اسلام آباد: پاکستان تحریک انصاف کے چیئرمین عمران خان نے آرٹیکل 245 کے نفاذ کو سپریم کورٹ میں چیلنج کر دیا۔
تفصیلات کے مطابق عمران خان نے ایڈووکیٹ حامد خان کی وساطت سے آرٹیکل 245 کے نفاذ کے خلاف آئینی درخواست سپریم کورٹ میں دائر کر دی۔
عمران خان نے درخواست میں نگراں وزیر اعلیٰ محسن نقوی اور اعظم خان سمیت دیگر کو فریق بنایا ہے، جس میں استدعا کی گئی ہے کہ سپریم کورٹ آرٹیکل 245 کے نفاذ کو غیر آئینی قرار دے۔
سابق وزیر اعظم نے عدالت سے استدعا کی ہے کہ سپریم کورٹ 9 اور 10 مئی کے واقعات کی تحقیقات کے لیے کمیشن تشکیل دے، اور ایم پی او کے تحت کارکنان کی گرفتاریاں غیر آئینی قرار دے کر انھیں فوری رہا کرنے کا حکم دیا جائے۔
درخواست کے ذریعے تحریک انصاف کے رہنماؤں اور کارکنوں کے خلاف آرمی ایکٹ کے تحت کارروائی بھی چیلنج کر دی گئی ہے، درخواست میں استدعا کی گئی ہے کہ سپریم کورٹ آرمی ایکٹ اور آفیشل سیکرٹ ایکٹ کے تحت سویلینز کا کورٹ مارشل غیر قانونی قرار دے۔
درخواست میں استدعا کی گئی ہے کہ سپریم کورٹ 9 مئی کے واقعات کی تحقیقات کے لیے جوڈیشل کمیشن تشکیل دے، عدالت تحریک انصاف کے رہنماؤں کی جبری علیحدگیوں کو غیر آئینی قرار دے، یہ سارا ڈراما نواز شریف اور مریم نواز کا رچایا گیا ہے، انھوں نے پروپیگنڈہ کیا کہ عمران خان آپنا آرمی چیف لانا چاہتے ہیں، جب کہ عمران خان نے ہمیشہ اداروں کا احترام کیا اور ساتھ کھڑے رہے۔
درخواست میں وفاقی حکومت، نواز شریف، شہباز شریف، مریم نواز، آصف زرداری، بلاول بھٹو، مولانا فضل الرحمان کو بھی فریق بنایا گیا ہے۔
