کوہاٹ: وفاقی وزیر ریلوے خواجہ سعد رفیق نے کہا ہے کہ سیاست دشمنی کا نہیں اختلاف رائے کا نام ہے، جو سیاست میں دشمنی پالتا ہے وہ سیاسی کارکن نہیں ہے۔
ان خیالات کا اظہار انہوں نے کوہاٹ سے راولپنڈی تک ٹرین سروس کی افتتاحی تقریب سے خطاب کرتے ہوئے کیا۔ انہوں نے کہا کہ عمران خان سیاست میں نئے آئے ہیں انہیں اخلاقیات کا نہیں معلوم، اگر وہ سیاست میں رہے تو انہیں پتہ لگ جائے گا۔
سعد رفیق نے کہا کہ جو وعدے کئے وہ پورے کرنے کی کوشش کی، پہلے 16، 16 گھنٹے لوڈ شیڈنگ ہوتی تھی اب بہتر ہے۔
وفاقی وزیر ریلوے نے کہا کہ خیبر پختونخوا میں حکومت بناسکتے تھے لیکن پی ٹی آئی کو موقع دیا، وقت آگیا ہے کہ دھرنوں اور جلسوں کی سیاست سے آگے جائیں۔
انہوں نے کہا کہ گالی کا جواب گالی سے دینا بہادری نہیں، شیخ رشید اور عمران خان جو باتیں کرتے ہیں وہ ہم نے نہیں کرنی، ن لیگ کے جیالے ہیں ہم کسی کو گالی نہیں دیتے۔
سعد رفیق نے خیبرپختونخوا حکومت پر تنقید کرتے ہوئے کہا کہ کہتے ہیں ایک ارب درخت لگائے، وہ درخت کہاں ہیں؟
انہوں نے کہا کہ 70 سال بعد بھی بنیادی مسائل کو حل نہیں کرسکے، لوگ ووٹ اس لئے دیتے ہیں کہ مشکلات کا ازالہ کیا جائے، چین ہمارے دو سال بعد آزاد ہوا اور آسمانوں پر جاپہنچا، غربت ہمارا مقدر نہیں ہمیں بھی آگے بڑھنا ہے۔
