ریاض: سعودی عرب میں حکام کا کہنا ہے کہ گھریلو ملازمائیں مملکت کے 7 ایئرپورٹس پر آسکتی ہیں جہاں سے آجر کا انہیں وصول کرنا لازمی ہے۔
اردو نیوز کے مطابق سعودی عرب میں گھریلو ملازمین کے ادارے مساند کا کہنا ہے کہ ایگزٹ ری انٹری ویزے (خروج و عودہ ویزے) پر آنے والی گھریلو ملازماؤں کی دستاویزی کارروائی کے لیے سعودی عرب کے سات ایئر پورٹس مختص کیے گئے ہیں۔
مساند کا کہنا ہے کہ 7 ایئر پورٹس میں سے کسی ایک سے گھریلو ملازمہ کی کارروائی کروانا اور مملکت پہنچنے پر استقبال آجر کی ذمہ داری ہے۔
کنگ خالد انٹرنیشنل ایئرپورٹ ریاض، کنگ فہد ایئرپورٹ ظہران، امیر نائف انٹرنیشنل ایئرپورٹ، امیر محمد بن عبد العزیز انٹرنیشنل ایئرپورٹ مدینہ منورہ، حائل انٹرنیشنل ایئرپورٹ، الاحسا انٹرنیشنل ایئرپورٹ اور ابہا انٹرنیشنل ایئرپورٹ سے گھریلو ملازمائیں خروج و عودہ ویزے پر پہنچیں گی۔
ایئرپورٹ سے ان کی کارروائی کروا کے اپنے ہمراہ گھر لے جانا کفیل کی ذمہ داری ہے۔ ملازمہ سے رابطہ بھی کفیل کے ذمے ہے۔
خیال رہے کہ محکمہ پاسپورٹ اس سے قبل یہ بات واضح کر چکا ہے کہ پہلی بار کوئی گھریلو ملازم اپنے وطن سے سعودی عرب پہنچے گی تو اس کی کارروائی ریکروٹنگ ایجنسی کے ذمے ہو گی تاہم خروج و عودہ ویزے پر واپس آنے والی ہر گھریلو ملازمہ کی کارروائی آجر کے ذمے ہے۔
