ایشین کرکٹ کونسل (اے سی سی) نے ایشیا کپ میچز کے اوقات کار تبدیل کردیے۔
ایشین کرکٹ کونسل کی جانب سے ترمیم شدہ شیڈول کے مطابق میچز یو اے ای وقت کے مطابق شام ساڑھے چھ بجے جب کہ پاکستان وقت کے مطابق ساڑھے سات بجےشروع ہوں گے۔
پندرہ ستمبر کو شیڈول ڈبل ہیڈر میں یو اے ای اور عمان کا میچ ابوظہبی میں چار بجے کھیلا جائے گا جبکہ دوسرا میچ ساڑھے چھ بجے سری لنکا اور ہانگ کانگ کے درمیان دبئی میں ہوگا۔
اے سی سی کا کہنا ہے کہ گرم موسم کے باعث میچز کے وقت کو تبدیل کیا گیا ہے۔
یہ پڑھیں: ایشیا کپ ابھی دور ہے پہلے ٹرائی سیریز جیتنی ہے، حارث رؤف
واضح رہے کہ ایشیا کپ کا 15 واں ایڈیشن ٹی ٹوئنٹی فارمیٹ میں کھیلا جائے گا جس میں آٹھ ٹیمیں پاکستان، بھارت، سری لنکا، بنگلہ دیش، افغانستان، عمان، یو اے ای اور ہانگ کانگ کو دو گروپوں میں تقسیم کیا گیا ہے۔
گروپ اے میں میزبان متحدہ عرب امارات اور عمان کے ساتھ سخت حریف پاکستان اور بھارت جبکہ گروپ بی میں سری لنکا، بنگلہ دیش، افغانستان اور ہانگ کانگ شامل ہیں۔
ایشیا کپ کے افتتاحی میچ میں افغانستان اور ہانگ کنگ کی ٹیمیں 9 ستمبر کو ابوظبی کے شیخ زید اسٹیڈیم میں مدمقابل آئیں گی، پاکستانی ٹیم اپنا پہلا میچ 12 ستمبر کو عمان کے خلاف کھیلے گی۔
