کراچی : مقامی عدالت نے جعلی پولیس گارڈ کے ہمراہ لوٹ مار کرنے والی ملزمہ ارم عرف زاہدہ کی 30 ہزار روپے کے عوض ضمانت منظور کرلی ہے، عدالت نے پولیس حکام کو آئندہ سماعت پر ملزمان کے خلاف چالان پیش کرنے کی ہدایت کردی۔
پولیس کا الزام ہے کہ ملزمہ ارم عرف زاہدہ نے 25 جون کو خود کو ٹی وی رپورٹر ظاہر کرکے کامران اور مریم نامی جوڑے کو ساحل سمندر پر لوٹا تھا، ملزمان نے انجینئر کامران اور ڈاکٹر مریم سے نقد رقم موبائل فون اور موٹر سائیکل چھین لی تھی۔
پولیس کے مطابق ملزمہ نے اپنی گاڑی پر ایڈوکیٹ ہائیکورٹ کی جعلی نمبر پلیٹ بھی لگا رکھی تھی، بعد ازاں جوڑے سے چھینی گئی موٹر سائیکل ملزمہ کے داماد فرحان سے برآمد ہوگئی۔
گرفتار ملزم فرحان خود کو ایڈوکیٹ ہائیکورٹ ظاہر کرتا ہے، اس کے علاوہ بغیر رجسٹریشن کی چھینی گئی موٹر سائیکل پر ملزمہ کے بیٹے عمران نے پریس کی نمبر پلیٹ لگا رکھی تھی۔
گرفتار ملزمہ ارم کا بیٹا عمران بھی خود کو میڈیا رپورٹر ظاہر کرتے ہوئے اپنی ماں کو چھڑانے کیلیے تھانے پہنچ گیا تھا، پولیس کے مطابق ملزمہ کا ایک داماد لطف اللہ سرکاری آفیسر ہے، اس کی سرکاری گاڑی ساس وارداتوں میں استعمال کرتی رہی۔
پولیس کا کہنا ہے کہ گرفتار ملزمہ ارم اس سے قبل بھی ساحل سمندر پر جوڑوں کو پکڑ کر لوٹنے کی کئی وارداتوں میں ملوث رہی ہے۔
