Tag: Arab Parliament

اسلام آباد : وزیراعظم عمران خان نے عرب پارلیمنٹ کے سربراہ کی جانب سے خطاب کی دعوت قبول کرلی، عمران خان عرب پارلیمنٹ سے خطاب کرنیوالے پہلے غیرعرب سربراہ ہوں گے۔

تفصیلات کے مطابق وزیرِ اعظم کے نمائندہ خصوصی طاہر محمود اشرفی کی جانب سے بیان میں کہا گیا ہے کہ عرب پارلیمنٹ کے سربراہ عادل عبدالرحمان العسومی نے وزیراعظم عمران خان کو خطاب کی دعوت دی اور عمران خان نے خطاب کی دعوت قبول کرلی۔

طاہر اشرفی کا کہنا تھا کہ عمران خان عرب پارلیمنٹ سےخطاب کرنیوالے پہلے غیرعرب سربراہ ہوں گے۔

گذشہ روز وزیراعظم عمران خان سے عرب پارلیمانی وفد کی کی ملاقات ہوئی تھی ، جس میں عمران خان نے کہا تھا کہ امن، ترقی، پارٹنرشپ اور روابط میں مضبوطی پاکستان کی ترجیح ہے، پاکستان اور عرب ممالک کے درمیان تاریخی تعلقات ہیں، پاکستان مشرق وسطیٰ میں امن، استحکام اور خود مختاری چاہتا ہے۔

خیال رہے عرب پارلیمنٹ کا وفد سینیٹ کے چیئرمین محمد صادق سنجرانی کی دعوت پر پاکستان کے پانچ روزہ دورے پر ہے، دورے کے دوران وفدنے صدر عارف علوی ، وزیر خارجہ شاہ محمود قریشی اور چیئرمین سنیٹ سے ملاقاتیں کیں۔

ملاقاتوں میں دوطرفہ تعاون، ادارہ جاتی روابط اور پارلیمانی سفارتکاری سمیت اہم امور پر تبادلہ خیال کیا گیا، عرب پارلیمنٹ کے اسپیکر عادل عبدالرحمان العسومی نے کہا کہ پاکستان کا دورہ کر کے بہت خوشی ہوئی ہے،پاکستان عرب دنیا کے لیے ایک اہم ملک ہے۔ پاکستان کے ساتھ تعاون کو انتہائی سمجھتے ہیں۔