لندن: برطانوی یونیورسٹیوں میں ٹیوشن فیس میں اضافے کے خلاف ہزاروں طالب علموں نے لندن کی سڑکوں پرمظاہرہ کیا ہے۔
برطانوی میڈیا کے مطابق احتجاج کرنے والے طالب علموں نے ہاتھوں میں پلے کارڈز اٹھا رکھے تھے اوروہ حکومت کے خلاف نعرے لگا رہے تھے۔ مظاہرین کا مطالبہ تھا کہ فیسوں میں اضافے، تعلیمی وظیفوں میں کمی کا فیصلہ واپس لیا جائے۔
اس موقع پرطالبعلموں اورپولیس میں جھڑپیں بھی ہوئیں ہے اور پولیس نے گیارہ طلبا کوگرفتارکرلیا ہے۔ برطانوی یونیورسٹیوں میں ٹیوشن فیس نو ہزارپاؤنڈ کردی گئی ہے۔
لاہور: لاہور ہائیکورٹ نے گلوبٹ کی درخواست ضمانت کی سماعت ستائیس نومبر تک ملتوی کرتے ہوئے سزا کیخلاف اپیل اور درخواست ضمانت یکجا کرنے کا حکم دے دیا ہے۔
لاہور ہائی کورٹ کے جسٹس عبدالسمیع خان اور جسٹس صداقت علی خان پر مشتمل دو رکنی بنچ نے آج کیس کی سماعت کی۔ گلوبٹ نے عدالت میں کہا کہ اس نے انسداد دہشت گردی کی عدالت سے سنائی گئی سزا کے خلاف لاہور ہائیکورٹ میں اپیل دائر کررکھی ہے جب تک اپیل کا فیصلہ نہیں ہوتا عدالت سزا معطل کرکے اسے ضمانت پر رہا کرنے کا حکم جاری کر دے۔
عدالت نے سماعت ستائیس نومبرتک ملتوی کرتے ہوئے ہدایت کی کہ گلو بٹ کی اپیل اور درخواست ضمانت کو یکجا کرکے سماعت کیلئے پیش کیا جائے۔ گلو بٹ کوا نسداددہشت گردی کی عدالت نےگیارہ سال قید اور ایک لاکھ جرمانے کی سزا سنائی ہے۔
کوئٹہ: سبی میں گیارہ نومبر کو بچوں سمیت قتل ہونے والے انجنیئر کے قاتلوں کی عدم گرفتاری کے خلاف اُس کے ورثاء نے کوئٹہ میں وزیراعلیٰ ہاوس کے قریب احتجاج کیا ہے۔،
تفصیلات کے مطابق محکمہ بلدیات کے اسسٹنٹ انجنیئر معراج علی عمرانی اور اُن کے پانچوں کو اُس وقت فائرنگ کرکے قتل کیا گیا تھا جب وہ ڈیرہ مراد جمالی سے کوئٹہ آرہے تھے۔
واقعے کے خلاف اُن کے ورثاء نے بدھ کو صوبائی دارلحکومت کوئٹہ میں احتجاج کرتے ہوئے وزیراعلیٰ ہاوس جانے کی کوشش کی تاہم پولیس نے مظاہرین کو فیاض سمبل چوک پر روک لیا۔ اس دوران مظاہرین نے نعرہ بازی کی، مظاہرے میں معصوم بچوں اور بچیوں نے بھی شرکت کی۔
معراج عمرانی کے ورثاء کا کہنا تھا کہ اُن کے ساتھ بہت بڑا ظلم ہوا ہے لیکن انتظامیہ اور حکومت اس معاملے پر خاموش تماشائی بنی ہوئیں ہیں۔ معصوم مظاہرین نے مقتول بچوں کی تصاویر اٹھا رکھی تھیں۔ مظاہرین نے وزیراعلیٰ اور گورنر بلوچستان سے مطالبہ کیا ہے کہ معصوم بچوں کے قاتلوں کو گرفتار کیا جائے۔
لاہور: پاکستان عوامی تحریک کے رہنما ڈاکٹر طاہر القادری وطن واپس پہنطے تو کاکنوں نے ان کا والہانہ استقبال کیا، اس موقع پر لاہور ائیر پورٹ پر سیکیورٹی کے سخت ترین انتظامات کئے گئے تھے۔ طاہر القادری لاہور ائیر پورٹ سے قافلے کی شکل میں داتا دربار کی جانب سے روانہ ہو گئے ہیں۔
اٹھائیس اکتوبر کو کینیڈا اور مختلف ممالک کے دورے کے بعد ڈاکٹر طاہر القادری آج وطن واپس پہنچ گئے ہیں۔ ناقدین کی جانب سے عوامی تحریک کے رہنما پر پاکستان آمد کے حوالے سے دی جانے والی آرا کو انھوں نے غلط ثابت کردیا ہے جبکہ طاہر القادری کی پاکستان آمد کے سلسلے میں بھی مختلف اداروں نے سیکیورٹی خدشات کا اظہار کیا تھا تاہم وہ ان سب کے باوجود پاکستان پہنچ گئئے ہیں۔
طاہر القادری جب لاہور ائیر پورٹ پر اُترے تو عوامی تحریک کے راہنماوں نے ان کا پر تپاک استقبال کیا جبکہ طاہر القادری کی پاکستان آمد پر عوامی تحریک کے کارکنوں کی خوشی دیدنی تھی۔ طاہر القاردری جب ائیر پورٹ سے باہر آئے تو کارکنوں نے ان کا شاندار استقبال کیا اور ان کے حق میں نعرے بھی لگائے، نعروں کے جواب میں عوامی تحریک کے رہنما نے ہاتھ ہلا کر جواب دیا۔ طاہر القادری کے استقبال کیلئے کارکنوں کی بڑی تعداد ائیر پورٹ پر موجود تھی جس میں بڑی تعداد میں عورتیں اوربچے بھی شامل تھے۔
ترجمان پی اے ٹی کے مطابق ڈاکٹر طاہر لقادری کو لاہور ایئر پورٹ سے جلوس کی شکل میں رنگ روڈ، ہربنس پورہ، مغل پورہ، صدر گول چکر، دھرم پورہ، مال روڈ، ناصر باغ سے ہوتے ہوئے داتا دربار لایا جائیگا پھر وہ داتا دربار سے منہاج القرآن سیکریٹریٹ ماڈل ٹاؤن پہنچیں گے۔ڈاکٹر طاہر لقادری کی آمد پر منہاج القرآن اور پی اے ٹی کے کارکنان ایئر پورٹ، درتا دربار اور ماڈل ٹاؤن پہنچنا شروع ہوگئے ہیں۔
ڈاکٹرطاہرالقادری نے پاکستان پہنچنےکےبعداےآروائی نیوزسےخصوصی گفتگومیں کہا کہ وہ حکومت کی بنائی گئی جے آئی ٹی کو مسترد کرتے ہیں۔ انھوں نے کہا کہ جے آئی ٹی محض قاتلوں کو تحفظ دینےکےلئے بنائی گئی۔ انھوں نے کہا کہ شہیدوں کےخون کا قانون کےمطابق بدلہ لیاجائیگا۔ علامہ طاہرالقادری نے مزید کہا کہ جس جےآئی ٹی میں پنجاب پولیس کاافسرشامل ہووہ قبول نہیں کریں گے۔ سانحہ ماڈل ٹاؤن پر ٹریبونل رپورٹ کو چھپایا جانا ظاہر کرتا ہے کہ دال میں کچھ کالا ہے۔ ڈاکٹر طاہر القادری کا کہنا تھا کہ جس رپورٹ میں ورثا اور گواہان کو ہی شامل نہ کیاجائے اس کی اہمیت کیا ہوگی؟ طاہر القادری نے حکومت کو مخاطب کر کے کہاکہ وہ ان سے خوف زدہ نہ ہوں۔
بعد ازاں عوامی تحریک کے سربراہ طاہر القادری اپنے کارکنوں کے ساتھ جلوس کی شکل میں داتا دربار کیلئے روانہ ہو گئے۔ طاہر القادری کی آمد پر پنجاب حکومت کی جانب سے سخت سیکیورٹی انتظامات کئے گئے ہیں۔
حیدرآباد: حیدرآباد میں پانی و بجلی کے وزیر عابد شیر علی نے عوام کے مسائل سننے کے لئے کھلی کچہری لگائی مگر جب کچہری شروع ہو ئی تو شور اور بدنظمی کا شکار ہوگئی۔ وفاقی وزیر نے واپس جانے میں ہی عافیت جانی۔
تفصیلات کے مطابق حیدرآباد میں وفاقی وزیر عابد شیر علی نے عوامی مسائل کو سننے کیلئے کھلی کچہری لگائی تھی ۔ وفاقی وزیر آئے تو عوامی مسائل سننے کے لئے تھے تاہم عوام انہیں سننے کے لئے تیار نہیں تھی۔ بے بناہ بد نظمی کے باعث تنگ آکر عابد شیر علی کچہری سے جانے لگے تاہم کچھ خیال آیا اور واپس پنڈال میں آگئے۔
سائلین نے بجلی کے بلوں پر ایسی بھڑاس نکالی کہ وزیر کو کھری کھری سنا دیں۔ عابد شیر علی نے یقین دلایا، سمجھایا اور حکم نامے بھی جاری کئے تاہم سائلین نا مانوں کی رٹ لگاتے رہے۔
عابد شیر بجلی کو سائلین اضافی بلوں اور علاقائی نمائندوں کے ہاتھوں رشوت سے تنگی کی شکایت بھی سناتے رہے اور اس حوالے سے دی جانے والی تسلیوں پر وفاقی وزیر پر برستے بھی رہے۔ کھلی کچھری میں عابد شیر علی کی پریشانی کے ساتھ شوراور بدنظمی بھی عروج پر رہی جو کہ دیدنی تھی۔
اس موقع پر سائلین گو نواز گو کے نعرے بھی لگاتے رہے۔
پشاور: خیبر پختونخواہ کرائم شیٹ پر بھتہ خواری میں پہلے نمبر پر آگیا ہے۔ رواں سال بھتہ خوری کے 285 واقعات رپورٹ ہوئے ہیں۔ خیبر پختونخواہ پولیس فورس کے لیے بھتہ خوری پڑا چیلنج بن گیا ہے۔
خیبر پختونخواہ پولیس کرائم شیٹ کے مطابق کے پی کے بھتہ خوری میں پہلے نمبر پر آگیا ہے اور پولیس فورس بھتہ خوری کو کنٹرول کرنے میں ناکام رہی ہے۔ سنٹرل پولیس آفس میں تیار ہونے والی رپورٹ لے مطابق رواں سال بھتہ خوری کے 285 واقعات نے قانوں نافز کرنے والوں کی کار کردی کو چیلنج کر دیا ہے۔
گزشہ سال کی نسبت رواں سال بھتہ خوری واقعات میں 200فی صد اضافہ ہوا ہے، رپورٹ کے مطابق بھتہ خوری واقعات میں دارلحکومت پشاور میں 162 کیسسز رجسٹرڈ ہوئے ہیں جبکہ چارسدہ میں 23، صوابی میں 12 اور ہنگو میں 10 کیسسز رجسٹرڈ ہوئے جبکہ صوبے کے دیگر 13 اضلاع میں بھتہ خوری کے واقعات رپورٹ ہوئے ہیں۔
پولیس رپورٹ کے مطابق بھتہ خوری کے کئی واقعات ایسے بھی ہیں جو شہریوں نے خوف کے باعث ایف آئی آر درج نہیں کروائی ہے۔ جس کی وجہ سے انکی تعداد رپورٹ میں شامل نہیں کی جا سکی ہے۔ بھتہ خوری کے بڑھتے ہوئے واقعات کے پیش نظر کاونٹر ٹیرارزم ڈیپاٹمنٹ کو بھی مزکورہ رپورٹ فرائم کی گئی تھی تاہم پھر بھی کی ان واقعات میں کمی نہ ہو سکی۔
حیدرآباد: حیدرآباد میں میکینک اور اس کی اہلیہ نے کم عمرلڑکے کو بد ترین تشدد کانشانہ بنایا ہے۔ متاثرہ بچے نے حیدر آباد پریس کلب کے سامنے احتجاج کیا ہے اور میکنک، اسکی اہلیہ اور بچوں کیخلاف کارروائی کامطالبہ کیا ہے۔
تفصیلات کے مطابق میکینک اور اس کی اہلیہ بدترین تشدد کی داستان سنانے والا کم عمر بچہ حیدرآباد پریس کلب کے سامنے اپنے زخموں کی دادرسی کے لئے لوگوں کو پکارتا رہا اور اس بچے کا نام ہے سبحان۔
دس ماہ قبل اس کا چچا اسے ورکشاپ پر ملازمت کیلئے چھوڑ کر گیا تھا۔ جہاں اس کی رہائش ورکشاپ کے مالک استاد شریف کے گھرہی میں تھی۔ متاثرہ بچے کا کہنا ہے کہ استاد شریف کے بیٹے اس کو بد فعلی کا نشانہ بناتے جس کی شکایت گزشتہ روز اس نے استاد شریف اور اس کی اہلیہ سے کی تو دونوں نے مشتعل ہوکر لوہے کی چین اور بیلٹ سے اس پر بدترین تشدد کیا اور گھر سے نکال دیا ہے۔
متاثرہ بچے نے حکام بالا سے درخواست کی ہے کہ اس کے ساتھ بدفعلی اور تشدد کا نشانہ بنانے والوں کے خلاف کاروائی کرکے اسے انصاف دلایا جائے۔ احتجاج کے بعد متاثرہ بچے کو طبی امداد کیلئے اسپتال منتقل کردیا گیا ہے۔
اسلام آباد: سپریم کورٹ آف پاکستان نے نواز شریف کےخلاف دائر توہین عدالت کی درخواست خارج کردی ہے۔ درخواست ایم کیو ایم کی جانب سے دائر کی گئی تھی۔
تفصیلات کے مطابق سپریم کورٹ آف پاکستان کی جانب سے آج نواز شریف کےخلاف دائر توہین عدالت کی درخواست خارج کردی ہے۔ مزکورہ درخواست انیس سو ننانوے میں متحدہ قومی موومنٹ کی جانب سے دائر کی گئی تھی۔
ایم کیو ایم نے فوجی عدالتیں قائم کرنے پراُس وقت کے وزیر اعظم میاں نواز شریف کے خلاف توہین عدالت کی درخواست دائر کی تھی۔ سپریم کورٹ نے عدم پیروی پر درخواست خارج کردی ہے۔
سرگودھا: سرگودھا کے ڈسٹرکٹ اسپتال میں آٹھ بچوں کی ہلاکت کے حوالے ایم ایس نے انکوائری ٹیم تشکیل دے دی ہے۔ ہلاک ہو نے والے بچوں کے والدین نے الزام عائد کیا ہے کہ عملے کی غفلت اور ڈاکٹرز کی عدم موجودگی نے بچوں کی جان لے لی ہے۔
تفصیلات کے مطابق سرگودھا ڈسٹرکٹ ٹیچنگ اسپتال کے بچہ وارڈ میں ڈاکٹرزکی عدم دستیابی اور عملے کی غفلت کے باعث پانچ سے زائد بچے دم توڑگئے ہیں۔
والدین اور لواحقین نے الزام عائد کیا ہے کہ بچوں کی موت کا ذمہ دارہسپتال کا عملہ ہے۔ والدین کا کہنا ہے کہ وارڈ میں موجود عملہ تعاون کے بجائے بدتمیزی کرتا ہے۔
ادھر عملے نے ہلاکتوں کی تصدیق کرنے اوراپنا موقف دینے سے انکار کردیا ہے جبکہ سرگودھا کے ڈسٹرکٹ اسپتال میں پانچ بچوں کی ہلاکت کے حوالے ایم ایس نے انکوائری ٹیم تشکیل دے دی ہے۔
کراچی: محکمہ تعلیم سندھ نے صو بے بھر میں گھوسٹ اساتذہ کے خلاف کارروائی کرتے ہو ئے پہلے مرحلے میں وزیر اعلی سندھ کے حلقہ انتخاب خیر پور کے77اساتذہ کو معطل کردیا ہے جبکہ آئندہ چند روز میں کئی ہزار گھوسٹ اساتذہ کو معطل کیا جائے گا۔
حکمرانوں کے تعلیم کے بارے میں غیر سنجیدہ رویئے کا اندازہ اس با ت سے لگا یا جا سکتا ہے ملک بھر میں ایسے اساتذہ موجود ہیں جو تنخواہ تو لیتے ہیں لیکن اسکو ل نہیں جا تے ہیں۔ محکمہ تعلیم سندھ کی جانب سے وزیراعلی قائم علی شاہ کے آبائی حلقے میں ستتر ایسے اساتذہ کو نوٹس جاری کئے گئے ہیں جو گھو سٹ ہیں۔ اسی طرح کی مہم ماضی میں ملک کے تمام صوبوں میں چلتی رہی ہیں لیکن سیاست اور طاقت کے ہتھیا روں سے لیس گھوسٹ اساتذہ کیخلاف کارروائی کے بجا ئے انہیں ترقیوں سے نوازا جاتا رہا ہے۔
اب دیکھنا یہ ہے صو بہ سندھ میں چلنے والی حالیہ کارروائی کا کو ئی نتیجہ برآمد ہو تا ہے یا یہ مہم بھی محکمہ پولیس کی ہتھیاروں کی برآمد گی مہم کی مانند اپنی موت آپ مرجاتی ہے۔