Tag: Army Chief General Qamar Javed Bajwa

اسلام آباد: آرمی چیف جنرل قمرجاوید باجوہ نے بھارت کی جانب سے سپرسانک میزائل کے پاکستان آنے پر شدید تشویش کا اظہار کرتے ہوئے کہا بھارت مذاکرات کیلئے تیار ہے تو پاکستان بھی تیار ہے۔

تفصیلات کے مطابق جامع سلامتی کے موضوع پر 2 روزہ اسلام آباد ڈائیلاگ کا اجلاس ہوا، اجلاس میں آرمی چیف جنرل قمرجاوید باجوہ شریک ہوئے۔

آرمی چیف جنرل قمرجاوید باجوہ نے تقریب سے خطاب میں معید یوسف اوران کی ٹیم کواجلاس کے انعقاد پر مبارکباد دیتے ہوئے کہا آپ سے دوبارہ خطاب کرنا باعث فخر ہے۔

جنرل قمرجاوید باجوہ کا کہنا تھا کہ پاکستان خطے کے مسائل کو شراکت داری سے حل کرنے پر گامزن ہے، خطے کی سیکیورٹی اور استحکام ہماری پالیسی کا حصہ ہے، معاشی اور شہریوں کی سلامتی اہم ہے۔

دہشت گردی کے خلاف کے حوالے سے آرمی چیف نے کہا کہ دہشت گردی کے خلاف جنگ میں پاکستان نے 90ہزار جانیں قربان کیں، دہشت گردی کے خلاف جنگ میں مثالی کامیابیاں حاصل کیں۔

ان کا کہنا تھا کہ مقاصد کے حصول کے لیے ملک اور باہر امن اہم ہے اور شہریوں کی خوشحالی اورسلامتی ہماری ترجیح ہے، آخری دہشت گرد کے خاتمے تک جدوجہد جاری رہے گی۔

افغانستان کے حوالے سے جنرل قمرجاوید باجوہ نے کہا کہ افغانستان میں امن اواستحکام کے لیے پاکستان عالمی برادری کےساتھ پرعزم ہے، عالمی برادری کےساتھ مل کرافغانستان کی فلاح کے لیے کام کیا۔

آرمی چیف کا کہنا تھا کہ یوکرین کی جنگ کے آگے مغرب افغانستان کے عوام کو نہ بھولے، عالمی برادری کو افغانستان کودوبارہ دہشت گردی کا مرکز بننے سے روکنا ہوگا، پاکستان نے افغانستان سےمتعلق عالمی برادری سے تحفظات کا اظہار کیا ہے ، افغانستان سے متعلق رابطوں کو منقطع نہیں کرنا چاہیے۔

بھارتی میزائل سے متعلق انھوں نے کہا کہ بھارت کی جانب سے سپرسانک میزائل کے پاکستان آنے پر شدید تشویش ہے، بھارت نے پاکستان کو میزائل سےمتعلق پہلےآگاہ نہیں کیا، میزائل کے باعث کسی کا بھی جانی نقصان ہوسکتا تھا۔

جنرل قمرجاوید باجوہ کا مزید کہنا تھا کہ پاکستان نے بھارت سےمیزائل گرنے کی تحقیقات کا مطالبہ کیا ہے ، بھارت دنیا اور پاکستان کو بتائے کہ اس کے ہتھیارمحفوظ ہیں۔

آرمی چیف نے بتایا کہ ایل اوسی پرفی الحال صورتحال قابل اطمینان ہے، پرامن جنگ بندی سے سرحدوں پرامن ہواہے، پاکستان کیمپ پالیٹکس پریقین نہیں رکھتا، پاکستان سب کے ساتھ مل کرکام کرنا چاہتا ہے۔

ان کا کہنا تھا کہ چین کےساتھ سی پیک معاہدہ انتہائی اہم ہے، پاکستان کو یوکرین میں جاری تنازع پرتشویش ہے تاہم روس کے ساتھ پرانے تعلقات ہیں۔

روس یوکرین جنگ سے متعلق جنرل قمر جاوید باجوہ نے کہا کہ روس کایوکرین پرحملہ افسوسناک ہےکیونکہ بہت سےشہری ہلاک ہوچکے ہیں، پاکستان روس اور یوکرین میں جنگ بندی کا مطالبہ کررہا ہے ، دونوں ممالک کے تنازع کو ہاتھوں سے نہیں نکلنا چاہیے۔

آرمی چیف نے کہا کہ پاکستان اس وقت انتہائی اہم پوزیشن میں ہے، پاکستان مسئلہ کشمیر کے حل کے لیے ڈپلومیسی اورمذاکرات پریقین رکھتا ہے لیکن افغانستان سے متعلق رابطوں کو نظر انداز نہیں کیا جاسکتا۔

پاک بھارت تعلقات کے حوالے سے ان کا کہنا تھا کہ بھارت سے تمام معاملات بات چیت سے حل کرنا چاہتے ہیں، پاکستان چاہتاہےبھارت سے آبی مسائل بھی مذاکرات کےذریعےحل کیے جائیں۔

پاک فوج کے سربراہ نے کہا کہ یوکرین صورتحال میں افغان عوام کونظراندازنہیں کیاجائے، پاکستان یوکرین بحران سے نمٹنے کے لیے سیز فائراور ڈائیلاگ پر یقین رکھتا ہے۔

جنرل قمر جاوید باجوہ کا مزید کہنا تھا کہ خطےکودہشت گردی،موسمیاتی تبدیلی اورغربت کےچیلنجز کاسامناہے لیکن ہم خوشحال اور پر امن پاکستان کے لیے پرعزم ہے۔

انھوں نے کہا کہ کئی وجوہات کےباعث پاکستان روس تعلقات کافی عرصے سرد رہے لیکن حالیہ عرصےمیں روس سےتعلقات میں مثبت پیش رفت ہوئی۔

آرمی چیف کا کہنا تھا کہ یوکرین کیخلاف روسی جارحیت افسوسناک ہے، یوکرین میں ہزاروں ہلاکتیں،لاکھوں پناہ گزین بن گئے، آدھا ملک تباہ ہو چکا، یوکرین کا معاملہ بہت بڑاسانحہ ہے جسے فوراً روکا جانا چاہیے۔

جنرل قمر جاوید باجوہ نے مزید کہا کہ روس کےجائزسیکیورٹی مسائل کے باوجود چھوٹے ملک کیخلاف جارحیت کو نظر انداز نہیں کیا جا سکتا، پاکستان چاہتا ہے یوکرین میں فوراً جارحیت بند اور جنگ بندی کی جائے اور یوکرین مسئلے کے دیرپا حل کیلئے فریقین ڈائیلاگ کریں۔

ان کا مزید کہنا تھا کہ پاکستان نے یوکرین انسانی امداد بھیجی ہے، اسے جاری رکھے گا، یوکرین تنازع کا پھیلاؤ کسی کیلئے فائدہ مند نہیں ہوگا۔

راولپنڈی : آرمی چیف جنرل قمرجاوید باجوہ نے سعودی وزیرخارجہ سے ملاقات میں او آئی سی وزرائے خارجہ اجلاس کو تاریخی پیش رفت قرار دیتے ہوئے کہا کانفرنس سےعالمی برادری کومشترکہ حکمت عملی اپنانےمیں مدد ملے گی۔

تفصیلات کے مطابق پاکستانی فوج کے شعبہ تعلقات عامہ (آئی ایس پی آر) کی جانب سے بیان میں کہا گیا ہے کہ آرمی چیف جنرل قمرجاوید باجوہ سے سعودی وزیر خارجہ کی ملاقات ہوئی۔

آئی ایس پی آر کا کہنا تھا کہ ملاقات میں دلچسپی کے امور، علاقائی سلامتی،افغان صورتحال پر بات چیت کی گئی اور دفاعی تعلقات پر بھی تبادلہ خیال کیا گیا۔

آرمی چیف نے کہا کہ پاکستان سعودی عرب سے تعلقات کو قدر کی نگاہ سے دیکھتا ہے اور پاکستان سعودی عرب کے اسلامی دنیا میں منفرد مقام کو تسلیم کرتا ہے۔

آرمی چیف نے او آئی سی وزرائے خارجہ اجلاس کو تاریخی پیش رفت قرار دیتے ہوئے کہا کانفرنس سےعالمی برادری کو مشترکہ حکمت عملی اپنانے میں مدد ملے گی اور خطے میں امن واستحکام کے لیے ابھرتے چیلنجوں کا حل تلاش کیا جا سکے گا۔

آئی ایس پی آر کے مطابق اس موقع پر سعودی وزیر خارجہ نے افغان صورتحال ، بارڈرمینجمنٹ اورعلاقائی استحکام میں پاکستان کے کردار کو سراہا۔

سعودی وزیر خارجہ نے سفارتی تعاون میں بہتری کے لیے کردار ادا کرنے کا عزم کرتے ہوئے کانفرنس کی میزبانی پر پاکستان کی کوششوں کی تعریف کی۔

گذشتہ روز آرمی چیف جنرل قمرجاوید باجوہ سے مصر کے وزیر خارجہ اور ازبکستان کے نائب وزیر خارجہ کی ملاقات ہوئی تھی ، ملاقات میں باہمی دلچسپی کے امور،علاقائی سیکیورٹی، دفاعی تعاون پر تبادلہ خیال کیا گیا۔

راولپنڈی : آرمی چیف جنرل قمرجاوید باجوہ نوشکی پہنچ گئے ، جہاں وہ 2فروری کاحملہ ناکام بنانیوالے جوانوں کی حوصلہ افزائی کریں گے۔

تفصیلات کے مطابق پاکستانی فوج کے شعبہ تعلقات عامہ (آئی ایس پی آر) کی جانب سے بیان میں کہا گیا ہے کہ آرمی چیف جنرل قمرجاویدباجوہ نوشکی پہنچ گئے، وہ پورا دن فوجی جوانوں کیساتھ گزاریں گے۔

آئی ایس پی آر کا کہنا ہے کہ اس موقع پر آرمی چیف کوسیکیورٹی صورتحال ،آپریشنل تیاریوں پربریفنگ دی جائے گی اور فارمیشن کی دہشت گردی کی روک تھام کیلئےسرگرمیوں سےآگاہ کیا جائے گی۔

ترجمان کے مطابق آرمی چیف2 فروری کا حملہ ناکام بنانیوالےجوانوں کی حوصلہ افزائی کریں گے۔

آئی ایس پی آر نے بتایا کہ دورے کے دوران وزیراعظم اور آرمی چیف کومجموعی صورتحال پربھی بریفنگ دی جائے گی جبکہ وزیراعظم،آرمی چیف مقامی قبائلی عمائدین سےبھی ملاقات کریں گے۔

راولپنڈی : آرمی چیف جنرل قمر جاوید باجوہ کا کہنا ہے کہ آئین اورقانون کی رہنمائی میں منتخب حکومت کی مدد جاری رکھیں گے، میں آپ کو یقین دلاتا ہوں کہ یہاں سب کچھ اچھا ہو گا، قوم نے ہمیشہ چیلنجز کو کامیابیوں میں تبدیل کیا، انشا اللہ اب بھی کریں گے۔

تفصیلات کے مطابق آرمی چیف جنرل قمر جاوید باجوہ نے پاکستان ملٹری اکیڈمی میں انتہائی اہم خطاب کرتے ہوئے کہا میں آپ کو زندگی کے اس یادگاردن پر مبارکباد پیش کرتاہوں، پاس آؤٹ کیڈٹس کومبارکباد جنہوں نے محنت سے ٹریننگ مکمل کی، آپ ایسی فوج کاحصہ بننے جارہے ہیں، جو پیشہ ورانہ صلاحیتوں کے لئے جانی جاتی ہے، آپ نے اپنے آپ کو عظیم، مقدس، انتہائی چیلنجنگ پروفیشن کیلئے اہل ثابت کیا۔

آرمی چیف کا کہنا تھا کہ پاکستان آرمی نے دہشت گردی کوشکست دی ، فروری2019 میں اپنے سے 5 گنا بڑے دشمن کو ہزیمت سے دوچارکیا، پاکستان آرمی ہماری قابل فخرقوم کی خوبصورت اورحقیقی عکاس ہے۔

جنرل قمر جاوید باجوہ نے کہا کہ شہیدوں کے وارث دراصل پاکستان کی خوبصورت نمائندگی کررہےہیں، عظیم قوم اور پاک آرمی کی تمام سابقہ اور آنے والے نشیب و فراز کی ذمہ داری آپ پرہے، ان میں بہت سے اتار چڑھاؤ کے واقعات آپ کی پیدائش سےبھی پہلے کے ہوں گے تاہم ذمہ داریاں مکمل کر چکنے کے بعد بھی آپ کو ملکی سلامتی ،خوشحالی کے لئے جوابدہ ٹھہرایا جائے گا، یہ آپ کے کندھوں پرملک کی عظیم قوم کا آپ سے محبت اور ذمہ داری کا منفرد انداز ہے۔

سربراہ پاک فوج کا کہنا تھا کہ پاکستا ن میں کوئی بھی کسی اور کے کئے کیلئے جوابدہ نہیں، اعزاز سمجھتا ہوں ہم قوم کے سامنے قابل اعتماد اور جوابدہ ادارہ کے طور پر حاضررہتےہیں، جب وطن، قوم کو ہماری ضرورت پڑی ہم نے بہترین نتائج کےلئےاپنا آپ پیش کر دیا۔

انھوں نے کہا کہ پاکستان ایک ترقی پذیرملک ہے، لیکن پاکستانیوں کے دل بہت بڑے ہیں، پاکستانی قوم ہر مشکل ،چیلنج میں آپ کو اپنے شانہ بشانہ ملے گی، پاکستانی قوم آپ پر فخربھی کرے گی اورعزت بھی دے گی، آپ پرفرض ہے مکمل وفاداری، بےمثال لگن سے ان کے اعتماد پر پورا اتریں۔

آرمی چیف کا کہنا تھا کہ قوم کا افواج پراعتماد، مضبوط رشتہ ان بے شمارقربانیوں کا ثمر ہے، وہ قربانیاں جوہمارے غازیوں اورشہیدوں نے اپنے لہو سے رقم کیں، آپ پرلازم ہےاس رشتے کو مضبوط سے مضبوط تر بناتے جائیں۔

جنرل قمر جاوید باجوہ نے کہا کہ نظم وضبط،فرائض کی بجاآوری،غیرجانبداری آپ کاہدف ہوناچاہیے، آپ کواپنی جوانی کاایک بڑاحصہ سخت مشکلات، بہتر ملکی مستقبل کیلئے مختص کرنا پڑے گا ، اسے مشکل کی بجائےچیلنج کے طور پر قبول کریں۔

ان کا کہنا تھا کہ سپاہ گری مشکل راستہ ہے، جس پر چلنا آسان نہیں، اس راستے پر اپنےآپ کووقف کرنا پڑتا ہے، آپ کو ڈلیور کرنا پڑتا ہے، ہم نے امن کیلئے بھاری قیمت ادا کی ہے، امن قائم رکھنے کیلئے لہو سے اس کی حفاظت یقینی بنائیں گے، امن سنگ میل تو ہے لیکن منزل نہیں۔

سربراہ پاک فوج نے کہا کہ معاشی خودمختار، نظریاتی مستحکم پاکستان جو قائد کا ویژن ہے ، اس کی بنیاد کو مضبوط کرنا ہے، دیگر ممالک کی طرح پاکستان کو جنگ، دہشت گردی اور معاشی شکنجے کا سامنا کرنا پڑا، دنیا کے بہت سے ممالک ان مشکلات کا سامنا نہ کرسکے اور بکھر گئے لیکن پاکستان نے ان تمام سازشوں اورمشکلات کا ڈٹ کر مقابلہ کیا۔

جنرل قمر جاوید باجوہ کا کہنا تھا کہ اپنی تمام صلاحیتیں بروئےکارلاکرملک کو ترقی کی راہ پرگامزن کریں ، قائد کے ویژن کے مطابق پاکستان نے علاقائی، عالمی امن کیلئے بھرپورکوششیں کیں، یہ ایک مشکل سفرتھا لیکن اطمینا ن یہ ہے کہ آج ہمارےادارےمضبوط ہو رہے ہیں اور ادارےمل کر پاکستان کی خدمت سر انجام دے رہے ہیں۔

انھوں نے کہا کہ وہ دشمن جو تباہی کا منصوبہ بنائے بیٹھے تھے مایوسی سےہماری کامیابیاں دیکھ رہے ہیں، ہمارے دشمن اپنے عزائم میں ناکام ہونے کے بعد دل شکستہ ہیں ، دشمن کی مایوسی میں پاکستان کو 24 گھنٹے ہائبرڈوار کا سامنا ہے، اس ہائبرڈوارکاہدف عوام ہیں اور میدانِ جنگ انسانی ذہن ہیں، ہرسطح پر قومی قیادت ہائبرڈوارکا ہدف ہے۔

آرمی چیف کا کہنا تھا کہ آپ کو بحیثیت ینگ لیڈرز پہلے دن سے اس چیلنج کا سامنا کرنا پڑے گا، آپ کو مایوسی کے اس ماحول سے امیدکی کرن بننا ہے ، آپ کو اپنے جوانوں کوبھی اس پروپیگنڈے سے محفوظ رکھنا ہو گا۔

جنرل قمر جاوید باجوہ نے کہا کہ اصولوں اور روایات پر عمل پیرا ہو کر ہی آپ اِس ہائبرڈ وار کا مقابلہ کر سکتے ہیں، ذات پات، مذہب اورلسانیت سے برتر ہم سب پاکستان کے سپاہی ہیں، اتحادہماری قوت اورانشااللہ ہم سب متحد ہیں، ہائبرڈوار کا مقصدپاکستان میں امید کی فضا کو ٹھیس پہنچانا ہے، ان کا مقصد اس مفروضے کو تقویت دینا ہے ، یہاں کچھ بھی اچھا نہیں ہوسکتا۔

ان کا کہنا تھا کہ میں آپ کو یقین دلاتا ہوں کہ یہاں سب کچھ اچھا ہو گا، قوم نے ہمیشہ چیلنجز کو کامیابیوں میں تبدیل کیا، انشا اللہ اب بھی کریں گے ، ہائبرڈوار کو مثبت تنقید سے نہ ملائیں،ایسی تنقید جس کا بہت شور، چرچا لگے، شاید اعتماد، محبت اور حب الوطنی کا نتیجہ ہو لہذا ایسی تنقید پرتوجہ دینی چاہیے، جہاں تعمیری اصلاح کی ضرورت ہواس کاضرورجائزہ لیں، یہ تنقیداس بات کا ثبوت ہے کہ بحیثیت قوم حالات کا ادراک ہے۔

سربراہ پاک فوج نے کہا کہ بحیثیت قوم حالات کاادراک اورہم درست سمت جارہے ہیں، عوام، دستور، دستوری روایات، وطن سےعہدوفا اصل مضبوطی، طاقت ہے، آئین پاکستان اور قومی مفادات تمام معاملات میں ہمارے رہنما ہیں، آج پاکستان دفاعی حوالے سے ایک مضبوط پاکستان ہے، آئین وقانون کی رہنمائی میں منتخب حکومت کی مدد جاری رکھیں گے۔

جنرل قمر جاوید باجوہ کا کہنا تھا کہ بحیثیت قوم ثابت کیا اپنے ذاتی، آرگنائزیشن معاملات سے بالاترہو کر ناقابل یقین کام کرسکتے ہیں، دہشت گردی کیخلاف جنگ ہو یا کورونا کے خلاف حکمت عملی، لوکسٹ کے خلاف کارروائی ہو یا سیلابی صورتحال ہم نے خود کو کارکردگی سے ثابت کیا، پاکستان آرمی کو ان تمام قومی کوششوں میں شامل ہونے پر فخر ہے۔

آرمی چیف نے مزید کہا کہ قوم نے ہمیشہ ہماراساتھ دیا بالخصوص جب ملک دشمنوں کے خلاف جنگ لڑرہےتھے، میری دعا ہے کہ پاکستان ایک خوشحال، مستحکم اور متعین مقام پر پہنچے، ایسا پاکستان جہاں ناصرف مسلمان بلکہ اقلیتیں بھی حقیقی تصور ریاست کو دیکھ سکیں۔

ان کا کہنا تھا کہ آپ کو انتہائی مشکل ترین حالت میں ذمہ داریاں اداکرنے کا فرض سونپاگیا ہے، آپ کو یہ فرض ہرصورت نبھانا ہے اور ان چیلنجز کے خلاف نبردآزما ہونا ہے، منزل کے قریب پہنچ چکے ہیں تاہم ہمیں احتیاط کا دامن تھامے رکھنا ہے۔