سکھر : سابق صوبائی وزیرداخلہ سہیل انور سیال کے بھائی طارق سیال کے فرنٹ مین اسد کھرل کی دو مقدمات میں ضمانت منظور کرنے کے بعد جیل سے رہا کردیا گیا۔
تفصیلات کے مطابق سکھر پولیس کے ہاتھوں گرفتار ہونے والے اسد کھرل کو دونوں مقدمات میں ضمانت منظور ہونے کے بعد جیل سے رہا کر دیا گیا ہے۔
رینجرز اور سندھ حکومت کے درمیان وجہ تصادم بننے والے اسد کھرل کو دو مقدمات پر ضمانت پر رہا کردیا گیا، غیر قانونی اسلحہ رکھنے کے کیس میں دو لاکھ روپے کے مچلکے اور سرکار میں مداخلت کے مقدمات میں ضمانت منظور ہوگئی۔
اکیس جولائی کو حساس اداروں کے تعاون سے رینجرز نے حیدرآباد سے گرفتار کیا تھا۔ اسد کھرل کو کار سرکار میں مداخلت اور ٹی ٹی پستول رکھنے کے مقدمات درج کرنے کے بعد عدالت میں پیش کیا گیا تھا۔
عدالت نے اسد کھرل کو جوڈیشل ریمانڈ پر جیل بھیج دیا تھا۔ چند روز قبل پولیس نے دونوں مقدمات کا حتمی چالان عدالت میں پیش کیا۔ آج عدالت نے دونوں مقدمات میں ضمانت منظور کرتے ہوئے ملزم کو آزاد کرنے کے احکامات جاری کئے ہیں، جس کے بعد اسد کھرل کو سینٹرل جیل سے آزاد کر دیا گیا ہے۔
ذرائع کے مطابق اسد کھرل رہائی کے بعد کراچی روانہ ہو گیا ہے۔ یاد رہے کہ اسد کھرل سابق وزیرداخلہ سہیل انور سیال کے بھائی طارق سیال کا قریبی ساتھی ہے۔
اس سے قبل جب رینجرز نے اسد کھر ل کو گرفتار کیا تھا تو بااثر افراد نے اسد کھرل کو رینجرز کی تحویل سے آزاد کرالیا تھا جس پر رینجرز اور سندھ حکومت کے درمیان ٹھن گئی تھی۔
