خیبر ایجنسی: خیبر ایجنسی میں جاری فوجی آپریشن میں تیزی کے بعد باڑہ میں کالعدم لشکر اسلام کے اہم کمانڈروں سمیت کئی شد ت پسندوں نے ہتھیار ڈال دیئے۔
تفصیلات کے مطابق خیبر ایجنسی میں پاکستان فوج کی جانب سے آپریشن تیزی سے جاری ہے اور پاک فوج علا قے میں موجود شدت پسندوں کے خلاف زمینی اور فزائی کاروائیاں کر رہی ہے جس میں سیکٹروں شدت پسند ہلاک اور گرفتار ہو ئے ہیں۔
سیکیورٹی ذرائع کے مطابق خیبر ایجنسی میں کالعدم لشکر اسلام سے منحرف ہونیوالے سابق امیر نےباڑہ کےکئی علاقوں پر اپنا کنڑول حاصل کر لیا ہے۔
لاہور: امیر جماعت اسلامی سراج الحق کہتے ہے کہ کوٹ رادھا کشن واقعےسےملک اوراسلام کی بدنامی ہوئی، کسی بھی فرد کو سزا خود نافذ کرنے کا اختیار نہیں ہے۔
جماعت اسلامی کے امیر سراج الحق نے کہا ہے کہ تحریک انصاف اور حکومت کو دھرنا ختم کرنے کے لیے مذاکرات کرنے چاہئیںجوڈیشل کمیشن میں ایجنسیوں کی شمولیت پر بات چیت ہوسکتی ہے۔ لاہور ہائی کورٹ بار ایسوسی ایشن سے خطاب کرتے ہوئے سراج الحق کا کہنا تھا کہ جوڈیشل کمیشن کی تشکیل کے لیے سپریم کورٹ پر اعتماد مثبت پیش رفت ہے۔
سراج الحق نے کہا کہ کچھ لوگ اسلام آباد دھرنے سے لاشیں چاہتے تھے اور آئین کو ختم کرنا چاہتے تھے مگر ہماری کوششوں سے سب ناکام ہوا۔ امیر جماعت اسلامی نے کوٹ رادھا کشن واقعے کو افسوسناک قرار دیتے ہوئے کہا کہ یہ واقعہ پاکستان کی بدنامی کا باعث بنا جس سےدشمنوں کو پراپیگنڈہ کرنےکا موقع ملا، پاکستان کو اخلاقیات برآمد کرنا تھیں مگر اب ہمیں دہشتگردی اور پولیوبرآمد کرنے والا سمجھا جارہا ہے۔
انہوں نے کہا کہ پاکستان کو اسلامی اور خوشحال ریاست بنانا چاہتے ہیں جہاں عام آدمی کا پارلیمنٹ میں پہنچنا مشکل ہے۔ سراج الحق کا کہنا تھا کہ پاکستان میں سیاست کو تجارت کے طور کیا جارہا ہے۔ انھوں نے کہا کہ ان پڑھ لوگ وزیر تعلیم اور بسوں کے ڈارئیور اور کنڈیکٹر وزیر صحت لگادیے جاتے ہیں۔
لاہور: پاکستان تحریک انصاف کی جانب سے روز بروز حکومت کے خلاف بیان داغے جانے سے مسلم لیگ نون کے رہنماوں کی بے چینی بڑھتی جارہی ہے۔ مسلم لیگ نواز کے رہنما عابدشیر علی پی ٹی آئی کے خلاف ایک بار پھر میدان میں آگئے اور زبانی حملے شروع کر دیئے ہیں۔
عابد شیر علی نے اپنے ایک بیان میں پی ٹی آئی پر الزامات لگاتے ہو ئے کہا کہ کےپی کےمیں ٹھیکےجہانگیرترین کودیئے جارہے ہیں۔ انھوں نے پی ٹی آئی کو شدید تنقید کا نشانہ بناتے ہو ئے کہا کہ عمران خان کے پاس کے پی کے میں دھرنوں کے لیے تو فنڈز ہیں لیکن آئی ڈی پیز کےلیے نہیں۔
مسلم لیگ ن کے رہنما عابد شیر علی کا کہنا ہے کہ عمران خان نے ایک بار پھر فوج کو سیاست میں گھسیٹنے کی کوشش کی ہے۔ مسلم لیگ کے رہنما نے مزید کہا کہ عمران خان ہم پر تنقید کرنے سے پہلے اپنے ارد گرد دیکھ لیں عمران خان کے ساتھ جو لوگ کھڑے ہیں وہ سب کرپٹ ہیں۔
کوئٹہ: سپریم کورٹ کے تین رکنی بنچ نے وزیراعظم کی نااہلی سے متعلق درخواست چیف جسٹس پاکستان جسٹس ناصر الملک کو مزید احکامات کے لئے ریفر کرتے ہوئے اس قسم کی دیگر درخواستوں کو یکجا کرکے سماعت کیلئے لارجر بنچ تشکیل دینے کی سفارش کردی ہے۔
سپریم کورٹ کوئٹہ رجسٹری میں قائمقام چیف جسٹس جسٹس جواد ایس خواجہ کی سربراہی میں تین رکنی بنچ نے وزیراعظم نواز شریف کی نااہلی سے متعلق گوہر نواز سندھو و دیگر کی آئینی درخواستوں کی سماعت کی۔ اٹارنی جنرل آف پاکستان اور درخواست گزار گوہر نواز سندھوعدالت میں پیش ہوئے۔
قائمقام چیف جسٹس جسٹس جواد ایس خواجہ نے ریمارکس دیتے ہوئے کہا کہ یہ مقدمہ امتحانی پرچہ ہے، اس میں آئینی سوالات اٹھے ہیں جن پر فیصلہ دینا ضروری ہوگیا ہے۔ تین رکنی بنچ نے سینئر وکلاءاور آئینی ماہرین رضا ربانی‘ حامد خان اور خواجہ حارث کو عدالت کا معاون مقرر کرتے ہوئے کیس مزید احکامات کے لئے چیف جسٹس آف پاکستان کو پیش کرنے کا حکم دے دیا اور سفارش کی کہ اس قسم کے دیگر مقدمات کو یکجا کرکے لارجر بنچ تشکیل دیا جائے تاکہ الگ الگ فیصلوں سے کوئی ابہام پیدا ہونے کی گنجائش نہ ہو۔
وزیراعظم نااہلی کیس کی سماعت جب آج سپریم کورٹ کوئٹہ رجسٹری میں شروع ہوئی تو بینچ نے اپنے ریمارکس میں کہا ہے کہ وہ کسی کو بھی اس کیس میں بلا سکتے ہیں۔ جسٹس جواد نے کہا کہ آرٹیکل باسٹھ تریسٹھ کا جائزہ لینا ہوگا ورنہ یہ بے معنی ہو جائےگا۔ جسٹس سرمد نے کیس کی سماعت کے دوران اپنے ریمارکس میں کہا کہ جانناہوگا کہ صادق اور امین کافیصلہ کون کرےگا؟
کراچی: تھر میں قحط سالی سے پید اہو نے والی صورت حال اور اس دوران بچوں کی اموات پر سندھ حکومت شدید دباوں میں ہے۔ ایم کیو ایم کی جانب سے تھر کی صورت حال پر پیپلز پارٹی کو مسلسل تنقید کا نشانہ بنایا جارہا ہے۔ تھر میں بچوں کی اموات پر شرجیل میمن اور اظہار الحسن آمنے سامنے آگئے۔
تفصیلات کے مطابق سندھ کےوزیر اطلاعات شرجیل میمن نے کہا ہے کہ صوبائی حکومت تھر میں قدرتی آفات سے نمٹنےکی کوششیں کررہی ہےتاہم پاکستان میں روزانہ چھ سو بچے جاں بحق ہوتے ہیں۔ محض تھر کےحوالےسےاس مسئلے کو نہ دیکھا جائے۔
دوسری جانب تھرایم کیو ایم کے رہنما اظہار الحسن کا کہنا ہے کہ میں ایک بھی بچہ مرےگاتو ایم کیو ایم جواب طلب کرےگی۔ ایم کیو ایم کےرہنماخواجہ اظہارالحسن نے کہا ہے کہ پورے پاکستان میں بچوں کی ہلاکتوں کی تعداد کو تھر کےمسئلے سے نہ جوڑا جائے۔ سندھ میں ایک بچہ بھی بھوک سے مرےگا تو ایم کیو ایم حکومت سے جواب طلب کرے گی۔
شرجیل میمن اور اظہار الحسن علیحدہ علیحدہ سندھ اسمبلی کےباہر میڈیا سے گفتگوکررہے تھے۔
کوئٹہ: بگٹی کیس میں انسداد دہشت گردی کی عدالت نے مشرف کو ایک روز کا استثنیٰ دیدیا ہے۔
تفصیلات کے مطابق نذیراحمد پر مشتمل انسداد دہشت گردی کی عدالت نے نواب اکبر خان بگٹی قتل کیس میں آج سابق صدر پرویز مشرف کو طلب کیا تھا تاہم مشرف کے وکیل ذیشان چیمہ نے عدالت میں پرویز مشرف کی میڈیکل رپورٹ پیش کرتے ہوئے انہیں حاضری سے استثنی دینے کی درخواست کی۔
مذکورہ درخواست پر عدالت نے پرویز مشرف کو عارضی استثنی دیتے ہوئے حکم دیا کہ بلوچستان حکومت ،سندھ حکومت سے مل کر مشترکہ میڈیکل بورڈ تشکیل دے جو پرویز مشرف کا طبی معائنہ کرکے مکمل رپورٹ تیار کرکے اور آئندہ سماعت پر عدالت میں پیش کرے۔
کیس کی آئندہ سماعت دس دسمبر تک کے لئے ملتوی کردی گئی ہے۔
کراچی:سائٹ ایریا کی گتہ فیکڑی میں لگنے والی آگ پر قابو پالیا گیا ہے۔ لاکھوں کا سامان خاکستر ہو گیا ہے ۔ شہر بھر سے فائر بریگیڈ گاڑیوں نے آگ بجھانے میں حصہ لیا۔
تفصیلات کے مطابق آج صبح کراچی میں سائٹ ایریا کی گتہ فیکڑی میں آگ لگ گئی تھی۔ آگ بجھانے کے لئے فائر بریگیڈ کا عملہ فوری طور پر پہنچ گیا، آگ کی شدت کے باعث مزید فائر بریگیڈ کی گاڑیوں روانہ کر دی گئی تھیں۔
فیکٹری میں لگنے والی آگ پر کئی گھنٹوں کی جدوجہد کے بعد قابو پالیا گیا۔ فائر بریگیڈ حکام نے بتا یا کہ سائٹ ایریا میں واقع گتہ فیکٹری میں اچانک آگ بھڑک اٹھی دیکھتے ہی دیکھتے جسکی شدت میں اضافہ ہوگیا۔ ابتدا میں فائر بریگیڈ کی 5گاڑیوں نے آگ بجھانے کی کوشش کی مگر آگ کی شدت میں اضافے کے پیش نظر فائر بریگیڈ کی مزید گاڑیاں آگ پر قابو پانے کیلئے روانہ کی گئیں۔
فائر بریگیڈ کی 10 گاڑیوں نے کئی گھنٹوں کی جدوجہد کے بعد آگ پر قابو پالیا۔ پولیس کا کہنا ہے کہ ابتدائی طور پر واقعہ بجلی کی شارٹ سرکٹ کا شاخسانہ معلوم ہوتا ہے مگر اس واقعے کی مزید تحقیقات بھی جاری ہے۔ خوش قسمتی سے واقعے میں کو ئی جانی نقصان نہیں ہوا مگر لاکھوں روپے مالیت کا سازوسامان جل گیا۔
اسلام آباد: پاکستان عوامی تحریک کی جانب سے پارٹی کے اثاثوں کی تفصیلات الیکشن کمیشن آف پاکستان میں جمع کروادی ہے۔ انتخابی نشان کے حصول کیلئے بھی درخواست دیدی گئی ہے۔
تفصیلات کے مطابق پاکستان عوامی تحریک کی جانب سے آج پارٹی اثاثوں کی تفصیلات الیکشن کمیشن میں جمع کرادی گئیں ہے۔ جمع کروائی گئی تفصیلا ت کے مطابق عوامی تحریک کے کل اثاثوں کی مالیت چودہ لاکھ روپے بتائی گئی ہے۔ عوامی تحریک کے اثاثوں میں دولاکھ سے زائد کا دفتری فرنیچر موجود ہے جبکہ دفتر کے دیگر سامان کی مالیت ایک لاکھ سے زیادہ بتائی گئی ہے۔
عوامی تحریک کی جانب سے الیکشن کمیشن میں جمع کروائی گی تفصیلا ت کے مطابق پارٹی کے استعمال میں ہو نے والی گاڑیوں کی مالیت آٹھ لاکھ ہے۔ پاکستان عوامی تحریک کے بینک اکاونٹ میں سینتیس ہزار سے کچھ زائد کی رقم موجود ہے۔
پاکستان عوامی تحریک نے الیکشن کمیشن میں ایک اور درخواست بھی جمع کر وائی ہے جس میں انتخابات میں حصہ لینے کے لئے عوامی تحریک کو انتخابی نشان الاٹ کرنے کی درخواست کی گئی ہے تاہم بعد ازاں الیکشن کمیشن کی جانب سے یہ درخواست مسترد کر دی گئی۔
الیکشن کمیشن کا کہنا ہے کہ پی اے ٹی کی جانب سے مطلوب شدہ نشانات ٹریکٹر، چاند ستارہ اور ہاکی پہلے ہی دیگر جماعتوں کو الاٹ کئے جاچکے ہیں تاہم کمیشن کی جانب سےعوامی تحریک کو انتخا بی نشان الماری الاٹ کرنے کی پیش کش کردگئی۔ ترجمان الیکشن کمیشن کا کہنا ہےکہ عوامی تحریک ماضی میں بھی الماری کے انتخابی نشان سےالیکشن لڑتی رہی ہے۔
۔
اسلام آباد: داعش کی جانب سے پاکستان میں کاروائیوں کیلئے منصوبہ بندی کر لی گئی ہے۔داعش اس حوالے سے پاکستان میں پہلے سے موجود شدت پسند اور مذہبی تنظیموں سے رابطہ کر رہی ہے۔
اے آروائی نیوز نے بلوچستان حکومت کا نیکٹا سمیت حساس اداروں کو لکھے جانے والے خفیہ مراسلہ حاصل کرلیا، جس میں کالعدم تنظیم داعش کی مختلف شہروں میں دہشتگردی کی منصوبہ بندی اور مذہبی تنظیموں سے رابطے کا انکشاف کیا گیا ہے۔
جنگجو تنظیم داعش نے عراق اور شام کے بعد اب پاکستان کا رخ کرلیا ہے۔ وفاقی حکومت نے اس بات سے انکار کر دیا ہے۔ لیکن بلوچستان حکومت نے داعش کی موجودگی اور ان کے رابطوں کا نہ صرف اعتراف کرلیا ہے بلکہ اس بارے میں نیکٹا اور حساس اداروں کو مراسلہ بھی لکھ دیا ہے۔ جس کی کاپی اے آر وائی نیوز نے حاصل کرلی ہے۔
مراسلے میں کہا گیا ہے کہ داعش نے پاکستان میں اپنا نیٹ ورک مظبوط کرنے کیلئے مذہبی تنظیموں سے رابطے کیلئے دس رکنی خصوصی ونگ تشکیل دے دیا ہے۔ جو لشکر جھنگوی کے ساتھ مل کر آپریشن ضرب عضب میں حصہ لینے والی پاک آرمی کو نشانہ بنا سکتا ہے۔
مراسلے کے مطابق داعش نے ہنگو اور کرم ایجنسی میں اپنے دس سے بارہ ہزار حامیوں کی موجودگی کا بھی انکشاف کیا ہے۔ داعش کا پہلا ہدف خیبر پختونخوا میں سرکاری تنصیبات ہونگی۔ خفیہ مراسلہ رواں برس اکتیس اکتوبر کو لکھا گیا تھا۔ جس میں آئی جی پولیس ،ڈویژنل کمشنر ،ڈپٹی کمشنرز اور ریجنل پولیس آفیسرز کو محتاط رہنے کی ہدایت بھی کی گئیں ہیں۔
پشاور: شمالی وزیرستان میں کلیئرنس آپریشن کے دوران جھڑپ میں دو فوجی اہلکار شہید ہو گئے ہیں۔ سیکورٹی فورسز نے چار حملہ آور دہشتگرد ہلاک کر دیے۔ ترجمان طالبان نے اپنے خودکش حملوں کے ماسٹر مائنڈ کمانڈر ابوجندل کی ہلاکت کی تصدیق کردی ہے۔
تفصیلات کے مطابق آئی ایس پی آر کے مطابق اتوار کی شام گرلامائی میں کلیئرنس آپریشن کے دوران دہشتگردوں سے جھڑپ میں چار دہشت گرد مارے گئے ہے۔ فائرنگ کے تبادلے میں دو فوجی جوان بھی شہید ہوگئے ہیں۔ پشاور میں دونوں شہید فوجیوں کی نماز جنازہ ادا کر دی گئی ہے۔
دہشتگردوں کے خلاف پاک فوج کا آپریشن خیبرون اور خیبر ٹو کامیابی سے جاری ہے اور پاک فوج کی جانب سے جیٹ طیاروں کی شدت پسندوں پربمباری بھی جاری ہے۔ آئی ایس پی آر کے مطابق تازہ کارروائی تحصیل تیراہ کے علاقے آکا خیل میں کی گئی۔ جس میں اہم کمانڈر سمیت تیرہ شدت پسند ہلاک ہوگئے ہے۔ آئی ایس پی آر کے مطابق فضائی کارروائی میں دہشت گردوں کے سولہ ٹھکانے اور گولہ بارود تباہ کردیا گیا ہے۔
گذشتہ روز بھی علاقےسےسترہ دہشتگردوں کی لاشیں برآمد ہوئی تھیں۔ پولیٹیکل انتظامیہ کے مطابق ہلاک شدگان کا تعلق کالعدم تنظیم لشکراسلام سے ہے۔ ذرائع کا کہنا ہے کہ خیبر ون اور شمالی وزیرستان میں آپریشن ضرب عضب سے علاقے میں امن وامان بحا ل ہورہا ہے اور نقل مکانی کرنیوالےافراد کی واپسی کیلئے بھی حکومت کی جانب سے لائحہ عمل تیار کیا جارہا ہے۔
دوسری جانب طالبان کے ترجمان نے پچھلے دنوں پاکستانی فوج کے ہاتھوں ایک کاروائی میں اپنے خود کش حملوں کے ماسٹر مائنڈ کمانڈر ابو جندل کی ہلاکت کی تصدیق کر دی ہے۔ دوسری جانب اہم ذرائع نے انکشاف کیا ہے کہ داعش نے پاکستان میں دہشت گردی کا منصوبہ بنایا ہے اور اس حوالے سے داعش نے10رکنی خصوصی ونگ بھی بنا لیا ہے۔