لاہور: پاکستان تحریک انصاف کے رہنما اسد عمر نے کہا ہے کہ ایک سال کا خسسارہ ایک مہینے میں ہوا ہے، پاکستان کی معیشت و انڈسٹری کی صلاحیت مفلوج کردی گئی ہے، پچھلے تین سال سے کہہ رہے ہیں حکومت معیشت ڈبو رہی ہے۔
ان خیالات کا اظہار انہوں نے نیوز کانفرنس کرتے ہوئے کیا، اسد عمر نے کہا کہ بیرونی زرمبادلہ کے ذخائر خطرناک حد تک گر گئے ہیں، نگراں حکومت کو معیشت سے متعلق پالیسی دینی چاہئے، تمام دعوؤں کے باوجود لوڈشیڈنگ میں کوئی کمی نہیں ہوئی، نگراں حکومت حقائق پر مبنی زرمبادلہ کے ذخائر سے متعلق سچ بتائے۔
اسد عمر کے مطابق روپے کی قدر گرنے سے ہر خاندان 40 ہزار سے زائد کا مقروض ہوگیا، معیشت اس حد تک پہنچ چکی ہم بیل آؤٹ پیکیج کی طرف جارہے ہیں، جس جگہ آج معیشت آگئی ہے اس وقت انتظار نہیں ہوسکتا، ایکسپورٹر کو مہنگی بجلی و گیس نہ ہوتی تو وہ ایکسپورٹ کرکے دیتا، نگراں حکومت حقیقت سامنے لائے۔
رہنما پی ٹی آئی نے کہا کہ بجلی کا شارٹ فال ساڑھے چار ہزار میگاواٹ ہے، سب سے خطرناک کام 8 ارب شاٹ ٹرم قرضہ لیا گیا ہے، کم ٹرنز پر کمرشل قرضے لیے گئے ہیں، زرمبادلہ کے ذخائر گر رہے ہیں، یہ گر کر 6 ہفتے کے رہ جائیں گے، اسٹیٹ بینک نے جو بات اپنی رپورٹ میں بتائی وہ پہلے کی جاتی۔
اسد عمر کے مطابق حکومت نے 2 ہزار 384 ارب کے اسٹیٹ بینک سے قرضے لیے، جس طرح سے ذخائر گر رہے ہیں کیا چند ماہ بھی ایسے چل سکتے ہیں، شاہد خاقان اسلام آباد کے شہری آپ سے پانی کا ضرور پوچھیں گے، نگراں حکومت کو بتانا چاہئے ہم آج کہاں کھڑے ہیں، لگتا ہے کہ نگراں وزرا پر ن لیگ کا دباؤ ہے۔
