اسلام آباد : وفاقی وزیر منصوبہ بندی اسد عمر کا کہنا ہے کہ کراچی منصوبوں پرکام انتظارکررہاہے، ایک دوسرےکیخلاف ڈرامے بازی پریس کانفرنسز کا کوئی فائدہ نہیں۔
تفصیلات کے مطابق اسلام آباد میں وفاقی وزیر منصوبہ بندی اسد عمر نے میڈیا سے گفتگو کرتے ہوئے کہا کہ کراچی منصوبوں پر کام کا انتظار کر رہا ہے، اب اس طرح سیاست مزید نہیں چلے گی،ایک دوسرے کیخلاف ڈرامے بازی پریس کانفرنسز کا کوئی فائدہ نہیں۔
اسد عمر کا کہنا تھا کہ گراونڈ کے اوپر جاکر کام کرنے کی ضرورت ہے،توجہ ہٹانے والی فضول بحث، کام نہ کرنے کی باتیں ہوتی ہیں، آپ کام نہیں کرنا چاہتے تو ٹرک کی بتی کے پیچھے لگا دیتے ہیں۔
وفاقی وزیر نے کہا کہ مان لیا کہ ساڑھے سات سو ارب ہے ان کا لیکن کام بھی کل سے شروع کرو، اگر سب پرانے منصوبے ہیں تو زمین پر کام کتنا ہوا ہے۔
گذشتہ روز وفاقی وزیر منصوبہ بندی کا کہنا تھا کہ کراچی سےمتعلق ہماری طرف سےبحث ختم ہوچکی ہے، کراچی سےمتعلق ہماری بحث ہوتی تومنصوبوں کااعلان کیوں کرتے، وفاق کی جانب سےمنصوبوں کااعلان کردیاگیاہے، سندھ حکومت750 ارب روپےکہاں سےلائےگی، حالیہ کراچی پیکج میں پہلےاعلان کردہ135ارب شامل ہیں۔
انھوں نے کہا تھا کہ موجودہ قوانین کے ساتھ سندھ میں بلدیاتی انتخابات کافائدہ نہیں، سندھ حکومت کوپیسےہی نہیں دینے تو نیت سےفرق نہیں پڑتا،کراچی پیکج سےمتعلق ایک باقاعدہ ڈرافٹ بناچکےہیں، میٹنگ میں وزیراعلیٰ سندھ نے کہاوفاق زیادہ پیسہ خرچ کرے گا تو تاثر غلط جائے گا، وفاق سندھ حکومت کےبجائےوفاق کےماتحت اداروں کوپیسہ دے گا۔
