کرک : جماعت اسلامی پاکستان کے امیر سینیٹر سراج الحق نے اعلیٰ عدلیہ سے سینیٹ انتخابات میں ہارس ٹریڈنگ کا نوٹس لینے اور ممتاز ایٹمی سائنسدان ڈاکٹر عبدالقدیر کو نگران وزیراعظم بنانے کا مطالبہ کیا ہے۔
تفصیلات کے مطابق جماعت اسلامی کےزیر اہتمام تخت نصرتی کرکٹ سٹیڈیم میں منعقدہ جلسہ عام سے خطاب کرتے ہوئےانہوں نے پاکستان میں پی ایس ایل کے دوبارہ انعقادپر بھی خوشی کا اظہارکرتے ہوئے کہاہے کہ ایک مرتبہ پھر عوام کو بہترین کھیل دیکھنے کا موقع ملا ہے۔
اس موقع پر سراج الحق نے کہا کہ ملک میں نگران وزیر اعظم کے انتخابات کے لیے سیاسی پارٹیوں کے مابین صلاح مشوروں کا دور شروع ہوچکاہے‘ میں مطالبہ کرتا ہوں کہ ایٹمی سائنسدان ڈاکٹرعبدالقدیر کو نگران وزیر اعظم مقررکیاجائے ۔
ان کا کہنا تھا کہ ہمارے پڑوسی ملک بھارت میں ڈاکٹر عبدالکلام کو ملک کا وزیر اعظم بنا یا گیا مگر پاکستان میں ڈاکٹرعبدالقدیر خان کو سابق صدر پرویزمشرف نے امریکہ دباؤ کی وجہ سے اُن پر پابندیاں لگوائی گئیں۔
جماعت اسلامی کے مرکزی امیر نے بتایا کہ آج ملک میں منتخب ہونیوالے صوبائی وقومی اسمبلی کے ممبران خرید وفروخت ہورہے ہیں جس کی وجہ سے ایوان صاف نہیں‘ انہوں نے چیف جسٹس آف سپریم کورٹ سے مطالبہ کرتے ہوئے کہاہے کہ انتخابات کا نوٹس لے کر منتخب ہونیوالے سینیٹروں سے حلف لیں کہ وہ پیسوں کی مدد سے منتخب نہیں ہوئے ہیں ؟کیونکہ جب تک ایوان صاف نہیں ہوتے ‘ نہ ا سپتال ٹھیک ہوں گے اور نہ ہی منتخب لوگوں کا قبلہ درست ہوگا ۔
سراج الحق کا یہ بھی کہنا تھا کہ اسلامی انقلاب لا کر نوجوانوں کو روزگار فراہم کریں گے اور بنیادی ضروریات پر عوام کو سبسڈی دی جائے گی۔جماعت اسلامی ملک میں چین کی طرح اصلاحات کی مدد سے کرپشن کا خاتمہ کرے گی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
