ARYNews.tv | Urdu – Har Lamha Bakhabar

Tag: Army Chief General Raheel sharif

  • آرمی چیف کی وزیراعظم ڈیوڈ کیمرون سے ملاقات

    آرمی چیف کی وزیراعظم ڈیوڈ کیمرون سے ملاقات

    لندن:آرمی چیف کی وزیراعظم ڈیوڈکیمرون سےملاقات ہوئی جس میں دہشتگردی کیخلاف تعاون اور انٹیلیجنس معلومات پرتبادلہ خیال کیا گیا ۔

    آئی ایس پی آر کے مطابق آرمی چیف جنرل راحیل شریف کی لندن میں وزیراعظم ڈیوڈکیمرون دیگرحکام سے ملاقات ہوئی  جس میں دہشتگردی کےخلاف دونوں ملکوں کے تعاون اورانٹیلی جنس معلومات کے تبادلے پربات چیت ہوئی ۔

    آئی ایس پی آر کے مطابق دونوں ملکوں میں کلعدم تنظیموں کے خلاف کاروائی اور دہشتگردوں کی بیرون ملک فنڈنگ روکنے پر بھی تبادلہ خیال کیا گیا ۔

    آرمی چیف اور برطانوی قومی سلامتی کے مشیر سرکیم ڈیروج کے درمیان ملاقات کے دوران پاک برطانیہ دو طرفہ تعلقات اور دہشت گردی کے خلاف جنگ کے حوالے سے تبادلہ خیال کیا گیا جبکہ آرمی چیف نے شمالی وزیرستان میں جاری آپریشن ضرب عضب سے آگاہ کیا۔

     ذرائع کے مطابق ملاقاتوں کے دوران خطے کی سلامتی سمیت افغانستان کی صورتحال پر بات چیت کی گئی جبکہ برطانیہ نے دہشت گردی کے خلاف جنگ میں پاکستانی مسلح افواج کے کردار کی تعریف کی۔

  • پاک فوج کے سربراہ جنرل راحیل شریف تین روزہ دورے پر برطانیہ روانہ

    پاک فوج کے سربراہ جنرل راحیل شریف تین روزہ دورے پر برطانیہ روانہ

    راولپنڈی : پاک فوج کے سربراہ جنرل راحیل شریف تین روزہ دورے پر برطانیہ روانہ ہوگئے، آرمی چیف دورے کے دوران برطانیہ کی عسکری اور سیاسی قیادت سے ملاقات کریں گے۔

    آئی ایس پی آر کےمطابق برطانیہ کی عسکری قیادت کو آپریشن ضربِ عضب کے حوالے سے آگاہ کریں گے، آرمی چیف کچھ عرصہ پہلے امریکا کا بھی دورہ کرچکے ہیں۔

    گزشتہ روز آرمی چیف جنرل راحیل شریف نے امریکی سینٹرل کمانڈ کے کمانڈر جنرل آسٹن سے ملاقات کی تھی، ملاقات میں دونوں رہنماؤں کے درمیان علاقائی سیکیورٹی، باہمی دلچسپی کے امور پر تبادلہ خیال کیا گیا تھا۔

    واضح رہے کہ جنرل راحیل شریف نے دورۂ امریکہ میں بھی امریکی افواج اور انتظامیہ کے عہدے داروں سے ملاقاتیں کیں تھیں، جن میں دہشت گردوں کے خلاف آپریشن ضربِ عضب، دہشت گردی کے خلاف جنگ، خطے کے دیگر ممالک کے ساتھ تعلقات کے علاوہ کنٹرول لائن اور ورکنگ باونڈی پر بھارت کے ساتھ فائر بندی کے معاہدے کی مخالفت کے بارے میں بات چیت ہوئی تھی۔

  • پشاور: آرمی اسکول کھل گیا ، آرمی چیف کا دورہ، بچوں کا استقبال

    پشاور: آرمی اسکول کھل گیا ، آرمی چیف کا دورہ، بچوں کا استقبال

    پشاور: دہشتگردی کا نشانہ بنائے جانے والا آرمی پبلک سکول پشاور چھبیس روز کے بعد تدریسی عمل کیلئے دوبارہ کھول دیا گیا ہے، پاک فوج کے سربراہ جنرل راحیل شریف اور ان کی اہلیہ نے اس موقع پر خود بچوں کا استقبال کیا اور والدین سے بھی ملاقات کی، کور کمانڈر پشاور لیفٹنٹ جنرل ہدایت الرحمان اور دیگر اعلیٰ حکام بھی ان کے ہمراہ تھے۔

    آرمی چیف جنرل راحیل شریف نے سانحۂ پشاور کے بعد پہلے دن اسکول پہنچنے والے غازیوں کا خود استقبال کیا اور ان کا حال احوال پوچھا پُرعزم طلبہ کے حوصلے دیکھ کر انھیں خوش آمدید کہا،  انہوں نے بچوں اور ان کے والدین کے عزم اور حوصلے کو سراہا اور ان کے جذبے کی تعریف کی، اس موقع پر سیکیورٹی کے انتہائی سخت انتظامات کیے گئے تھے۔

    آرمی چیف کا کہنا تھا کہ بچوں کے حوصلے بلند ہیں اور قوم ناقابلِ شکست ہے، اس موقع پر آرمی چیف جنرل راحیل شریف کی اہلیہ بھی ان کے ہمراہ تھیں ، انھوں نے بچوں کے والدین سے ملاقات کی۔

     بعد ازاں جنرل راحیل شریف اور ان کی اہلیہ نے بچوں اور اساتذہ کے ہمراہ سکول کی اسمبلی میں شرکت کی ، جس کا آغاز تلاوتِ قرآن پاک سے ہوا ، جس کے بعد لب پہ آتی ہے دعا بن کے تمنا میری ، دعا اور قومی ترانہ پڑھا گیا اور پاکستان زندہ باد کے نعرے لگائے گئے۔

    عاصم سلیم باجوہ کے مطابق اس موقع پر جنرل راحیل شریف کا کہنا تھا کہ تمام بچوں کے حوصلے بلند ہیں اور یہ قوم ناقابل شکست ہے۔

    یاد رہے کہ 16 دسمبر کو پشاور کے آرمی پبلک اسکول پر کالعدم تحریک طالبان (ٹی ٹی پی) کے حملے کے نتیجے میں 132 بچوں سمیت 144 افراد ہلاک ہوگئے تھے۔

  • دہشتگردی کیخلاف ایکشن کیلئےدلیرانہ فیصلےکرناہونگے، جنرل راحیل شریف

    دہشتگردی کیخلاف ایکشن کیلئےدلیرانہ فیصلےکرناہونگے، جنرل راحیل شریف

    راولپنڈی :آرمی چیف جنرل راحیل شریف کا کہنا ہے کہ دلیرانہ فیصلے ہی دہشت گردی کا خاتمہ کریں گے،عسکری قیادت قوم کی توقعات پر پورا اترے گی ۔ پوری قوم عسکری اور سیاسی قیادت کی طرف دیکھ رہی ہے۔

    کورکمانڈر اجلاس سے خطاب کرتے ہوئے آرمی چیف جنرل راحیل شریف نے کہا کہ پوری قوم عسکری اور سیاسی قیادت کی طرف دیکھ رہی ہے۔

    آرمی چیف کا کہنا تھا کہ دہشت گردی کیخلاف بھرپور ایکشن کے لئے بامقصد اور دلیرانہ فیصلے کرنا ہوں گے، تمام ادارے مل کر مربوط انداز میں قومی ایکشن پلان پر بلاتاخیر عمل کریں۔

    کورکمانڈر کانفرنس میں نیشنل ایکشن پلان پرعملدرآمد کےتمام پہلوؤں پر غور کیا گیا، کانفرنس میں سانحۂ پشاور پر گہرے رنج وغم کا اظہار کرتے ہوئے آخری دہشتگرد کے خاتمے تک آپریشن جاری رکھنے کا فیصلہ بھی کیا گیا۔

  • دہشت گردی پر قابو کیلئے سخت قوانین کی ضرورت ہے، آرمی چیف

    دہشت گردی پر قابو کیلئے سخت قوانین کی ضرورت ہے، آرمی چیف

    اسلام آباد: آرمی چیف جنرل راحیل شریف نےکہا ہے کالعدم تحریکِ طالبان پاکستان کے خلاف افغان انٹیلیجنس کا آپریشن کامیابی سےجاری ہے، دہشتگردوں کے خلاف سخت قوانین بنانا ہوں گے۔

    آل پارٹیز کانفرنس میں آرمی چیف جنرل راحیل شریف نے دوٹوک الفاظ میں کہہ دیا کہ دہشت گردی پر قابو پانے کے لئے سخت قوانین اور مؤثر اقدامات کی ضرورت ہے۔

    وزیرِاعظم کی زیرِصدارت آل پارٹیز کانفرنس میں آرمی چیف نے بریفنگ میں بتایا کہ افغان آرمی چیف اور ایساف کمانڈر کے ساتھ ملاقات بہت کامیاب رہی، دونوں کمانڈرز نے دہشتگردی کے خلاف تعاون کا یقین دلایا ہے۔

    انھوں نے بتایا کہ تحریکِ طالبان پاکستان کے خلاف ایساف اور افغان انٹیلیجنس کا آپریشن کامیابی سے آگے بڑھ رہا ہے، افغان سرحد کے قریب آپریشن میں ڈیڑھ سو دہشتگرد ہلاک کئے۔

    آرمی چیف نے کہا کہ فوج نےدہشتگردوں کے خلاف مختلف آپریشنز شروع کر رکھے ہیں، آپریشن ضربِ عضب اور خیبر ون کامیابی سے جاری ہے، آپریشن ضربِ عضب کو پوری قوم کی حمایت حاصل ہے۔

  • انسدادِ دہشتگردی کیلئے پارلیمانی کمیٹی کا اجلاس آج ہوگا

    انسدادِ دہشتگردی کیلئے پارلیمانی کمیٹی کا اجلاس آج ہوگا

    اسلام آباد: دہشت گردی سے کیسے نمٹیں، پارلیمانی کمیٹی کا اجلاس آج ہوگا، آرمی چیف اور ڈی جی آئی ایس آئی شریک ہوں گے، وزیرِ اعظم نواز شریف کا کہنا ہے کہ دہشت گردی کیخلاف جنگ کی قیادت وہ خود کریں گے۔

    دہشت گردی کے خاتمے کیلئے سیاسی اور عسکری قیادت نےاسلام آباد میں سرجوڑ لیے ہیں، گزشتہ روز وزیرِاعظم نواز شریف کی زیرِصدارت اجلاس میں اجلاس میں وفاقی وزراء، آرمی چیف جنرل راحیل شریف، ڈی جی آئی ایس آئی ،ڈی جی ایم آئی اور ڈی جی ایم او نے شرکت کی۔

    اجلاس میں فیصلہ کیا گیا کہ منظور شدہ قومی ایکشن پلان پر موثر اور فوری عملدرآمد کو یقینی بنایا جائے گا، اجلاس میں دہشتگردی کے خاتمے کے متعدد مختصر اور وسط مدتی اقدامات پر غور کیا گیا اور انٹیلی جنس کے نظام کو مزید بہتر بنانے اور دہشت گردی کی کارروائیاں کرنے والوں، ان کوپناہ دینے اور مالی معاونت کرنے والوں کے خلاف بلا امتیاز کارروائی پراتفاق کیا گیا۔

    وزیرِاعظم نوازشریف کا کہنا تھا کہ انتہاء پسندی اور دہشتگردی کے نظریات کو ہر قیمت پر شکست دی جائے گی، دہشت گردی کیخلاف فوج اور قوم کی قربانیاں لازوال ہیں۔

    وزیرِاعظم نے انسدادِ دہشت گردی کیلئے قانونی امور کاجائزہ لینے کیلئے قانونی ماہرین سے بھی مشاورت کی، دہشت گردی کے خلاف متفقہ حکمت عملی مرتب کرنے کیلئے وزیرِاعظم نے پارلیمانی جماعتوں کی اے پی سی بھی طلب کرلی ہے۔

    جس میں وزیرِاعظم نے آرمی چیف اور ڈی جی آئی ایس آئی کو شرکت کی دعوت بھی دی ہے، اجلاس میں پاک فوج کے شہداء کو خراج عقیدت پیش کیا گیا۔

  • آرمی چیف نے 6دہشتگردوں کے ڈیتھ وارنٹ پر دستخط کردیئے

    آرمی چیف نے 6دہشتگردوں کے ڈیتھ وارنٹ پر دستخط کردیئے

    راولپنڈی : پاک فوج کے سربراہ جنرل راحیل شریف نے فوجی عدالت سے سزا یافتہ چھ دہشت گردوں کے ڈیتھ وارنٹ پر دستخط کردیئے ہیں۔

    ڈی جی آئی ایس پی آر نے اپنے ٹویٹر پیغام میں بتایا ہے کہ آرمی چیف جنرل راحیل شریف نے فیلڈ جنرل کورٹ مارشل کے احکامات کے بعد سنگین واقعات میں ملوث چھ دہشت گردوں کے ڈیتھ وارنٹ پر دستخط کردیئے ہیں۔

    ترجمان پاک فوج کا کہنا تھا کہ جن دہشت گردوں کے ڈیتھ وارنٹ پر دستخط کیے گئے ہیں، انہیں فوجی عدالتوں نے سزائے موت کا حکم جاری کیا تھا تاہم اس پرعملدرآمد نہ ہونے کے باعث ان دہشت گردوں کو منطقی انجام تک نہیں پہنچایا جاسکا تھا۔

    ذرائع کے مطابق جی ایچ کیو حملےمیں ملوث مجرمان کو پہلے مرحلے میں پھانسی دی جائےگی، جی ایچ کیو حملےمیں عقیل عرف ڈاکٹر عثمان اور اخلاص عرف روسی شامل ہیں، ان کے علاوہ راشد، غلام سرور، زبیر اور راشد محمود بھی جی ایچ کیو حملے میں ملوث ہیں۔

  • پشاور کور ہیڈ کوارٹر میں شہید طلباء کی غائبانہ نماز جنازہ ادا

    پشاور کور ہیڈ کوارٹر میں شہید طلباء کی غائبانہ نماز جنازہ ادا

    پشاور :کور ہیڈ کوارٹر میں شہید طلباء کی غائبانہ نماز جنازہ ادا کردی گئی، آرمی چیف جنرل راحیل شریف نے نماز جنازہ میں شرکت کی اور شہداء کو خراج عقیدت پیش کیا۔

     غائبانہ نماز جنازہ میں گورنر، وزیر اعلیٰ خیبر پختون خوا اور فوجی افسران اور جوانوں سمیت بڑی تعداد میں لوگ شریک تھے، نمازِ جنازہ کے بعد آرمی چیف نے فوجی جوانوں کے ساتھ نعرے لگا کر بلند حوصلے اور پختہ عزم کا اظہار کیا۔

    منگل کو آرمی چیف دورہ کوئٹہ مختصرکر کے پشاور پہنچے تھے۔ جہاں انہوں نے سی ایم ایچ کا دورہ کیا اور زخمی بچوں کی عیادت کی، آرمی چیف کی جانب سے کور ہیڈکوارٹرز پشاور میں وزیرِاعظم نواز شریف کو بریفنگ بھی دی گئی تھی۔

    واضح رہے کہ گزشتہ روز پشاورکےآرمی پبلک اسکول میں دہشت گردوں نے ایک سو بتیس بچوں کی جان لے لی، عملے کے نو افرادشہید اور ڈیڑھ سوافراد زخمی ہوئے۔

  • اسلام آباد:آرمی چیف کی زیرِ صدارت کور کمانڈرکانفرنس جاری

    اسلام آباد:آرمی چیف کی زیرِ صدارت کور کمانڈرکانفرنس جاری

    راولپنڈی: آرمی چیف جنرل راحیل شریف کی صدارت میں کور کمانڈر کانفرنس جاری ہے۔

    کور کمانڈرز کانفرنس میں ملک کی مجموعی سکیورٹی صورتحال کا جائزہ لیا جا رہا ہے, شمالی وزیرستان میں دہشت گردوں کے خلاف جاری آپریشن ضربِ عضب اور خیبر ون آپریشن میں پیش رفت اور اس میں حاصل ہونے والے اہداف کا بھی جائزہ لیا جائے گا۔

    آرمی چیف جنرل راحیل شریف کور کمانڈرز کو اپنے دورۂ امریکا کی تفصیلات سے بھی آگاہ کریں گے اور انھیں اعتماد میں لیں گے۔

  • کامیابیوں کا تسلسل برقرار رکھا جائے، آرمی چیف

    کامیابیوں کا تسلسل برقرار رکھا جائے، آرمی چیف

    پشاور: پاک فوج کے سربراہ جنرل راحیل شریف نے پشاورہیڈ کوارٹر کادورہ کیا اور قبائلی علاقہ جات میں جاری آپریشن کو جلد از جلد مکمل کرنے کی ہدایات دیں۔

    تفصیلات کے مطابق آرمی چیف جنرل راحیل شریف آج سہہ پہر پشاورہیڈ کوارٹر پہنچے جہاں انہیں آپریشن ضربِ عضب اور خیبر ایجنسی میں جاری آپریشن خیبر ون کے بارے میں تفصیلی بریفنگ دی گئی۔

    بریفنگ میں آرمی چیف کو قبائلی علاقوں میں اب تک کی پیشرفت سے آگاہ کیا گیااورساتھ ہی ساتھ آپریشن کے سبب بے گھر ہونے والے قبائلیوں کی دیکھ بھال سے متعلق امور کے بارے میں بھی آرمی چیف کو آگاہ کیا گیا۔

    آرمی چیف نے اس موقع پر آپریشن کے تسلسل کو برقرار رکھتے ہوئے اسے جلد از جلد حتمی مراحل تک پہنچانے کی ہدایت کی جبکہ آئی ڈی پیز کی بحالی کے لئے ہرممکن اقدام کرنے کا کہا۔

    واضح رہے کہ آج صبح ہی پاک فوج نے آپریشن ضرب عضب میں ایک بڑی کامیابی حاصل کرتے ہوئے ایک انتہائی مطلوب کمانڈر عدنان الشکری کو ایک حملے میں ہلاک کیا ہے۔