اسلام آباد : عدالت نے چیئرمین پی ٹی آئی عمران خان کی ناقابل وارنٹ گرفتاری کیخلاف دی گئی درخواست پر محفوظ فیصلہ سنا دیا، جس کے مطابق ان کے وارنٹ گرفتاری معطل کردیے گئے ہیں۔
اسلام آباد ہائیکورٹ نے توشہ خانہ کیس میں عمران خان کی وارنٹ گرفتاری کے خلاف درخواست پر فیصلہ سناتے ہوئےعمران خان کو 13 مارچ کو سیشن عدالت میں پیش ہونے کا حکم دیا ہے، اسلام آباد ہائیکورٹ کے چیف جسٹس عامر فاروق نے محفوظ فیصلہ سنایا۔
عدالت میں عمران خان کے وکلاء نے پیشی کیلئے 4 ہفتے کا وقت دینے کی استدعا کی تھی، توشہ خانہ کیس میں وارنٹ گرفتاری منسوخ کرنے کیلئے رجوع کیا گیا تھا۔
توشہ خانہ کیس میں اسلام آباد کی ڈسٹرکٹ اینڈ سیشن کورٹ میں ایڈیشنل سیشن جج ظفر اقبال نے عمران خان کو 13 مارچ کو عدالت میں پیش ہونے کا حکم دیا ہے۔
ایڈیشنل سیشن جج نے اپنے حکم نامے میں کہا ہے کہ چیئرمین پی ٹی آئی عمران خان فرد جرم عائد ہونے کے لیے 13 مارچ کو عدالت کے روبرو پیش ہوں
یاد رہے کہ اسلام آباد ہائی کورٹ کے چیف جسٹس عامر فاروق نے توشہ خانہ فوجداری کیس میں عمران خان کے ناقابل ضمانت وارنٹ گرفتاری کے خلاف درخواست پر سماعت کی۔
عمران خان کے وکیل نے مؤقف اختیار کیا کہ ان کے مؤکل کو 28 فروری کو توشہ خانہ کیس میں طلب کیا گیا، اسی دن عمران خان کو 3 دیگر عدالتوں میں پیش ہونا تھا، عمران خان مقررہ وقت میں وہاں پیش نہیں ہوسکے۔ جس پر وارنٹ جاری کردیئے گئے۔ ان وارنٹس کی بنیاد پر پولیس عمران خان کو گرفتار کرنے گئی۔
جسٹس عامر فاروق نے استفسار کیا کہ میں وارنٹس منسوخ بھی کردوں تو کیا ہو گا؟ عدالت تو آپ کو صرف فرد جرم کے لیے بلارہی ہے، قانون کو تو اپنا راستہ لینا ہی ہوتا ہے عدالت اورکس طرح بلائے؟ آپ پیش ہوجائیں فرد جرم کے بعد جو استثنیٰ لینا ہو لیتے رہیں۔
قبل ازیں الیکشن کمیشن آف پاکستان نے چیئرمین تحریک انصاف عمران خان کے قابلِ ضمانت وارنٹ جاری کیے تھے۔
الیکشن کمیشن میں سابق وزیر اعظم عمران خان کے خلاف توہین الیکشن کمیشن سے متعلق کیس کی سماعت ہوئی جس میں قابل ضمانت وارنٹ جاری کرتے ہوئے انہیں 50 ہزار روپے کے مچلکے جمع کروانے کا حکم دیا گیا۔
الیکشن کمیشن کا کہنا ہے کہ بار بار طلب کیے جانے کے باوجود عمران خان پیش نہیں ہو رہے، عمران خان کو 14 مارچ کو توہین الیکشن کمیشن کیس میں طلب کرلیا گیا۔
