کراچی: کراچی میں رات گئے فائرنگ کے واقعات میں متحدہ قومی موومنٹ کے کارکنان سمیت چار افراد جاں بحق ہوگئے ہے جبکہ ماڑی پور سے پولیس نے دو ڈاکوؤں کو گرفتار کرکے اسلحہ برآمد کرلیا ہے۔
تفصیلات کے مطابق اورنگی ٹاؤن چشتی نگر میں فائرنگ سے متحدہ قومی موومنٹ کے دو کارکنان جاں بحق ہوگئے، جن کی شناخت شہباز اور شاہد کے ناموں سے ہوئی ہے۔ متحدہ قومی موومنٹ کی جانب سے واقعے کی شدید الفاظ میں مذمت کی گئی ہے اور ہلاک ہونے والے دو نوں افراد کی نعشوں کو عباسی شہید اسپتال منتقل کیا گیا، جہاں متحدہ قومی موومنٹ کے ممبران صوبائی اسمبلی پہنچے اور لواحقین سے تعزیت کی۔
نیو کراچی بلال کالونی میں نامعلوم افراد کار سے ایک شخص کی لاش پھینک کر فرار ہوگئے، مقتول کے پاس سے نقد رقم اور موبائل فون برآمد ہوا، پولیس نے لاش کو کاروائی کیلئے اسپتال منتقل کردیا اور واقعے کی تفتیش کا آغاز کردیا ہے۔
ادھر کورنگی عوامی کالونی میں فائرنگ سے ایک شخص ہلاک ہوگیا، مقتول کی لاش کو ضابطے کی کاورائی کیلئے پولیس نے اسپتال منتقل کیا اور تفتیش شروع کر دی ہے۔
دوسری جانب ماڑی پور میں پولیس نے مبینہ مقابلے کے بعد دو ڈاکوؤں کو گرفتار کرکے اسلحہ برآمد کرلیا ہے۔
