لاہور: تحریک انصاف کے چیئرمین عمران خان نے کہا ہے کہ حکمراں جماعت کسانوں پر ظلم کرکے اُن کو احتجاج تک کرنے نہیں دے رہی مگر پی ٹی آئی حکومتی ظلم کے خلاف مظلوم کسانوں کے ساتھ ہے۔
ان خیالات کا اظہار انہوں نے لاہور میں میڈیا سے گفتگو کرتے ہوئے کیا، اُن کا کہنا تھا کہ ’’حکمرانوں نے کسانوں سے احتجاج کا حق بھی چھین لیا ہے، پہلے اُن پر ظلم کیا جاتا ہے اور جب وہ اس کے خلاف آواز اٹھائیں تو انہیں گرفتار کرلیا جاتا ہے‘‘۔
عمران خان کا کہنا تھا کہ ’’تحریک انصاف کسانوں پر ہونے والے ظلم کے خلاف ہے اور ہم اُن سے اپیل کریں گے کہ وہ ظالموں کے خلاف رائے ونڈ احتجاج کا حصہ بنتے ہوئے اس میں شرکت کریں ہم اُن کے حقوق کے لیے آواز بلند کریں گے‘‘۔
چیئرمین تحریک انصاف نے کہا کہ ’’پاک بھارت کسانوں کا موازنہ کیا جائے تو حیرت ہوتی ہے، پڑوسی ملک اپنے کسانوں کو سہولیات فراہم کرتا ہے جبکہ پاکستان کے موجودہ حکمراں اُن پر مظالم ڈھاتے ہیں‘‘۔
سربراہ تحریک انصاف نے لیگی حکومت پر تنقید کرتے ہوئے کہا کہ ’’اگر جمہوریت میں بھی احتجاج کا حق نہیں دیا جاتا تو پھر آمریت اور جمہوریت میں کیا فرق رہ جاتا ہے، مسلم لیگ ن نام نہاد جمہوری جماعت ہے مگر اُس کے مظالم آمریت کی عکاسی کرتے ہیں‘‘۔
انہوں نے پولیس کی جانب سے کسانوں کی گرفتار کی مذمت کرتے ہوئے کہا کہ ’’پر امن احتجاج کسانوں کا حق ہے، انتظامیہ کی ہدایت پر کسانوں کو حراست میں لینا غیر جمہوری رویے کی عکاسی کرتا ہے، انہوں نے مطالبہ کیا کہ ’’گرفتار کیے گئے تمام کسانوں کو فی الفور رہا کیا جائے اور انہیں احتجاج کا پورا حق دیا جائے‘‘۔
بعد ازاں رائیونڈ مارچ کے حوالے سے منعقدہ ایک تقریب میں کارکنان سے خطاب کرتے ہوئے عمران خان کا کہنا تھاکہ ’’30 ستمبر کو جوش دکھانے کے لیے بہت وقت ملے گا، دھرنوں کے ذریعے ہمارا پیغام پورے ملک میں پہنچا اب آخری مرحلے میں پورے ملک کے عوام مظاہرے میں شرکت کریں گے‘‘۔
انہوں نے مسلم لیگ ن پر تنقید کرتے ہوئے کہا کہ ’’حکمراں جماعت آزاد میڈیا کو کنٹرول کرنے کے لیے صحافیوں اور چینلز کو خریدتی ہے تاہم کچھ باضمیر صحافی آج بھی حق و سچ بیان کرتے ہیں جنہیں میں سلام پیش کرتا ہوں‘‘۔
عمران خان نے کہا کہ ’’عوام کی بڑی تعداد رائے ونڈ مارچ میں شرکت کے لیے تیار ہے تاہم پنجاب حکومت پولیس کے ذریعے لوگوں کو تنگ کرے گی اور عوام کو جلسے میں شرکت کرنے سے روکا جائے گا‘‘۔
