قاہرہ: مصرکی عدالت نے سابق صدرحسنی مبارک کو قتل اور بدعنوانی کے الزامات سے بری کردیا ہے۔ حسنی مبارک پردوہزارگیارہ میں حکومت مخالف مظاہرین کے قتل کا الزام تھا۔
غیرملکی خبرایجنسی کے مطابق سابق صدرحسنی مبارک کے علاوہ سابق وزیرداخلہ اور حسنی مبارک کے پانچ کمانڈوز کو بھی قتل کے الزامات سے بری کردیا گیا ہے۔
حسنی مبارک پرمالی بدعنوانی اوردوہزاگیارہ میں حکومت مخالف تحریک میں شریک افراد کے قتل کی سازش کے الزامات تھے۔
چھیاسی سالہ حسنی مبارک نے تمام الزامات کوبے بنیاد قراردیا تھا۔
لاہور: لاہور کے الیکشن ٹریبونل نے حلقہ این اے 122 دھاندلی کیس میں بیان ریکارڈ کرانے کے لیے تحریک انصاف کے چیئرمین عمران خان کو چھ دسمبر کو طلب کرلیا ہے۔
الیکشن ٹریبونل کے جج کاظم ملک نے کیس کی سماعت کی ہے۔ چھ گواہان نے اپنے بیانات ریکارڈ کرائے جس پر جرح مکمل کر لی گئی۔
عمران خان نے درخواست میں موقف اختیار کیا ہے کہ اسپیکر قومی اسمبلی سردار ایاز صادق نے دھاندلی سے حلقہ این اے ایک سوبائیس میں کامیابی حاصل کی لہذا الیکشن کالعدم قرار دیا جائے۔
اس سے پہلے سردار ایاز صادق نے الیکشن ٹریبونل کی کارروائی کے خلاف لاہور ہائیکورٹ میں درخواست دائر کررکھی تھی جس پر تیرہ ماہ تک الیکشن ٹریبونل کی کارروائی معطل رہی تاہم ہائیکورٹ کی جانب سے درخواست خارج کیے جانے کے بعد باقاعدہ سماعت کا آغاز کیا گیا تھا۔
اسلام آباد: روس نے پاکستان کو توانائی کے منصوبوں اور پاکستان اسٹیل ملز کی بحالی کیلئے دو ارب روپے کا قرضہ فراہم کرنے کی پیشکش کر دی ہے۔
روس نے توانائی کے منصوبوں کیلئے ایک ارب ڈالر قرضہ دینے کی پیشکش کی ہے۔ ان منصوبوں میں تیل اور گیس کی تلاش، تیرنے والے ایل این جی ٹرمینل کی تعمیر، گوادر سے نواب شاہ گیس پائپ لائن کی تعمیر اور ایل پی جی پراسیسنگ سمیت دیگر منصوبے شامل ہیں۔
روس کے اسٹیل سیکٹر نے پاکستان اسٹیل ملز کی بحالی میں دلچسپی ظاہر کی ہے اور ادارے کی بحالی کے لئے ایک ارب ڈالر کا قرضہ دینے کی پیشکش بھی کی ہے۔
وزیر خزانہ اسحاق ڈار نے کہا کہ حکومت اسٹیل ملز کے چھبیس فیصد شیئرز فروخت کرنا چاہتی ہے۔ روسی کمپنی قرضے کے بجائے اس کی نجکاری کے عمل میں حصہ لے۔
بنگلور: ورلڈ اسنوکر چیمپئین شپ کا فائنل پاکستان کے محمد سجاد اور چین کے یان بنگٹاؤ کے درمیان جاری ہے۔
ورلڈ اسنوکر چیمپئین کا ٹائٹل صرف ایک فتح کی دوری پر ہے۔ بنگلور میں جاری اسنوکر چیمپئین شپ میں پاکستان کے محمد سجاد کی عمدہ کارکردگی کا سلسلہ برقرار ہے۔
محمد سجاد نے سیمی فائنل میں چینی کیوئیسٹ کو تین کے مقابلے میں سات فریمز سے زیر کرتے ہوئے فائنل کھیلنے کا اعزاز حاصل کیا۔
محمد سجاد آئی بی ایس ایف کے فائنل میں پہنچنے والے چوتھے پاکستانی کھلاڑی ہیں۔ فائنل میں محمد سجاد اور چین کے یان بنگٹاؤ مدمقابل ہیں۔
اسلام آباد: وزیراعظم نااہلی کیس آٹھ دسمبر کو سماعت کے لئے لگا دیا گیا ہے، چیف جسٹس کی سربراہی میں ایک لارجر بینچ دلائل سُنے گا۔
وزیراعظم نواز شریف کی نااہلی سے متعلق دائر مختلف درخواستوں کی سماعت کیلئے سات رکنی لارجربینچ چند روز پہلے تشکیل دیا گیا تھا۔
سپریم کورٹ کے تین رکنی بینچ نے آرٹیکل باسٹھ تریسٹھ کی تشریح کے لئے یہ کیس چیف جسٹس کو ارسال کیا تھا۔ اسی طرح سانحہ کوٹ رادھا کشن میں مسیحی جوڑے کو زندہ جلائے جانے پر ازخود نوٹس کی سماعت کے لئے بھی تین رکنی بینچ بنادیاہے جوسولہ دسمبرسے کارروائی کا آغازکرےگا۔
پشاور: متحدہ علما مشائخ کونسل نے کہا ہے کہ وزیراعظم اور وزیرداخلہ نے میر شکیل کو حکومتی پروٹوکل میں فرار کرایا ہے۔
جیو کیخلاف متحدہ علماومشائخ کونسل کا اجلاس آج پشاور میں ہوا جس میں ایک اعلامیہ تیار کیا گیا ہے۔ اعلامیےمیں کہا گیا ہے کہ میرشکیل کا حکومتی پروٹوکول میں فرار ہونا قانون کی خلاف ورزی ہے، جس پر سپریم کو رٹ سوموٹو ایکشن لے۔
متحدہ علماومشائخ نےمطالبہ کیا کہ میرشکیل، شائستہ لودھی، وینا ملک اور اسد خٹک کی جائیدادفوری طور پر ضبط کی جائے، کونسل کےاجلاس میں عدالتی احکامات کے باوجود جیوکیخلاف کارروائی نہ کرنے پر احتجاجی تحریک کااعلان بھی کیا گیا ہے۔
متحدہ علما مشائخ کونسل جمعرات کوجیو کیخلاف مظاہرہ بھی کرے گی۔
سکھر: ڈاکٹرخالدسومروچھبیس سال تک جمیعت علمائےاسلام کے جنرل سیکریٹری کے عہدے پر فائز رہے۔ خالد محمود سومرو پر حملے کی ابتدائی رپورٹ تیار کرلی گئی ہے۔
لاڑکانہ سے تعلق رکھنے والےجمعت علمائے اسلام کے رہنما ڈاکٹر خالد سومرو پر چار بار قاتلانہ حملے ہو ئے تاہم وہ محفوظ رہے،آخری بار کچھ عرصے قبل رتوڈیرو میں بھی قتل کرنے کی کوشش کی گئی تھی۔
ڈاکٹر خالدسومرو دوہزار چھ میں پہلی بارسینیٹر منتخب ہوئےاورمختلف کمیٹیوں میں شامل رہے۔ ڈاکٹرخالد محمود کا سندھ کی سیاست میں اہم کرداررہا ہے۔
خالدمحمود اعلی تعلیم یافتہ ڈاکٹر تھے، انھوں نے چانڈ کا میڈیکل کالج سے ایم بی بی ایس کرنے بعد ہاؤس جاب بھی کی تھی۔ اسلامی کلچر میں سندھ یویورسٹی جامشورو سے ماسٹرز اور دینی تعلیم کی ڈگریاں وفاق المدارس العربیہ سے حاصل کیں۔
ڈاکٹر خالد نےجامعۃ الاظہرمصر سےبھی کورس کئےتھے، وہ بیس سال تک لاڑکانہ کی جامع مسجد صدیق اکبر میں امام و خطیب کے ذمہ داریاں نبھاتے رہے۔ سندھ میں جے یوآئی کےجلسوں کے تمام انتظامات بھی وہی کرتے۔
خالد محمود سومرو پر حملے کی ابتدائی رپورٹ تیار کرلی گئی ہے، چار حملہ آور سفید کلر کی کرولا کار میں سوار تھے جو بلوچی زبان میں بات کر رہے تھے۔
اسلام آباد: ملک میں تبدیلی کی خواہش مند تحریک انصاف ایک بار پھر اسلام آباد میں سیاسی طاقت کا مظاہرہ کرے گی۔ پی ٹی آئی کے جلسے کی تیاریاں عروج پرپہنچ گئی۔
اسلام آباد میں تیس نومبر کو پی ٹی آئی کے تاریخی جلسے میں ایک روز باقی ہے۔ ایکسپریس چوک پر تحریک انصاف کے جلسے کی تیاریاں زور و شور سے جاری ہیں۔
پی ٹی آئی کے جلسہ گاہ میں دو اسٹیج بنائے جائینگے۔ اسٹیج بنانے کے لیے کئی کنٹینروں کا استعمال کیا جارہا ہے۔ ڈی چوک میں پی ٹی آئی کے متوالوں کا جذبہ دیدنی ہے۔
پارٹی کے منچلے کارکنان عوام میں جوش پیدا کرنے کے لیے جلسہ گاہ کو سجانے میں مصروف ہیں۔ عوام کی دلچسپی کیلئے جلسہ گاہ کے اطراف میں پارٹی کیپس اور بیجیز کی فروخت کیلئے اسٹالز بھی لگائے جائینگے۔ جلسے کیلئے سیکورٹی کے سخت انتظامات کئےگئے ہیں۔
کراچی: سابق صدرآصف زرداری اور چیئر مین پیپلز پارٹی بلاول بھٹو زرداری نے جے یو آئی فے کے صوبائی رہنما اور سابق سنیئٹر خالد محمود سومرو کے قتل پرافسوس کااظہار کیا ہے۔
سابق صدر آصف زرداری نے ایک بیان میں جے یو آئی ف کے رہنما ڈاکٹر خالد محمود کے قتل کی مذمت کی ہے۔ اپنے بیان میں انھوں نے کہا کہ خالدسومرو کے قتل سے حوصلے پست نہیں ہونگے۔
آصف علی زرداری نے وزیراعلیٰ سندھ سید قائم علی شاہ سے ٹیلیفون پر بات کی اور قاتلوں کی گرفتاری پر زور دیا ہے، پیپلز پارٹی کے چیئرمین بلاول بھٹو زرداری نے بھی ڈاکٹر خالدسومرو کےقتل کی مذمت کرتے ہوئے افسوس کا اظہار کیا ہے۔
ژوب: ژوب میں فرنٹیئر کور کے زیر اہتمام 334 ریکروٹس کی تربیت مکمل ہونے پر پاسنگ آوٹ پریڈ کا اہتمام کیا گیا ہے، جس میں ریکروٹس نے تربیت کا عملی مظاہرہ بھی کیا ہے۔
اس موقع پر ریکروٹس نے تربیت کا عملی مظاہرہ کیا اور دفاع وطن کیلئے دشمن کے مقابلے اور حکومت کے وفادار رہنے کا حلف بھی لیا۔
تقریب سے خطاب کرتے ہوئے مہمان خصوصی کرنل سید طارق رسول نے کہا کہ ریکروٹس کو دی ہوئی تربیت رہنمائی کے ساتھ بہادر سپاہی بننے میں معاون ثابت ہو گی۔ انھوں نے مزید کہا کہ ہم بنیادی طور پر اسلام کے اور پاکستان کے سپاہی ہے اور ہمارے دل اور دماغ اسلام کی تعلیم سے منور ہے، ہمیں ہر موڑ پر اللہ تعالیٰ سے مدد اورنصرت مانگنی چائیے۔
شہادت کے جذبے سے سرشار تربیت مکمل کرنے والے ریکروٹس کا کہنا ہے کہ ملک و قوم کی دفاع کیلئے کسی قسم کی قربانی دینے سے دریغ نہیں کرینگے۔ ان کا مزید کہا کہ جو بھی ملک کے اندر مسئلے و مسائل یا کوئی ایسی قسم کے حالات آ جائیگے تو انکو ختم اور قابو کرنے کیلئے ہم سارے چیزوں ساری قربانیوں کیلئے تیا ر ہے۔
مہمان خصوصی نے ریکروٹس سے سلامی لی اور دوران تربیت بہترین کارکردگی کا مظاہرہ کرنے والوں ریکروٹس میں انعامات اور ٹرافیاں تقسیم کئے۔