دنیا بھر میں یہ راگ الاپا کہ صرف ون ٹو ون بات ہوگی، ماضی میں امریکا میں ہمارے اس وقت کے وزیر اعظم کشمیر کا نام تک نہیں لیتے تھے۔

    نواز شریف کا پاک فوج کوبدنام کرنا انتہائی افسوس ناک ہے: پرویز مشرف

    سربراہ اے پی ایم ایل کا کہنا تھا کہ کلبھوشن یادیو نے جو پاکستان میں کیا وہ سب کے سامنے ہے، نواز شریف کی مودی سے دوستی ہے وہ بھارت کے خلاف کبھی بات نہیں کریں گے جبکہ بھارت پاکستان کو ہر سطح پر غیر مستحکم کرنا چاہتا ہے، ہمیں یاد رکھنا چاہیئے کہ امریکا اور بھارت سی پیک کے خلاف ہیں۔

    پرویز مشرف کا کہنا تھا کہ آئین کی خلاف ورزی پر آرٹیکل 6 لگتا ہے تو کئی لوگوں پر لگ سکتا ہے، نواز شریف نے ملک اور فوج کو بدنام کر کے غداری کی ہے، عدالتوں سے انصاف کی امید ہے، میرے پاکستان آنے میں نواز شریف کی حکومت رکاوٹ ہے، ن لیگ کی حکومت مخالفین کو انتقامی کارروائی کا نشانہ بناتی ہے۔

    نواز شریف ناکام سیاست دان ہیں لوگوں کو دھوکا دے رہے ہیں، پرویز مشرف

    پوچھے گئے سوال پر ان کا کہنا تھا کہ کرنل جوزف کو ملک سے باہر جانے نہیں دینا چاہئے تھا، سفارتی استثنیٰ سے متعلق زیادہ کچھ علم نہیں ہے، اس نے لوگوں کو مارا ہے تو کیسے ملک سے جانے دیا گیا، ریمنڈ ڈیوس کو بھی پاکستان سے نہیں جانے دینا چاہیئے تھا۔

    ان کا مزید کہنا تھا کہ بلوچستان میں صورت حال بہت کنٹرول میں ہے، بلوچستان کے کچھ سردار کے اپنے قبیلے بھی ان کے ساتھ نہیں ہیں، پاک فوج نے بڑی قربانیوں کے بعد ملک میں امن بحال کیا، دہشت گردی کے خاتمے کے لیے عوام نے بھی بھرپور ساتھ دیا۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • نواز شریف ناکام سیاست دان ہیں لوگوں کو دھوکا دے رہے ہیں، پرویز مشرف

    نواز شریف ناکام سیاست دان ہیں لوگوں کو دھوکا دے رہے ہیں، پرویز مشرف

    اسلام آباد: سابق صدر اور آل پاکستان مسلم لیگ کے سربراہ جنرل (ر) پرویز مشرف نے کہا ہے کہ موجودہ حکومت ابھی بھی نواز شریف کے حکم پر چل رہی ہے، نواز شریف ناکام سیاست دان ہیں لوگوں کو دھوکا دے رہے ہیں۔

    ان خیالات کا اظہار انہوں نے  اےپی ایم ایل کےسینٹرل ورکنگ کمیٹی کےاجلاس سےخطاب کرتے ہوئے کیا، پرویز مشرف نے کہا کہ حکومتی ادارے بھی نواز شریف کے حکم پر چل رہے ہیں، نواز شریف کو ان کی حالت پر چھوڑ دو، ان کے حوالے سے کیا بات کریں۔

    سابق صدر نے کہا کہ ووٹ کو عزت دو کا نعرے لگانے والے خود ووٹ کو عزت نہیں دیتے، 1999 میں حالات بہت خراب تھے، مارشل لاء نہیں لگانا چاہتا تھا، نواز شریف نے طیارہ سازش کرکے میرے لیے راہ ہموار کی، نواز شریف جھوٹا ہے اس کی بات میں سچائی نہیں ہے۔

    پرویز مشرف نے کہا کہ پاکستان واپسی کے لیے کچھ عرصہ پہلے پاسپورٹ کی تجدید کے لیے درخواست دی، وزارت داخلہ کے احکامات پر تین ماہ تک پاسپورٹ کی تجدید نہیں کی گئی، پاسپورٹ کی تجدید کرانا بطور شہری میرا بنیادی حق ہے۔

    انہوں نے کہا کہ مجھے چاروں صوبوں سے الیکشن لڑنے دیا جاتا تو جیت جاتا، میرے اوپر الزامات لگے لیکن کسی کیس میں سزا نہیں ہوئی، 2013 کی مصیبت میں خود چھلانگ لگائی اور پاکستان آیا، جو کچھ کیا عوام کے لیے کیا، کبھی کوئی کرپشن نہیں کی، مجھے سیاسی انتقام کا نشانہ بنایا جارہا ہے۔

    مزید پڑھیں: ایک لیکچر کے ایک لاکھ 45 ہزار ڈالر ملتے ہیں، پرویز مشرف

    سابق صدر کا کہنا تھا کہ ڈپٹی کمشنر، پولیس، تھانہ کچہری سب نواز شریف کے زیر اثر ہیں، وزیر داخلہ احسن اقبال نواز شریف کے اشارے پر میرے خلاف بول رہے ہیں، جب یہ پکے چلے جائیں گے تب میں پاکستان آنے میں آسانی محسوس کروں گا، ن لیگ کے عزائم خطرناک ہیں عدلیہ اور فوج سے تصادم چاہتی ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ایک لیکچر کے ایک لاکھ 45 ہزار ڈالر ملتے ہیں، پرویز مشرف

    ایک لیکچر کے ایک لاکھ 45 ہزار ڈالر ملتے ہیں، پرویز مشرف

    کراچی: سابق صدر اور آل پاکستان مسلم لیگ کے سربراہ پرویز مشرف نے کہا ہے کہ جب میں نے پاکستان چھوڑا تو میرے پاس صفر اثاثے تھے، ایک لیکچر کے ایک لاکھ 45 ہزار ڈالر ملتے ہیں۔

    ان خیالات کا اظہار انہوں نے اے آر وائی نیوز کے پروگرام ’سوال یہ ہے‘ میں کیا، پرویز مشرف نے کہا کہ میرے اثاثے جب بھی پوچھیں گے جواب دے دوں گا، میری منی ٹریل تلاش کی جائے گی تو کچھ نہیں ملے گا، میں نے سب کچھ اپنے زور بازو سے بنایا ہے۔

    انہوں نے کہا کہ لندن میں تین بیڈ روم کا فلیٹ ہے میں بہت خوش ہوں، جب پاکستان چھوڑا تو میرے پاس صفر اثاثے تھے، ایک لیکچر کے ایک لاکھ 45 ہزار ڈالر ملتے ہیں، مجھے سیکیورٹی کا نہیں بلکہ عدالتی اور حکومتی کی طرف سے نشانہ بنانے کا خطرہ ہے۔

    سابق صدر پرویز مشرف نے کہا کہ سابق چیف جسٹس افتخار محمد چوہدری نواز شریف کی تھالی سے کھا رہے تھے، انہوں نے نواز شریف کو الیکشن جتوایا جبکہ چوہدری شجاعت کی کتاب میں لکھی گئی باتوں سے میں اتفاق نہیں کرتا۔

    سربراہ آل پاکستان مسلم لیگ نے کہا کہ عمران خان ابھی تک سولو فلائٹ کررہے ہیں، چیئرمین تحریک انصاف اپنے آپ کو اوور اسٹیمیٹ کررہے ہیں، میں نے عمران خان کو کبھی وزیر اعظم کے عہدے کی آفر نہیں کی۔

    پرویز مشرف نے کہا کہ ن لیگ کے عزائم خطرناک ہیں عدلیہ اور فوج سے تصادم چاہتی ہے، آرٹیکل 62، 63 کا غلط استعمال روکنا چاہئے، آرٹیکل 62،63 میں ترمیم کے حق میں ہوں۔

    سابق صدر نے کہا کہ ڈپٹی کمشنر، پولیس، تھانہ کچہری سب نواز شریف کے زیر اثر ہیں، وزیر داخلہ احسن اقبال نواز شریف کے اشارے پر میرے خلاف بول رہے ہیں، جب یہ پکے چلے جائیں گے تب میں پاکستان آنے میں آسانی محسوس کروں گا۔

    انہوں نے کہا کہ پاکستان کوئی پارٹی اس وقت پاکستانی پارٹی نہیں ہے، پاک سرزمین پارٹی کو کراچی کے عام آدمی کا بھی ووٹ نہیں ملے گا، پاک سرزمین پارٹی ایم کیو ایم کا بدل نہیں ہوسکتی ہے۔

    پرویز مشرف نے کہا کہ خواجہ آصف کے خلاف نااہلی کا فیصلہ بالکل صحیح ہے، سیالکوٹ میں جس طرح ان پر سیاہی پھینکی گئی وہی فیصلہ عدالت سے آیا ہے، اسمبلی میں کھڑے ہوکر خواجہ آصف فوج اور اسٹیبلشمنٹ کے خلاف باتیں کرتے تھے یہ کوئی وزیر ہے، خواجہ آصف کو وزیر خارجہ بنادیا گیا وزیر خارجہ بیلنس ہونا چاہئے جو دنیا بھر میں پاکستان کی نمائندگی کرے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • ایم کیو ایم دعوت دے تب بھی ان کی سربراہی نہیں کروں گا، پرویز مشرف

    ایم کیو ایم دعوت دے تب بھی ان کی سربراہی نہیں کروں گا، پرویز مشرف

    کراچی: سابق صدر پرویز مشرف نے کہا ہے کہ فاروق ستار اتنے اہم نہیں کہ انہیں ہٹانے کی کوشش کروں، ایم کیو ایم دعوت دے تب بھی ان کی سربراہی نہیں کروں گا، میرا وژن وسیع ہے اور ایم کیو ایم اس پر پوری نہیں اترتی۔

    ان خیالات کا اظہار انہوں نے اے آر وائی کے پروگرام ’الیونتھ آوور‘ میں انٹرویو دیتے ہوئے کیا، پرویز مشرف کا کہنا تھا کہ فاروق ستار کے مائنس 2 بیان پر مجھے ہنسی آئی، ان میں قیادت کی خوبیاں نہیں وہ ابھی نہیں جانتے کہ عوام کے لیے کیا کرنا ہے۔

    پرویز مشرف کا انتخابات سے پہلے پاکستان آنے کا اعلان

    انہوں نے کہا کہ مریم نواز کا سیاسی کیریئر مایوس کن ہوگا کوئی انہیں تسلیم نہیں کرے گا، چوہدری نثار نے تو کھل کر مریم نواز کے بارے میں رائے دی، مریم نواز عوام کی خوشحالی سے متعلق کچھ نہیں جانتیں، میرے خیال میں نااہلی کے بعد نواز شریف کی مقبولیت میں اضافہ نہیں ہوا۔

    پرویز مشرف کا کہنا تھا کہ حالات ایسے ہی رہے تو مرکز میں (ن) لیگ اور سندھ میں پی پی جیت جائے گی، شہباز شریف نواز شریف سے بہتر وزیر اعظم ثابت ہوں گے، وہ ایڈمنسٹریشن اچھی کر لیتے ہیں، پنجاب کےلوگ کہتے ہیں کہ ن لیگ نے صرف لاہور کو خوبصورت بنایا۔

    نواز شریف مجرم ہیں ڈیل نہیں ہونی چاہیے، پرویز مشرف

    انہوں نے کہا کہ میرے پاس جو کچھ بھی ہے سب کے منی ٹریل موجود ہیں، موجودہ حکومت کے ہوتے ہوئے وطن واپس نہیں آؤں گا، مجھے عدالتوں میں جانے سے مسئلہ نہیں مسئلہ غیر قانونی فیصلوں کا ہے، میں پاکستان کو آسمان پر لے گیا، نواز شریف قبر میں لے جارہے ہیں۔

    پرویز مشرف کا مزید کہنا تھا کہ بدقسمتی سے ہمارے ہاں قوانین لوگوں سے انتقام لینے کے لیے بنائے جاتے ہیں، اسمبلی میں پاکستان کے خلاف باتیں ہورہی ہیں اور ہم چپ بیٹھے ہیں۔

     

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • پرویز مشرف کا انتخابات سے پہلے پاکستان آنے کا اعلان

    پرویز مشرف کا انتخابات سے پہلے پاکستان آنے کا اعلان

    دبئی : اے پی ایم ایل کے چیئرمین جنرل ریٹائرڈ پرویز مشرف نے انتخابات سے پہلے پاکستان آنے کا اعلان کر دیا اور کہا کہ ملک کی حالت دیکھ کر دل خون کے آنسو روتا ہے۔

    تفصیلات کے مطابق آل پاکستان مسلم لیگ کے سربراہ پرویز مشرف نے ویڈیو لنک کے ذریعے جلسے سے خطاب کرتے ہوئے کہا کہ انتخابات سے پہلے پاکستان آکر پارٹی کی قیادت کروں گا، پاکستان کی حالت دیکھ کردل خون کےآنسوروتا ہے۔

    پرویز مشرف کا کہنا تھا کہ ہم 2018 کےالیکشن میں حصہ لیں گے، آل پاکستان مسلم لیگ تمام قومیتوں کی نمائندگی کرتی ہے، ہماری پارٹی میں کوئی کرپٹ اور ڈاکو نہیں، پاکستان کو لوٹنے والوں سے چھٹکارا حاصل کرنا ہے۔

    چیئرمین اے پی ایم ایل نے کہا کہ ایک نیاپاکستان بنائیں گے، میرے دور میں مزدور خوش تھا، لوگ سرمایہ کاری کررہے تھے، 10سال میں کوئی ترقی نہیں ہوئی، ملک بدحالی سے دوچار ہے۔

    مزید پڑھیں :  تیسری بڑی سیاسی قوت بن کر مسلم لیگ اور پیپلز پارٹی کا خاتمہ کریں گے، پرویزمشرف

    یاد رہے اس سے قبل بھی سربراہ آل پاکستان مسلم لیگ پرویز مشرف کا کہنا تھا کہ جلد پاکستان آرہا ہوں ، ملک کو تیسری سیاسی قوت کی ضرورت ہے اور اس سیاسی خلاء کو میں اور میری اتحادی جماعتیں پورا کرسکتی ہیں۔

    پرویز مشرف کا کہنا تھا کہ آئندہ انتخابات میں عوام مسلم لیگ (ن) کا خاتمہ کردیں گے اور سندھ کے لوگوں کو کرپٹ اور نا اہل پیپلز پارٹی سے نجات ملے گی۔

    انکا کہنا تھا کہ بہت جلد پاکستان آکر انتخاب میں بھرپور حصہ لوں گا اور آل پاکستان مسلم لیگ اور اتحادی جماعتوں کی صورت میں عوام کو نیا پلیٹ فارم فراہم کریں گے جو ان کے مسائل حل کرنے کی مکمل صلاحیت رکھتی ہوگی۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہچانے کےلیے سوشل میڈیا پرشیئر کریں۔