لاہور : عدالت نے سوئی ناردرن گیس کمپنی کے ایم ڈی عارف حمید کی برطرفی کا حکم معطل کردیا ۔
تفصیلات کے مطابق لاہور ہائیکورٹ نے سوئی ناردرن کے ایم ڈی عارف حمید کو عہدے سے ہٹائے جانے کا فیصلہ کالعدم کرتے ہوئے انہیں بحال کردیا۔
وفاقی حکومت،وزارتِ پٹرولیم اورفریقین کو سترہ ستمبر کو جواب کیلئےطلب کرتے ہوئے نوٹس جاری کردیئے، وزارت پیٹرولیم نے دو روز قبل ایم ڈی سوئی نادرن کو ان کے عہدے سے ہٹا دیا تھا۔
انہوں نے اپنی برطرفی کولاہور ہائیکورٹ میں چیلنج کردیاتھا جس میں انہوں نے موقف اختیار کیا کہ معاہدے کے مطابق ان کے عہدے کی معیاد ابھی مکمل نہیں ہوئی لیکن انہیں پہلے ہی عہدے سے ہٹادیا گیا ہے۔
لہٰذا ان کی برطرفی کے احکامات کالعدم قرار دیکر عہدے پر بحال کیا جائے، عدالت نے ابتدائی سماعت کرتے ہوئے وفاقی حکومت کا اقدام غیر قانونی قرار دیتے ہوئے درخواست گزار عارف حمید کے موقف کو درست قرار دیا۔
عدالت کا کہنا تھا کہ وفاقی حکومت ان کوعہدے سے نہیں ہٹا سکتی۔انہیں صرف کمپنی آرڈیننس کے ذریعے ہی ہٹایا جا سکتا ہے۔ عدالت نے ایم ڈی سوئی گیس عارف حمید کو دوبارہ ان کے عہدے پر بحال کردیا ہے۔
