Tag: apposition

اسلام آباد : وفاقی وزیر حماد اظہر نے کہا ہے کہ کرنٹ اکاؤنٹ اور تجارتی خسارہ کم ہورہا ہے، اپوزیشن کی پریشانی کی اصل وجہ معیشت کی بہتری کے اعداد و شمار ہیں، یہ لوگ تاریخ کے بدترین اوربلند ترین خسارے چھوڑ کرگئے۔

یہ بات انہوں نے اے آر وائی نیوز سے خصوصی گفتگو کرتے ہوئے کہی، وفاقی وزیر کا کہنا تھا کہ ملک میں درآمدات کم اور برآمدات بڑھ رہی ہیں، کرنٹ اکاؤنٹ اور تجارتی خسارہ کم ہورہا ہے۔

حماد اظہر نے کہا کہ آئی ایم ایف اور ورلڈ بینک آپ کی تعریف کررہا ہے، اسٹاک مارکیٹ ساڑھے چار ہزار پوائنٹ اوپر چلی گئی، اپوزیشن کی پریشانی کی وجہ معیشت کی بہتری کے یہی اعداد و شمار ہیں۔

انہوں نے کہا کہ جس محنت سے سابق حکمرانوں نے معیشت کو تباہ کیا، یہ لوگ تاریخ کے بدترین اور بلند ترین خسارے چھوڑ کر گئے، اب عمران خان اسے بہتر کر رہے ہیں، ورلڈ بینک کے مطابق پاکستان کاروباری سہولتوں میں 28 درجے بہتر ہوا، وزیراعظم کے معیشت میں بہتری لانے پر اپوزیشن پریشان ہے۔

ایک سوال کے جواب میں حماد اظہر نے کہا کہ اپوزیشن کے چہروں سے پردہ ہٹانے پرفضل الرحمان کا شکر گزار ہوں، لبرل اور سیکولرازم کا نعرہ لگانے والی جماعتیں کھل کرسامنے آگئیں، پارلیمان کی بالا دستی کی باتیں کرنے والی جماعتوں کے چہروں سے پردہ اٹھ گیا۔

 ان کا کہنا تھا کہ مولانا کے دھرنے سے حکومت کو فائدہ ہوا، اپوزیشن جماعتیں بےنقاب ہوگئیں، پاکستان کے اداروں پر تنقید سے ان کی غیر ذمہ داری ثابت ہوتی ہے، قیام امن کے لیے جنگ لڑی جارہی تھی تو یہ پیسہ اور کمیشن باہر بھجوارہے تھے۔

وفاقی وزیر نے کہا کہ عدم استحکام اوردھرنوں کی خبروں سے پاکستان دشمنوں کا فائدہ ہوگا، دیکھنا ہوگا کہ ملک دشمنوں کو فائدہ پہنچانے والوں کی مدد کون کر رہا ہے؟

انہوں نے کہا کہ ایف اے ٹی ایف والے پاکستانی حالات پر گہری نظر رکھے ہوئے ہیں، ایف اے ٹی ایف کو بتائیں گے کہ دھرنے والےسیٹ بھی نہیں جیت سکتے، اداروں کے خلاف یہ کالم لکھوا رہےتھے تو سرحد پرقربانیاں دی جارہی تھیں۔