ARYNews.tv | Urdu – Har Lamha Bakhabar

Tag: ARY news Urdu

  • اسرائیلی فوج کی بربریت، فلسطینی فٹبال ٹیم کا معروف کھلاڑی شہید

    اسرائیلی فوج کی بربریت، فلسطینی فٹبال ٹیم کا معروف کھلاڑی شہید

    غزہ پر اسرائیلی فوج کی بربریت کا سلسلہ تاحال جاری ہے، 24 گھنٹوں میں فلسطینی فٹبال ٹیم کے کھلاڑی سلیمان العبید سمیت مزید 150 سے زائد فلسطینی شہید ہوگئے۔

    بین الاقوامی خبر رساں ادارے کی رپورٹ کے مطابق شہداء میں امداد کے منتظر 90 فلسطینی بھی شامل ہیں۔ فلسطینی فٹبال ٹیم کا کھلاڑی سلیمان العبید بھی کھانا ملنے کی آس میں اسرائیلی فائرنگ سے شہید ہوا۔

    سلیمان العبید فلسطینی فٹبال ٹیم کے سابق کپتان بھی تھے۔

    میڈیا رپورٹس کے مطابق اب تک اسرائیلی فوج کے حملوں میں مختلف کھیلوں کے 662 کھلاڑی جان سے ہاتھ دھو بیٹھے ہیں۔

    علاوہ ازیں اسرائیلی فوج نے امدادی ٹرکوں کو بمباری سے تباہ سڑکوں کی طرف موڑ دیا، امدادی ٹرک اُلٹنے سے 20 فلسطینی جام شہادت نوش کرگئے۔

    میڈیا رپورٹس کے مطابق غذائی قلت سے اب تک 96 بچوں سمیت 193 فلسطینی زندگیاں ہار چکے ہیں۔

    دوسری حماس کی جانب سے اہم فیصلہ کیا گیا ہے کہ آئندہ تشکیل دی جانے والی حکومتی انتظامیہ میں حصہ نہیں لیا جائے گا۔

    حماس رہنما نے نام ظاہر نہ کرنے کی شرط پر عرب ٹی وی کو انٹرویو میں دعویٰ کیا کہ حماس کو غزہ پٹی کی گزرگاہیں اور امدادی کارروائیوں کا کنٹرول سنبھالنے میں کوئی دلچسپی نہیں۔

    وائٹ ہاؤس نے صدر ٹرمپ اور پیوٹن کی متوقع ملاقات کی تصدیق کر دی

    اُنہوں نے کہا کہ فلسطینیوں کی اپنی سرزمین سے بے دخلی روکنے کیلئے بین الاقوامی برادری کی کاوشوں کو سراہتے ہیں۔

    حماس رہنما کا کہنا تھا کہ فلسطینی عوام اور حماس پر بہت زیادہ دباؤ ہے، جنگ بندی کے لئے مثبت رویہ اختیار کرلیا گیا ہے۔

  • بل گیٹس نے خواتین کی صحت کیلئے اربوں ڈالر مختص کردیے

    بل گیٹس نے خواتین کی صحت کیلئے اربوں ڈالر مختص کردیے

    خواتین کی صحت کے لیے مائیکروسوفٹ کے بانی بل گیٹس کی تنظیم ’دی گیٹس فاؤنڈیشن‘ نے 2.5 ارب ڈالرز مختص کرنے کا اعلان کردیا۔

    بین الاقوامی خبر رساں ادارے کی رپورٹ کے مطابق مختص کی گئی رقم 2030ء تک خواتین کے ان امراض پر ترجیحی بنیادوں پر خرچ ہوگی، جو عموماً نظر انداز کردیے جاتے ہیں۔

    رپورٹس کے مطابق مائیکروسوفٹ کے بانی بل گیٹس کا کہنا ہے کہ خواتین عموماً ان بیماریوں سے ہلاک ہوجاتی ہیں جن کا بآسانی علاج ممکن ہوتا ہے۔

    مائیکروسوفٹ کے بانی کا کہنا تھا کہ نئی فنڈنگ فاؤنڈیشن کی جانب سے اب تک کی سب سے بڑی فنڈنگ ہے جو پانچ اہم شعبوں میں 40 سے زیادہ نئی ایجادات پر کام کرے گی۔ خاص طور پر ان ممالک میں جو کم اور درمیانی آمدنی والے ہیں اور جہاں خواتین زیادہ متاثر ہوتی ہیں۔

    میڈیا رپورٹس میں کہا گیا ہے کہ رقم دوران حمل پیچیدگیوں، بلڈ پریشر، ہائی شوگر لیول سمیت تولیدی صحت سے متعلق مختلف بیماریوں کے علاج اور تحقیق پر خرچ کی جائے گی۔

    اس کے علاوہ ویکسینیشن، ماں کی صحت اور غذا، مانع حمل ایجادات اور جنسی عمل سے منتقل ہونے والی بیماریوں پر بھی خصوصی توجہ دی جائے گی۔

    بل گیٹس نے اپنی 99 فیصد دولت عطیہ کرنے کا اعلان کردیا

    مائیکروسوفٹ کے بانی نے خواتین کی صحت میں سرمایہ کاری پر زور دیتے ہوئے کہا کہ خواتین کی صحت میں سرمایہ کاری کا نسلوں پر دیرپا اثر پڑتا ہے۔ یہ صحت مند خاندانوں، مضبوط معیشتوں اور ایک زیادہ انصاف پسند دنیا کی طرف لے جاتا ہے۔

  • شارجہ: پاک افغان میچ میں تماشائیوں کا تصادم روکنے کیلئے اہم فیصلہ

    شارجہ: پاک افغان میچ میں تماشائیوں کا تصادم روکنے کیلئے اہم فیصلہ

    کراچی: شارجہ حکام نے پاک افغان میچ کے درمیان ہونے والے متوقع سنسنی خیز مقابلوں سے قبل اسٹیڈیم میں سخت سیکیورٹی اقدامات کا فیصلہ کیا ہے۔

    رپورٹس کے مطابق شارجہ میں ٹرائی نیشن ٹی20 سیریز کا رواں ماہ کے آخر میں آغاز ہوگا، جس میں میزبان متحدہ عرب امارات (یو اے ای) بھی شریک ہے۔

    شارجہ حکام کی جانب سے یہ فیصلہ ماضی میں دونوں ٹیموں کے میچوں کے دوران ہونے والے ہنگامہ آرائی کے واقعات کے پیش نظر کیا گیا ہے تاکہ اس بار اسٹیڈیم میں موجود شائقین کے لیے پرامن اور محفوظ ماحول یقینی بنایا جاسکے۔

    منتظمین کی جانب سے یہ اعلان سامنے آیا ہے کہ پاکستان اور افغانستان کے شائقین کو الگ الگ اسٹینڈز میں بٹھایا جائے گا اور ان کے لیے علیحدہ انٹری پوائنٹس مختص کیے گئے ہیں۔ ٹکٹوں کی فروخت بھی قومیت کی بنیاد پر کی جا رہی ہے تاکہ ہر ٹیم کے سپورٹرز اپنے مخصوص حصے میں رہیں۔

    شارجہ کرکٹ اسٹیڈیم کی گنجائش 16 ہزار ہے اور سیریز کے تمام میچز شارجہ میں ہی کھیلے جائیں گے، حکام توقع کررہے ہیں کہ ہاؤس فل ہوگا، اس لیے سیکیورٹی کے یہ اقدامات بروقت اور اہم سمجھے جا رہے ہیں۔

    لیجنڈز لیگ: پاکستان چیمپئنز کے مالک کا پی سی بی کی پابندی پر ردعمل سامنے آگیا

    ٹی 20 ٹرائی نیشن سیریز 29 اگست سے 7 ستمبر تک جاری رہے گی۔ پہلے میچ میں 29 اگست کو شام 7 بجے پاک افغان میچ کا انعقاد ہوگا۔

    سیریز کا شیڈول:

    29 اگست – افغانستان بمقابلہ پاکستان
    30 اگست – یو اے ای بمقابلہ پاکستان
    1 ستمبر – یو اے ای بمقابلہ افغانستان
    2 ستمبر – پاکستان بمقابلہ افغانستان
    4 ستمبر – پاکستان بمقابلہ یو اے ای
    5 ستمبر – افغانستان بمقابلہ یو اے ای
    7 ستمبر – فائنل

  • ترکیہ: آیا صوفیہ مسجد کو آگ لگانے کی کوشش، ویڈیو سامنے آگئی

    ترکیہ: آیا صوفیہ مسجد کو آگ لگانے کی کوشش، ویڈیو سامنے آگئی

    ترکیہ میں تاریخی اہمیت کی حامل آیا صوفیہ مسجد میں پیش امام کی بروقت کارروائی کے باعث آگ لگانے کی کوشش ناکام ہوگئی۔

    غیر ملکی ذرائع ابلاغ کے مطابق پولیس نے فوری طور پر کارروائی کرتے ہوئے ملزم کو گرفتار کرلیا ہے جبکہ مذکورہ واقعے کی سی سی ٹی وی فوٹیج بھی سوشل میڈیا پر گردش کررہی ہے۔

    ترک میڈیا کا کہنا ہے کہ یہ واقعہ 11 جولائی کی رات پیش آیا، ویڈیو میں دیکھا جاسکتا ہے کہ ایک مشتبہ فرد نماز کے اختتام پر آیا صوفیہ مسجد میں داخل ہوا اور منبر کے بجائے مسجد کے ستونوں کے پیچھے چلا گیا، جہاں اس نے کاغذات رکھ کر ان پر آگ لگا دی۔

    اس دوران ایک خاتون نے دھواں اُٹھتا ہوا دیکھ کر امام کو مطلع کیا، جنہوں نے جلتا ہوا قالین فوراً ہٹا دیا جس سے 1500 سال پرانی تاریخی مسجد کو بڑے نقصان سے بچا لیا گیا۔

    رپورٹس کے مطابق سیکیورٹی اہلکاروں نے موقع پر پہنچ کر ملزم کو گرفتار کرلیا۔

    سیکیورٹی ذرائع کا کہنا ہے کہ ملزم کے قبضے سے آتش گیر مواد بھی برآمد ہوا ہے، ملزم کو پولیس کے حوالے کر دیا گیا ہے اور تفتیش شروع کردی گئی ہے۔

    آیا صوفیہ: ڈیڑھ صدی پرانی چند تصاویر

    مذکورہ معاملہ سامے آنے کے بعد مسجد کی سیکیورٹی میں مزید اضافہ کردیا گیا ہے، تاکہ مستقبل میں ایسے کسی بھی ناخوشگوار واقعے سے محفوظ رہا جاسکے۔

  • لیجنڈز لیگ: پاکستان چیمپئنز کے مالک کا پی سی بی کی پابندی پر ردعمل سامنے آگیا

    لیجنڈز لیگ: پاکستان چیمپئنز کے مالک کا پی سی بی کی پابندی پر ردعمل سامنے آگیا

    کراچی: پاکستان کرکٹ بورڈ پی سی بی کی پابندی کو ورلڈ چیمپئن شپ آف لیجنڈز میں پاکستان چیمپئنز کے مالک مسترد کردیا۔

    پاکستان چیمپئنز کے مالک کامل خان سابق پاکستانی کپتان وقار یونس کے برادر نسبتی اور آسٹریلوی شہری ہیں، حال ہی میں پاکستان کرکٹ بورڈ پی سی بی کی جانب سے انگلینڈ میں کھیلی گئی ورلڈ چیمپئن شپ آف لیجنڈز میں پاکستانی کھلاڑیوں کی شرکت پر مکمل پابندی لگادی گئی ہے۔

    پاکستان چیمپئنز کے مالک کامل خان کا اس حوالے سے بات کرتے ہوئے کہنا تھا کہ میں نے رپورٹس دیکھیں کہ ہماری ٹیم کو سپورٹ نہیں کیا جائے گا، یہ بات کہاں سے آئی۔

    اُنہوں نے کہا کہ اگر ایسا پی سی بی نے کہا تو معلوم نہیں کہ وجہ کیا بنی، یہ ہماری ٹیم ہے اور میں اس کا مالک ہوں، یہ پاکستان کرکٹ بورڈ پی سی بی کی ٹیم نہیں ہے۔

    کامل خان نے کہا کہ کوئی بھی ہمیں اپنے ملک کا نام استعمال کرنے سے نہیں روک سکتا، ورلڈ چیمپئن شپ آف لیجنڈز میں پاکستانی پلیئرز کی شمولیت پاکستان کرکٹ بورڈ پی سی بی کی اجازت سے ہوئی، ہمیں اس حوالے سے بورڈ کی مکمل حمایت حاصل تھی۔

    لیجنڈز لیگ کے مالک نے پریزینٹر کو پرپوز کردیا، ویڈیو وائرل

    کامل خان کا مزید کہنا تھا کہ ایونٹ سے پہلے ہی این او سی بھی حاصل کیے گئے تھے، ہماری چیئرمین محسن نقوی سے مثبت میٹنگ ہوئی تھیں، ہم نے ٹیم کا نام ملک کی نمائندگی کیلیے منتخب کیا۔

    ہم نے پاکستان کرکٹ بورڈ پی سی بی کا لوگو یا اس کی کسی بھی قسم کی برانڈنگ کو استعمال نہیں کیا، صرف ان کے پلیئرز کی خدمات حاصل کیں اور وہ بھی اس وقت جب ہمیں اس کی آفیشل کلیئرنس مل چکی تھی۔

  • جاپان میں شدید گرمی، ایک ہی دن میں 2 نئے ریکارڈ قائم

    جاپان میں شدید گرمی، ایک ہی دن میں 2 نئے ریکارڈ قائم

    جاپان میں شدید گرمی کی لہر کا سلسلہ جاری ہے، ایک ہی دن میں درجہ حرارت کے 2 نئے ریکارڈ قائم ہوگئے۔

    غیر ملکی ذرائع ابلاغ کے مطابق جاپان میں درجہ حرارت 41.6 اور پھر 41.8 ڈگری سینٹی گریڈ تک جا پہنچا، محکمہ موسمیات نے آئندہ مزید گرمی کی وارننگ جاری کردی ہے۔

    خبر ایجنسی کے مطابق جنوبی گنما کے شہر ایسسا کی میں شدید گرمی نے تمام سابقہ ریکارڈ توڑ دیئے ہیں، 2020 اور 2018 میں جاپان میں 41.1 ڈگری سینٹی گریڈ درجہ حرارت ریکارڈ کیا گیا تھا۔

    محکمہ موسمیات کے مطابق گزشتہ ماہ جاپان کی تاریخ کاسب سے گرم مہینہ قرار دیا گیا، جولائی کا درجہ حرارت معمول سے 2.89 ڈگری زیادہ رہا۔

    کیوٹو میں درجہ حرارت 40 ڈگری تک پہنچ گیا ہے، جو 1880 سے اب تک کی بلند ترین سطح قرار دیا جا رہا ہے۔

    خبرایجنسی کے مطابق کیوٹو کے کسی بھی اسٹیشن پر اتنا درجہ حرارت پہلے کبھی ریکارڈ نہیں ہوا، گرم موسم کے باعث جاپانی چیری کے پھول وقت سے پہلے کھلنے لگے۔

    جاپان میں شدید گرمی کی نئی تاریخ رقم، درجہ حرارت بلند ترین سطح پر پہنچ گیا

    ماؤنٹ فیوجی کی برف دیر سے نمودارہوئی، نومبر تک برف کا نام و نشان نہ تھا، جاپان کے کئی علاقوں میں پانی کی قلت کی بھی اطلاعات ہیں، جس کے باعث کاشتکاروں کو چاول اگانے میں مشکلات کا سامنا ہے۔

    جاپان میں کم بارش اور شدید گرمی نے دھان کی کاشت بھی متاثرکردی ہے، مغربی جاپان میں مون سون 3 ہفتے پہلے ختم ہوگئی یہ بھی ایک ریکارڈ ہے۔

  • ٹرمپ کے نمائندہ خصوصی اسٹیو وٹکوف اہم دورے پر ماسکو پہنچ گئے

    ٹرمپ کے نمائندہ خصوصی اسٹیو وٹکوف اہم دورے پر ماسکو پہنچ گئے

    امریکی صدر ڈونلڈ ٹرمپ کے نمائندہ خصوصی اسٹیو وٹکوف ماسکو پہنچ گئے۔ روس کے سرمایہ کاری کے مندوب کیرل دمتری یوف نے وٹکاف کا استقبال کیا۔

    غیر ملکی ذرائع ابلاغ کے مطابق امریکی نمائندے اہم سفارتی امور پر روسی حکام سے ملاقاتیں کریں گے۔

    نیٹو میں امریکی سفیر میتھیو وِٹیکرکے مطابق اس دورے کا بنیادی مقصد یوکرین پرجاری تنازع کے حل کیلئے مذاکرات میں پیش رفت کی کوشش کرنا ہے۔

    نیٹو اتحادیوں کو امریکی ہتھیاروں کی فراہمی روس پردباؤ بڑھانے کی حکمت عملی کا حصہ ہے تاکہ ماسکو کو مذاکرات کی میز پر لایا جاسکے۔

    دوسری جانب روس کی جانب سے واضح کردیا گیا ہے کہ وہ زمین سے درمیانے اور کم فاصلے تک مار کرنیوالے میزائلوں کی تعیناتی پر حدود کے تعین کا مزید پابند نہیں ہے۔

    رپورٹ کے مطابق دعویٰ کیا گیا ہے کہ روس کے مطالبات کے باوجود نیٹو کی جانب سے اس معاہدے کی پابندی کی یقین دہانی نہیں کرائی جارہی۔

    روسی وزارت خارجہ کے مطابق ماسکو نے واشنگٹن کو اس معاملے پر بارہا خبردار کیا تھا مگر تمام انتباہ نظرانداز کردیے گئے۔

    روسی وزارت خارجہ نے دعویٰ کیا کہ امریکی ساختہ ایسے میزائل یورپ اور ایشیا و بحرالکاہل میں تعینات کرنے کی صورتحال پیدا کی جارہی ہے۔

    ’صدر ٹرمپ روسی تیل خریدنے والے ممالک سے خوش نہیں‘

    فریقین INF معاہدے کے تحت اس بات کے پابند ہیں کہ وہ زمین سے درمیانے اور کم فاصلے تک مار کرنیوالے بیلسٹک اور کروز میزائل نہ تیار کرسکتے ہیں نہ انکی تحقیقات کی جاسکتی ہے۔ ساتھ ہی ایسے میزائل تعینات بھی نہیں کیے جاسکتے۔

    رپورٹس کے مطابق درمیانے فاصلے کے میزائلوں کی رینج ایک ہزار ایک کلومیٹر سے پانچ ہزار پانچ سو کلومیٹر ہے جبکہ کم فاصلے کے میزائلوں کی رینج پانچ سو سے ایک ہزار کلومیٹر ہے۔ معاہدے پر دستخط کرنیوالے ممالک ان میزائلوں کے لانچرز بھی تیار نہیں کرسکتے۔

  • عمرہ زائرین کے لیے اہم ہدایت جاری

    عمرہ زائرین کے لیے اہم ہدایت جاری

    سعودی عرب میں مسجد الحرام اور مسجد نبوی صلی اللہ علیہ وآلہ وسلم کے امور کی جنرل اتھارٹی نے مسجد الحرام آنے والے عمرہ زائرین اور نمازیوں پر زور دیا ہے کہ وہ بارش کے دوران سیفٹی گائیڈ لائنز پر عمل کریں۔

    سعودی خبر رساں ادارے کی رپورٹ کے مطابق ان سیفٹی گائیڈ لائنز میں محفوظ ایریاز میں رہنا، چھتری کا استعمال، موسمیاتی الرٹ کی مانیٹرنگ، حکام کی ہدایات پر عمل، آسمانی بجلی گرنے پر موبائل فون بند کرنا شامل ہیں۔

    بیان کے مطابق کسی رپورٹ یا استفسار کے لیے ہیلپ لائن 1966 پر کال کرکے معلومات حاصل کی جاسکتی ہیں۔

    واضح رہے حرمین شریفین انتظامیہ کی جانب سے متعدد سرکاری اداروں کے تعاون سے مسجد الحرام میں بارش کے دوران ہنگامی سکیموں پر عمل درآمد کیا جاتا ہے۔

    دوران بارش کوشش کی جاتی ہے کہ عبادت کے دوران زائرین کی سلامتی کو یقینی بنایا جائے۔ جنرل اتھارٹی کی سیفٹی گائیڈ لائنز کا مقصد بھی زائرین کی سیفٹی کو یقینی بنانا ہے۔

    دوسری جانب اگر آپ جی سی سی ملک کے رہائشی ہیں اور سعودی عرب میں لیاوور کے ساتھ بین الاقوامی سفر کی منصوبہ بندی کر رہے ہیں تو اب آپ مفت اسٹاپ اوور ویزا سے فائدہ اٹھا سکتے ہیں جو آپ کو اپنے ٹرانزٹ کے دوران عمرہ کرنے کی اجازت دیتا ہے۔

    یہ ویزا سعودیہ ائیرلائنز اور فلائین کے ساتھ بکنگ کے ذریعے دستیاب ہے جو روحانی سفر کے ساتھ طویل فاصلے کے سفر کو یکجا کرنے کا ایک آسان طریقہ ہے۔

    سعودی ٹرانزٹ ویزا یا اسٹاپ اوور ویزا ایک خصوصی ویزا ہے جو مسافروں کو مملکت میں 96 گھنٹے (چار دن) تک رہنے کی اجازت دیتا ہے۔

    کون سے شہری کسی بھی وقت عمرہ ادا کر سکتے ہیں؟

    یہ سعودیہ ایئر لائنز یا فلائناس پر پرواز کرنے والے مسافروں کے لیے دستیاب ہے، اور اسے عمرہ اور زیارت جیسے مذہبی مقاصد کے لیے مکہ یا مدینہ جانے کے لیے استعمال کیا جا سکتا ہے۔

    ویزا مفت ہے تاہم صرف پروسیسنگ اور لازمی میڈیکل انشورنس کے لیے کم سے کم فیس رکھی گئی ہے۔

  • حماس نے غزہ سے متعلق اہم فیصلہ کرلیا

    حماس نے غزہ سے متعلق اہم فیصلہ کرلیا

    حماس کی جانب سے اہم فیصلہ کیا گیا ہے کہ آئندہ تشکیل دی جانے والی حکومتی انتظامیہ میں حصہ نہیں لیا جائے گا۔

    غیر ملکی ذرائع ابلاغ کے مطابق حماس رہنما نے نام ظاہر نہ کرنے کی شرط پر عرب ٹی وی کو انٹرویو میں دعویٰ کیا کہ حماس کو غزہ پٹی کی گزرگاہیں اور امدادی کارروائیوں کا کنٹرول سنبھالنے میں کوئی دلچسپی نہیں۔

    اُنہوں نے کہا کہ فلسطینیوں کی اپنی سرزمین سے بے دخلی روکنے کیلئے بین الاقوامی برادری کی کاوشوں کو سراہتے ہیں۔

    حماس رہنما کا کہنا تھا کہ فلسطینی عوام اور حماس پر بہت زیادہ دباؤ ہے، جنگ بندی کے لئے مثبت رویہ اختیار کرلیا گیا ہے۔

    حماس رہنماء نے کہا کہ اسرائیلی وزیر اعظم کی غزہ پٹی پر قبضے کی دھمکی اسرائیل کی بدنیتی کی عکاسی کرتی ہے، اسرائیلی یرغمالیوں کے اہلخانہ کے جذبات سے بخوبی آگاہ ہیں۔

    اُن کا مزید کہنا تھا کہ اسرائیلی یرغمالیوں کے اہلخانہ کو بھی یاد رکھنا چاہیے کہ ہر فلسطینی خاندان کا فرد اسرائیلی جیلوں میں قید ہے۔

    دوسری جانب نیتن یاہو کی جنگی کابینہ نے پورے غزہ میں فوجی کارروائی کی منظوری دے دی ہے۔ اسرائیلی میڈیا کے مطابق فیصلہ ہو چکا اب پیچھے نہیں ہٹیں گے اسرائیل پورے غزہ میں آپریشن کرے گا اگر اب کارروائی نہ کی تو یرغمالی بھوک سے مر جائیں گے۔

    ایران اسرائیل کشیدگی علاقائی جنگ میں بدل سکتی ہے، انٹیلی جنس رپورٹ

    نیتن یاہو نے اعلان کیا ہے کہ جنگی مقاصد سے پیچھے نہیں ہٹیں گے اور حماس کا خاتمہ کریں گے۔

    فلسطینی وزارت خارجہ کا کہنا ہے کہ عالمی برادری مداخلت کرے اسرائیلی جنگی کابینہ کا فیصلہ امن کیلئے خطرہ ہے قبضے کا منصوبہ سنجیدہ ہو یا آزمائشی دنیا کو اسے روکنا ہو گا۔

  • خواتین کرکٹرز کیلئے سینٹرل کنٹریکٹ 2025-26 کا اعلان

    خواتین کرکٹرز کیلئے سینٹرل کنٹریکٹ 2025-26 کا اعلان

    پاکستان کرکٹ بورڈ (پی سی بی) نے خواتین کرکٹرز کیلئے سینٹرل کنٹریکٹ 2025-26 کا اعلان کردیا۔

    خواتین ٹیم کی 20 کھلاڑیوں کو 5 کیٹیگریز میں کنٹریکٹس دیے گئے ہیں۔ ابھرتی ہوئی خواتین کرکٹرز کیلئے ایمرجنگ کیٹیگری متعارف کروائی گئی ہے۔

    آئی سی سی ٹی 20 رینکنگ کی نمبرون بولرسعدیہ اقبال کو کیٹیگری اے میں شامل کیا گیا ہے، نوجوان کرکٹرز ایمان فاطمہ اور شوال ذوالفقار کو ایمرجنگ کیٹیگری میں شامل کیا گیا ہے۔

    تمام کیٹیگریز میں کھلاڑیوں کے معاوضوں میں 50 فیصد اضافہ کردیا گیا ہے، کیٹیگری اے میں فاطمہ ثنا، منیبہ علی، سعدیہ اقبال، سدرہ امین شامل ہیں۔

    کیا بابر اعظم کی ٹی 20 اسکواڈ میں واپسی ہورہی ہے؟

    کیٹیگری بی میں عالیہ ریاض، ڈیانا بیگ، نشرا سندھو شامل ہیں، کیٹیگری سی کا کنٹریکٹ رامین شمیم کو دیا گیا ہے۔

    کیٹیگری ڈی میں گل فیروزہ، نجیہ علوی، ناتالیہ پرویز، عمائمہ سہیل شامل ہیں جبکہ سدرہ نواز، عروب شاہ، طوبیٰ حسن، ام ہانی، وحیدہ اختر بھی کیٹیگری ڈی میں شامل ہیں۔