اسلام آباد : پاکستان تحریک انصاف کے سربراہ عمران خان نے ہر ہفتے بطوروزیر اعظم ایک گھنٹہ عوام کے سوالات کے جوابات دینے کا اعلان کیا ہے اور کہا کہ فیصلے میرٹ پر اور قوم کے مفاد کیلئے کروں گا۔
تفصیلات کے مطابق پی ٹی آئی چیئرمین عمران خان نے ایک اور بڑا فیصلہ کرتے ہوئے عوام کے سامنے جواب دہ ہونے کا اعلان کیا ہے۔
عمران خان نے کہا کہ ہرہفتے بطوروزیر اعظم ایک گھنٹہ عوام کے سوالات کا جواب دیں گے اور وزراکو بھی صحیح معنوں میں جواب دہ بنائیں گے۔
پی ٹی آئی چیئرمین نے کامیاب ارکان اسمبلی کو تلقین کی آپ نے عوام کے پیسے کو اللہ کی امانت سمجھنا ہے، آپ نے قوم کا پیسہ بچانا ہے تاکہ عوام کی فلاح پر خرچ ہوسکے۔
انھوں نے کہا کہ فیصلے میرٹ پر اور قوم کے مفاد کیلئے کروں گا ، میں آپ سےاس کا تقاضا کبھی نہیں کروں گا جس پر خود عمل نہ کروں۔
مزید پڑھیں : نہ پروٹوکول لوں گا نہ ہی شاہ خرچیاں کی جائیں گی، عمران خان
اس سے قبل اسلام آباد میں پارلیمانی پارٹی کےاجلاس سے خطاب مین چیئرمین تحریک انصاف کا کہنا تھا کہ بائیس سال اس دوسرے مرحلے کا انتظار کیا، آج عوام نے دوجماعتی نظام کوشکست دی، جدوجہد سے بھرپور زندگی اتار چڑھاؤ سے عبارت ہوتی ہے ہماری یہ جدوجہد پاکستان کا مستقبل بدل دے گی۔
عمران خان کا کہنا تھا کہ عوام ہم سے روایتی طرزسیاست وحکومت کی امید نہیں رکھتے ،عمران خان روایتی طرز حکومت اپنایا تو عوام ہمیں غضب کا نشان بنائیں گے۔
انھوں نے مزید کہا کہ بائیس سال کی جدوجہد کا پہلا مرحلہ آج مکمل ہوا، اپنی ذات کو مثال بناؤں گا، نہ پروٹوکول لوں گا نہ ہی شاہ خرچیاں کی جائیں گی۔
یاد رہے سادگی اور کفایت شعاری اپنانے کے اعلان بعد پی ٹی آئی چیئرمین وزیراعظم ہاؤس میں نہ رہنے ، پروٹوکول نہ لینے اور وفاقی کابینہ کو مختصر رکھنے کے بڑے فیصلے کرچکے ہیں۔
