کراچی : رینجرز اہلکاروں نے جرائم پیشہ افراد کی گرفتاری کیلئے کراچی کے مختلف علاقوں میں چھاپے مار کر 19افراد کو گرفتار کرلیا جبکہ مشکوک افراد اور گھروں کی تلاشی کا عمل بھی جاری ہے، صدر موبائل مارکیٹ میں چور لاکھوں روپے مالیت کا سامان لے کر فرار ہوگئے۔
تفصیلات کے مطابق قانون نافذ کرنے والے ادارے نے شہر قائد کے مختلف علاقوں میں کارروائیاں کرتے ہوئے جرائم میں ملوث 19 ملزمان کو گرفتار کرلیا۔
ملزمان کے قبضے سے اسلحہ اور مسروقہ سامان برآمد کرلیا گیا، سندھ رینجرز کے ترجمان کی جانب سے جاری ہونے والے اعلامیے کے مطابق حالیہ کارروائیاں میمن گوٹھ، گلستان جوہر، کورنگی انڈسٹریل ایریا، عوامی کالونی، اتحادٹاؤن، بلدیہ اور سعیدآباد کے مختلف علاقوں میں کی گئیں۔
گرفتار ملزمان منشیات فروشی، ڈکیتی اوراسٹریٹ کرائم کی درجنوں وارداتوں میں ملوث ہیں، اس کے علاوہ رینجرز اہلکاروں نے شہر کے مختلف علاقوں میں سرچ آپریشن کیا۔
اس حوالے سے ذرائع کا کہنا ہے کہ مشکوک افراد اور گھروں کی تلاشی کا عمل جاری ہے، آپریشن کے دوران بائیو میٹرک مشین کے ذریعے مشکوک افراد کو چیک کیا جارہا ہے۔
ذرائع کے مطابق یہ آپریشن چہلم امام حسین اور امن وامان کے حوالے سے کیا جارہا ہے، سرچ آپریشن لائنزایریا، اےبی سینالائن، شارع فیصل کےاطراف جاری ہے، جس میں بارہ سے زائد گاڑیاں، موٹرسائیکلیں، النسافورس کی اہلکار بھی شامل ہیں۔
دوسری جانب صدر موبائل مارکیٹ میں چوری کی واردات ہوئی ہے، واردات کی سی سی ٹی وی فوٹیج اے آر وائی نیوز کو حاصل ہوگئی۔ فوٹیج میں پانچ ملزمان کو واردات کرتے دیکھا جاسکتا ہے، ملزمان دکان سے سات لاکھ روپے مالیت کا سامان لوٹ کر فرار ہونے میں کامیاب ہوگئے۔
