اسلام آباد : دفتر خارجہ کے ترجمان خلیل اللہ قاضی نے کہا ہے پاکستانی سفارت کارمحمد ادریس کے بارے میں بھارتی میڈیا رپورٹ حقائق کے منافی ہے۔
پاکستانی دفتر خارجہ نے پریس ریلیز جاری کرتے ہوئے کہا کہ چند ماہ قبل محمد ادریس کو نئی دہلی میں پاکستانی ہائی کمیشن میں بطور سفارتکار تعینات کیا گیا تھا، تاہم اب ان کو ویزے کے اجراء میں غیر معمولی تاخیر کے باعث ایک اور پاکستانی مشن میں تعینات کردیا گیا ہے۔
ایک سوال کے جواب میں دفتر خارجہ کے ترجمان کا کہنا تھا کہ پاکستان کسی بھی بیرونی جارحیت کا بھرپور دفاع کرنے کی صلاحیت رکھتا ہے۔
اس سے قبل بھارت میں پاکستانی ہائی کمشنرعبدالباسط نے بھارتی اقدام کی مذمت کردی، ان کا کہنا تھا کہ پاکستانی سفارتکارکاویزہ منسوخ کرنا ناقابل قبول ہے۔
مودی سرکارپاکستان دشمنی میں اندھی ہوکرسفارتی آداب بھی بھول گئی،پاکستانی سفارت کارمحمد ادریس پرجھوٹے الزامات لگاکر واپس بھیج دیا۔
پاکستان دشمنی میں بھارت اوچھے ہتھکنڈوں پر اتر آیا ہے ، جمہوریت کے دعویداروں نے بین الاقوامی اصولوں اور سفارتی آداب کی دھجیاں اڑادیں، مودی سرکار نے پاکستانی سفارت کار محمد ادریس کا ویزا منسوخ کردیا۔
جنگی جنون میں مبتلا بھارتی حکام نے پاکستانی سفارتکار پر ناپسندیدہ سرگرمیوں میں ملوث ہونے کا جھوٹا الزام لگایا ہے۔
