کراچی : ڈیفنس میں زہریلا کھانا کھانے سے دو بچوں کی ہلاکت کے حوالے سے ریسٹورنٹ کے کھانوں کی فرانزک رپورٹ میں تصدیق ہوگئی ہے کہ دونوں بچوں کی موت ہوٹل کا کھانا کھانے سے ہی ہوئی۔
ایریزونا گرل ریسٹورنٹ کا کھانا زہریلا تھا کھانے میں خطرناک بیکٹیریاز تھے، جس کے باعث دونوں بچوں محمد اوراحمد کے گردے فیل ہوئے، فرانزک رپورٹ میں بچوں کی موت کا سبب معلوم ہونے کے بعد پولیس نے کارروائی کرتے ہوئے ریسٹورنٹ کے دو منیجرز عامر اختر اور عرفان علیم کو گرفتار کرکے مقدمہ درج کرلیا۔
مذکورہ مقدمہ میں قتل بالسبب اور کھانے پینے کی اشیاء میں ملاوٹ کی دفعات شامل کی گئی ہیں، پولیس نے عدالت سے ان کا تین روزہ جسمانی ریمانڈ بھی حاصل کرلیا ہے، اس حوالے سے ڈی آئی جی ساؤتھ کا کہنا ہے کہ ریسٹورنٹ مالکان ضمانت پر ہیں جلد ان تک بھی پہنچیں گے۔
یاد رہے کہ گزشتہ ماہ کراچی کے علاقے کلفٹن کی زمزمہ اسٹریٹ پر واقع ریسٹورنٹ میں دو بچے مضر صحت کھانا کھانے سے جاں بحق ہوگئے تھے، بچوں کی والدہ کو بھی تشویش ناک حالت میں اسپتال منتقل کیا گیا تھا۔
