اسلام آباد : علی جہانگیر صدیقی کی امریکا میں بطورپاکستانی سفیر تعیناتی سے متعلق سماعت میں اسلام آباد ہائیکورٹ نے وفاق کو کل تک تحریری جواب جمع کرانے کا حکم دےدیا۔
تفصیال ت کے مطابق اسلام آبادہائیکورٹ میں علی جہانگیر صدیقی کی امریکا میں بطور پاکستانی سفیرتعیناتی سےمتعلق سماعت سنگل رکنی بنچ جسٹس اطہرمن اللہ نے کی۔
دوران سماعت ڈپٹی اٹارنی جنرل راشد حنیف نےعدالت کو بتایاکہ درخواست قبل ازوقت ہے،علی جہانگیرکی بحیثیت امریکی سفیرتعینانی کا نوٹیفکیشن جاری نہیں ہوا۔
جس پر جسٹس اطہر من اللہ نے استفسار کیاکہ ٹھیک ہےتوآپ کےبیان کوریکارڈ کاحصہ بنالوں؟یہ حساس معاملہ ہے۔
جسٹس اطہرمن اللہ نے کہا کہ کیریئرڈپلومیٹس کوکیوں نظراندازکیا گیا؟عدالت کو مطمئن نہیں کریں گے تو سیکرٹری خارجہ کو بلائیں گے پبلک انٹرسٹ کا کیس ہے، آج ہی عدالت کو وفاق تحریری جواب دے۔
عدالت نے ڈپٹی اٹارٹی جنرل کو کل تک وفاق کا تحریری جواب اورمؤقف جمع کرانے کاحکم دیتے ہوئے سماعت ملتوی کردی۔
مزید پڑھیں :عدالت نےعلی جہانگیرصدیقی کوامریکہ میں سفیرتعینات کرنے پرجواب طلب کرلیا
اس سے قبل اسلام آباد ہائی کورٹ نے علی جہانگیر صدیقی کو امریکہ میں پاکستانی سفیر تعینات کرنے سے متعلق درخواست سماعت کے لیے منظور کرتے ہوئے اٹارنی جنرل، سیکرٹری کابینہ ڈویژن، سیکرٹری خارجہ، وزیر اعظم کے پرنسپل سیکرٹری سمت علی جہانگیرصدیقی کو نوٹسز جاری کے فریقین سے جواب طلب کرلیا تھا۔
گزشتہ ماہ علی جہانگیر صدیقی کی امریکا میں بطور سفیر تعیناتی کے خلاف ہائی کورٹ میں درخواست دائر کی گئی تھی، درخواست میں کہا گیا تھا کہ علی جہانگیر صدیقی کی تعیناتی کا طریقہ کار میرٹ کے برعکس ہے۔ انہیں سفارت کاری کا تجربہ نہ ہونے سے ملکی مفادات کا نقصان پہنچ سکتا ہے۔ ملکی مفاد کا تقاضا ہے کہ امریکا جیسے ملک میں سینئر اور تجربہ کار سفارت کار کی تعیناتی عمل میں لایا جائے۔
دائر کردہ درخواست میں کہا گیا کہ امریکا جیسے ملک میں تجربہ کار سفارت کار کی تعیناتی عمل میں لائی جائے۔ تعیناتی میرٹ کے برعکس ہونے کی بنا پر کالعدم قرار دی جائے۔
مزید پڑھیں : علی جہانگیر صدیقی کی بطور سفیر تعیناتی کے خلاف درخواست دائر
خیال رہے کہ 8 مارچ کو وزیراعظم شاہد خاقان عباسی نے بزنس مین جہانگیرصدیقی کے صاحبزادے علی جہانگیرصدیقی کو امریکہ میں پاکستان کا سفیر تعینات کرنے کی منظوری دی تھی۔
سابق سفیروں نے علی جہانگیر صدیقی کی بطور سفیرِ امریکہ نامزدگی کی مخالفت کی تھی جبکہ سیاسی جماعتوں کے رہنماؤں کی جانب سے بھی کڑی تنقید کی گئی۔
خیال رہے کہ علی جہانگیر صدیقی ملک کے معروف کاروباری گروپ جے ایس گروپ کے مالک جہانگیر صدیقی کے صاحبزادے ہیں جبکہ جہانگیر صدیقی پر کرپشن کے الزمات بھی ہیں جس کی تحقیقات قومی احتساب بیورو (نیب) میں جاری ہیں۔
