اسلام آباد: ایشیائی ترقیاتی بینک نے پاکستان کو 25 کروڑ ڈالر فراہم کرنے کا اعلان کیا ہے۔
ایشیائی ترقیاتی بینک کی جانب سے جاری اعلامیے کے مطابق اے ڈی بی پاکستان کو پچیس کروڑ ڈالر فراہم کرے گا، یہ رقم پاکستان میں ماحولیاتی بہتری کے منصوبوں پر خرچ کی جائے گی۔
پاکستان کے لیے رقم کی منظوری ایشیائی ترقیاتی بینک نے فلپائن میں دی، اس رقم کا مقصد پرائیویٹ پبلک پارٹنر شپ کے تحت انفرا اسٹرکچر کی بہتری ہے، اس سے مستحکم ترقی کے اہداف حاصل کرنے میں معاونت ملے گی۔
ایشیائی ترقیاتی بینک( اے ڈی بی) نے ایجنگ ویل ان ایشیا سے متعلق ایشین ڈیولپمنٹ پالیسی رپورٹ جاری کردی ہے۔
ایشیائی ترقیاتی بینک نے اپنی رپورٹ میں بتایا کہ ترقی پذیر ایشیائی ممالک میں معمر افراد کو کم پنشن، صحت اور سماجی تنہائی کے چیلنجز کا سامنا ہے جب کہ ترقی پذیر ایشیائی ممالک عمر رسیدہ آبادی کے چیلنجز کے لیے تیار نہیں۔
اے ڈی بی کی رپورٹ کے مطابق طویل عمریں خطے کی ترقی کی کامیابی کی عکاسی کرتی ہیں، بزرگ افراد کی فلاح و بہبود کیلئے جامع پالیسی اصلاحات کی ضرورت ہے۔
رپورٹ میں بتایا گیا ہے کہ ترقی پذیر ایشیا، پیسفک ممالک میں بزرگ افراد تیزی سے بڑھ رہے ہیں، اگلے 26 سالوں میں بزرگ افراد کی تعداد میں دگنا اضافہ ہو جائے گا 2050 تک 60 سال سے زائد عمر کے افراد کی تعداد 1.2 ارب ہوجائے گی۔
اے ڈی بی کی رپورٹ میں تجویز دی گئی ہے کہ بزرگ افراد کی دیکھ بھال کے لیے حکومتوں کو پالیسیاں بنانا ہوں گی، ان ممالک میں 40 فیصد بزرگ افراد کے پاس پنشن تک رسائی نہیں جب کہ بزرگ افراد کے پاس ریٹائرمنٹ کے بعد بھی کام کے سوا کوئی چارہ نہیں بچتا، صحت، تعلیم، ہنر اور ریٹائرمنٹ کیلئے مالی تیاری کی حمایت ضروری ہے۔
رپورٹ میں بتایا گیا ہے کہ کام کرنے والے 94 فیصد بزرگ افراد غیر رسمی شعبے میں کام کرتے ہیں، ان شعبوں میں بزرگ افراد کو لیبر پروٹیکشن یا پنشن کے فوائد نہیں ملتے، ایشیا اینڈ پیسفک ممالک میں 60 فیصد برزگ افراد باقاعدہ طبی معائنہ نہیں کراتے جبکہ 30 فیصد بزرگ بیماری اور سماجی تنہائی کا شکار رہتے ہیں۔
اے ڈی بی کی رپورٹ کے مطابق ان ممالک میں بزرگ خواتین کو بزرگ مردوں کی نسبت زیادہ چیلنجز ہیں، بوڑھی خواتین میں ڈپریشن سے لے کر ذیابیطس اور ہائی بلڈ پریشر کا امکان ہے۔
ایشیائی ترقیاتی بینک نے اپنی رپورٹ میں تجویز دی ہے کہ بزرگی میں کام کرنے والے افراد تک بھی بنیادی لیبر پروٹیکشن کو بڑھایا جائے، حکومت بزرگ افراد کے لیے ہیلتھ انشورنس اور پنشن پالیسیاں بنائے، حکومتوں کو بہتر انفراسٹرکچر، مفت سالانہ چیک اپ کے اقدامات بھی کرنے چاہئیں۔
اسلام آباد : ایشیائی ترقیاتی بینک (اے ڈی بی) نے بریس پروگرام کے تحت پاکستان کیلئے ڈیڑھ ارب ڈالرکی امداد اسٹیٹ بینک کوجاری کردی ہے, جو اسٹیٹ بینک کو موصول ہوگئی ہے۔
وزارت اقتصادی امور کے ترجمان نے بدھ کویہاں جاری بیان میں کہاہے کہ بریس پروگرام کا مقصد سپلائی چین میں رکاوٹوں کے باعث توانائی اور ایندھن کی بڑھتی قیمتوں اور غریبوں اور اقتصادی طور پر کمزور طبقات پر مہنگائی کے منفی اثرات سے نمٹنے کے لیے حکومت کی کوششوں کی حمایت کرنا ہے۔
انہوں نے بتایا کہ پروگرام کا مقصد سماجی تحفظ، غدائی ضروریات کو پورا کرنے کے اقدامات اور کاروبار کے لیے تعاون کے لیے حکومت کے انسداد گردشی و ترقیاتی اخراجات کی حمایت کرنا ہے۔
ایشیائی ترقیاتی بینک کا بریس پروگرام مضبوط معاشی بہتری کے فروغ کے لیے کیے جانے والے اقدامات کو تقویت دے گا۔ترجمان نے بتایاکہ بریس پروگرام آئی ایم ایف کے جاری پروگرام کے فریم ورک سے منسلک ہے جس سے سماجی تحفظ کے نیٹ ورک کو مضبوط بنانے میں مددملیگی۔
ترجمان نے بتایا کہ ایشیائی ترقیاتی بینک کے پروگرام سے حالیہ تباہ کن سیلاب کے تناظر میں حکومت کے بحران سے نمٹنے کے لیے مالیاتی اور غذائی تحفظ کے اقدامات کو بڑھانے میں مدد ملیگی۔ترجمان نے مزیدکہاکہ پروگرام سے کاروباری اداروں اور روزگار کے تحفظ کے اقدامات کو آگے بڑھانے میں بھی مدد ملے گی۔
وفاقی وزیرخزانہ نے رقم ملنے کی تصدیق کردی
وفاقی وزیرخزانہ ومحصولات سینیٹرمحمداسحاق ڈارنے کہا ہے کہ ایشیائی ترقیاتی بینک کے بریس پروگرام کے تحت پاکستان کیلئے ڈیڑھ ارب ڈالرقرضہ کی رقم پاکستان کوموصول ہوگئی ہے۔
اپنے ایک حالیہ ٹویٹ میں وزیرخزانہ نے کہا کہ الحمدللہ ایشیائی ترقیاتی بینک کے بریس پروگرام کے تحت پاکستان کیلئے ڈیڑھ ارب ڈالرقرضہ کی رقم اسٹیٹ بینک میں حکومت پاکستان کے اکاونٹ میں منتقل ہوگئی ہے۔
اسلام آباد: ایشیائی ترقیاتی بینک نے ایک ارب پچاس کروڑ ڈالر پاکستان کو منتقل کردیے۔
ذرائع اسٹیٹ بینک نے ایشیائی ترقیاتی بینک کی جانب سے رقم پاکستان کو منتقل کیےجانے کی تصدیق کی ہے۔
ذرائع کا کہنا ہےکہ پاکستان اور ایشیائی ترقیاتی بینک کے درمیان معاہدہ پیر کو ہوا تھا اور رقم منتقلی کے بعد پاکستان کے غیر ملکی زرمبادلہ کے ذخائر 9 ارب ڈالر سے زیادہ ہوگئے ہیں۔
ایشیائی ترقیاتی بینک (اے ڈی بی )کا کہنا ہے کہ یہ رقم پاکستان میں سیلاب کےباعث بڑے پیمانے پر تباہی سے نمٹنے میں مدد فراہم کی جائے گی۔
ایشیائی ترقیاتی بینک نے کہا ہے کہ اس رقم سے سپلائی چین میں رکاوٹ، غزائی تحفظ کو فروغ دینے اور روز گار پیدا کرنے میں مدد فراہم ہو گی اور پاکستان اپنی ترقیاتی اخراجات کی کمی کو بھی اس رقم سے پورا کر سکے گا۔
یاد رہے رواں ماہ کے شروع میں ایشیائی ترقیاتی بینک نے پاکستان کو سیلاب ریلیف سپورٹ کی مد میں 2 ارب 50 کروڑ ڈالر دینے کا اعلان کیا تھا۔
اسلام آباد : ایشیائی ترقیاتی بینک کی جانب سے پاکستان سنگل ونڈو کیلئے قرض روکنے کا انکشاف سامنے آیا ، حکام نے بتایا کہ ایف بی آر نے دوسرے پراجیکٹ کی فنڈنگ پاکستان سنگل ونڈو کیلئے استعمال کی۔
تفصیلات کے مطابق قومی اسمبلی کی قائمہ خزانہ کمیٹی کا اجلاس امجد نیازی کی زیر صدارت ہوا، جس میں حکام نے انکشاف کیا کہ ایشیائی ترقیاتی بینک نے پاکستان سنگل ونڈو کیلئے 5کروڑڈالرکا قرض نہیں دیا، اے ڈی بی کے تعاون سے پراجیکٹ شروع کیا جانا تھا۔
سنگل ونڈو حکام نے بتایا کہ اےڈی بی سےقرض کی فراہمی کیلئےبات چیت جاری ہے، جس کے بعد اے ڈی بی سے 3 کروڑ 60 لاکھ ڈالرکی رقم ملے گی۔
حکام کا کہنا تھا کہ پاکستان سنگل ونڈوکےتحت77قومی ادارےعالمی اداروں سےمنسلک ہیں، ایف بی آر نے دوسرے پراجیکٹ کی فنڈنگ پاکستان سنگل ونڈو کیلئے استعمال کی۔
چیئرمین ایف بی آر اشفاق احمد نے کہا پاکستان سنگل ونڈوانتہائی اہمیت کا حامل منصوبہ ہے، ٹریڈ انفارمیشن منصوبے کی فنڈنگ سنگل ونڈوکیلئےاستعمال کی، 11ارب لاگت کاپاکستان سنگل ونڈومنصوبہ2023میں مکمل ہو گا۔
اسلام آباد : ایشیائی ترقیاتی بینک نے پاکستان کو 200 ملین ڈالر دینے کا اعلان کردیا ، قرض پنجاب میں آبپاشی کے نظام کی ترقی کے لیے استعمال کیا جائے گا۔
تفصیلات کے مطابق ایشیائی ترقیاتی بینک نے پاکستان کے لیے 200 ملین ڈالر کے قرض کی منظوری دے دی ، اے ڈی بی کی جانب سے اعلامیے میں کہا گیا ہے کہ قرض پنجاب میں آبپاشی کے نظام کی ترقی کے لیے استعمال کیاجائےگا۔
اے ڈی بی کا کہنا تھا کہ قرض سےزرعی پیداوار میں اضافہ اور غذائی تحفظ بڑھانے میں مدد ملے گی اور اسکیم سےبھکر، جھنگ، خوشاب، لیہ اور مظفر گڑھ کے اضلاع کو فائدہ ہو گا۔
ایشیائی ترقیاتی بینک نے کہا کہ 7لاکھ 4ہزارہیکٹراراضی کوپانی کی فراہمی میں مددملے گی۔
یاد رہے گذشتہ ہفتے ایشیائی ترقیاتی بینک نے پاکستان کو 60 کروڑ ڈالر فراہم کرنے کا اعلان کرتے ہوئے کہا یہ رقم نتیجہ خیز سماجی تحفظ پروگرام پرخرچ کی جائے گی۔
اے ڈی بی کی جانب سے جاری اعلامیہ میں کہا گیا تھا کہ پاکستان کو مزید 30 لاکھ ڈالر گرانٹ بھی فراہم کی جائےگی اور تعلیم سب کیلئے فاؤنڈیشن کی طرف سے 24ملین کی گرانٹ بذریعہ اے ڈی بی خرچ ہوگی۔
پشاور : خیبرپختونخوا میں سستی بجلی کی پیداوار کیلئے صوبائی حکومت کی جانب سے اہم اور انقلابی قدم اٹھا لیا گیا، ایشین ترقیاتی بینک سے بالاکوٹ ہائیڈرو پاور پراجیکٹ کی تعمیر کے معاہدے پر دستخط کردیئے گئے۔
تفصیلات کے مطابق 300 میگاواٹ کے منصوبے بالاکوٹ ہائیڈرو پاور پراجیکٹ کی تعمیر میں اہم پیشرفت سامنے آئی ہے، حکومت پاکستان اور ایشیائی ترقیاتی بینک کے درمیان منصوبے کے حوالے سے اکنامک آفیئرز ڈویژن اور ایشیائی ترقیاتی بینک کے درمیان معاہدے پر دستخط کئے گئے، معاہدے پر دستخط کرنے کی تقریب اسلام آباد میں منعقد ہوئی۔
وزیر اعلیٰ خیبر پختونخوا محمود خان اور وفاقی وزیر عمر ایوب تقریب کے مہمان خصوصی تھے، ایگریمنٹ کے تحت ایشیائی ترقیاتی بینک آسان شرائط پر 580 ملین ڈالر کا قرضہ فراہم کرے گا، منصوبے کیلئے باقی ماندہ رقم صوبائی حکومت ادا کرے گی، ایشیائی ترقیاتی بینک یہ قرضہ 27سال کی مدت کے لئے فراہم کرے گا۔
بالا کوٹ ہائیڈرو پاورپراجیکٹ سے300میگاواٹ بجلی پیدا ہو گی، یہ منصوبہ750 ملین ڈالر کی مجموعی لاگت سے چھ سال کے عرصے میں مکمل کیا جائے گا۔
محمود خان نے کہا کہ عنقریب اس اہم منصوبے کا سنگ بنیاد رکھا جائے گا، توقع ہے وزیر اعظم عمران خان خود اس منصوبے کا سنگ بنیاد رکھیں گے۔
اس منصوبے کی تعمیر کے دوران روزگار کے بارہ سو سے زائد مواقع پیدا ہوں گے، موجودہ حکومت صوبے میں پن بجلی کے مواقع سے بھر پور استفادہ کرنے کے لئے موثر اقدامات اٹھا رہی ہے۔ منصوبے کی تکمیل سےحکومت کوسالانہ 14ارب روپے ملیں گے۔
عمر ایوب نے کہا کہ یہ منصوبہ ضلع مانسہرہ میں دریائے کنہار پر تعمیر کیا جائے گا، منصوبے کی تکمیل سے بجلی کی پیداوار میں خاطر خواہ اضافہ ہو جائے گا۔
اسلام آباد : ایشیائی ترقیاتی بینک نے کرونا وائرس سے نمٹنے کے لیے پاکستان کی مدد کا اعلان کردیا، بینک پاکستان کو 5 کروڑ ڈالر دے گا۔
تفصیلات کے مطابق ایشیائی ترقیاتی بینک کرونا وائرس سے نمٹنے کے لیے پاکستان کو پانچ کروڑ ڈالر فراہم کرے گا، پاکستان کو یہ رقم فوری جاری کئے جانے کا امکان ہے۔
اعلامیہ کے مطابق رقم پاکستان کے نیشنل ڈیزاسٹررسک مینجمنٹ کے ادارے کو دی جائے گی، ایشیائی ترقیاتی بینک کرونا سےنمٹنےکیلئے مجموعی طور پر 35 کروڑ ڈالر پاکستان کودے گا۔
اس سے قبل عالمی بینک نے بھی پاکستان کو 18 کروڑ80 لاکھ ڈالر دینے کا اعلان کیا تھا۔
یاد رہے ایشیائی ترقیاتی بینک نے کرونا وائرس سے پیدا ہونے والی صورتحال کو سنگین قرار دیتے ہوئے کہا تھا کہ عالمی معیشت کو 347 ارب ڈالر تک کا نقصان ہوسکتا ہے۔
مزید پڑھیں : کرونا وائرس کے باعث عالمی معیشت کو 347 ارب ڈالر تک کا نقصان ہوسکتا ہے، اے ڈی بی
اے ڈی بی کا کہنا تھا کہ کرونا وائرس کے باعث پاکستانی معیشت کو بھی خطرات ہوسکتے ہیں، پاکستانی معیشت کو ممکنہ طور 4 ارب 95 کروڑ ڈالر نقصان کا خدشہ ہے اور پاکستان میں تقریبا ٔ9 لاکھ سے زائد افراد بے روزگار ہوسکتے ہیں۔
رپورٹ کے مطابق زرعی شعبے کو ڈیڑھ ارب ڈالر سے زائد کا نقصان اور بزنس، تجارت، پرسنل، پبلک سروسز کو1 ارب 94کروڑ ڈالر نقصان کا خدشہ ہے جبکہ ہوٹل، ریسٹورنٹ، مینوفیکچرنگ اور تعمیرات بھی متاثر ہوسکتی ہیں۔
ایشیائی ترقیاتی بینک نے کہا تھا عالمی معاشی شرح نمو میں صفر اعشاریہ چار فیصد تک کی کمی کاخدشہ ہے، یہ تخمینہ بدترین صورتحال کو مد نظر رکھتے ہوئے لگایاگیا ہے، سفری پابندیوں کے باعث عالمی سطح پر ایک سوچھپن ارب ڈالر کا نقصان ہوچکاہے۔
رپورٹ میں کہا گیا تھا چین کو ہونے والے نقصانات کا حجم ایک سوتین ارب ڈالرہے، ڈویلپنگ ایشیائی ممالک کےنقصانات کاحجم بائیس ارب ڈالر تک ہوسکتا ہے۔
اسلام آباد: ایشیائی ترقیاتی بینک کا کہنا ہے کہ پاکستان کی معاشی ترقی کی شرح میں رواں مالی سال استحکام نظر آئے گا تاہم مجموعی طور پر ایشیا میں مہنگائی میں اضافہ ہوگا۔
تفصیلات کے مطابق ایشیائی ترقیاتی بینک نے ایشین ڈیولپمنٹ آؤٹ لک سپلیمنٹ جاری کردی۔ ایشیائی ڈیولپمنٹ بینک نے ایشیا کی معاشی ترقی میں کمی کی پیشگوئی کردی۔
آؤٹ لک سپلیمنٹ کے مطابق ڈیولپنگ ایشیا میں ترقی کی شرح 5.2 فیصد رہے گی۔ رواں سال چین کی معاشی شرح نمو 6.1 فیصد رہے گی۔
ایشیائی ترقیاتی بینک کا کہنا ہے کہ پاکستان کی معاشی ترقی کی شرح میں رواں مالی سال استحکام نظر آئے گا۔ مجموعی طور پر ایشیا میں مہنگائی میں اضافہ ہوگا۔
رپورٹ کے مطابق ڈیویلپنگ ایشیا میں افراط زر کی شرح رواں سال 2.8 فیصد رہے گی۔ پاکستان میں رواں سال کے پہلے 3 ماہ میں افراط زر کی شرح اوسطاً 10 فیصد رہی۔
اس سے قبل عالمی ریٹنگز ایجنسی موڈیز نے پاکستان کی کریڈٹ ریٹنگ بہتر کرتے ہوئے آؤٹ لک کو منفی سے مستحکم کر دیا تھا، موڈیزنے پاکستان کی ریٹنگ بی تھری پر برقرار رکھی تھی تاہم پہلے مستقبل یعنی آؤٹ لک منفی تھا۔
موڈیز کا کہنا تھا کہ اگرچہ زرمبادلہ کے ذخائر اب بھی کم ہیں اور انہیں بہتر ہونے میں وقت لگے گا مگر پالیسی ایڈجسٹمنٹ اور آزادانہ شرح مبادلہ سے ادائیگیوں کے توازن کی بہتری میں مدد ملے گی۔
اسلام آباد: ایشیائی ترقیاتی بینک کا کہنا ہے کہ عالمی سطح پر خام تیل اور خوراک کی قیمتوں میں کمی کے باعث مہنگائی میں کمی متوقع ہے۔
تفصیلات کے مطابق ایشیائی ترقیاتی بینک کی جانب سے ایشین ڈیولپمنٹ آؤٹ لک سپلیمنٹ جاری کردیا گیا، ایشیائی ترقیاتی بینک کا کہنا ہے کہ جنوبی ایشیا کی معاشی ترقی کی شرح بہتر رہے گی، معاشی شرح نمو سنہ 2019 میں 6.6 جبکہ 2020 میں 6.7 فیصد رہنے کا امکان ہے۔
ایشیائی ترقیاتی بینک کا کہنا ہے کہ گزشتہ مالی سال پاکستان کی معاشی شرح نمو 3.3 فیصد رہی، 3.3 فیصد شرح 8 سال میں کم ترین شرح نمو رہی۔
رپورٹ میں کہا گیا کہ جاری اور تجارتی خسارہ پاکستانی معیشت کے اہم مسائل ہیں، ایشیائی ترقیاتی بینک نے جنوبی ایشیا کے لیے افراط زر میں کمی کی پیشگوئی بھی کی ہے۔
بینک کا کہنا ہے کہ گزشتہ مالی سال پاکستان میں مہنگائی میں اضافے کی شرح دگنی ہوگئی، عالمی سطح پر خام تیل اور خوراک کی قیمتوں میں کمی کے باعث مہنگائی میں کمی متوقع ہے۔
اس سے قبل ایشیائی ترقیاتی بینک نے پاکستان سے متعلق فیکٹس شیٹ جاری کرتے ہوئے کہا تھا کہ پاک چین اقتصادی راہداری اور دیگر منصوبے معیشت میں بہتری کی وجہ بنیں گے، اے ڈی بی ایگزیم بینک کے قیام میں مدد فراہم کرے گا۔
اےٖ ڈی بی کا کہنا تھا کہ زرمبادلہ ذخائر میں کمی اور قرضوں کی واپسی پر بھی نظر رکھنی ہوگی۔ انتظام میں بہتری، برآمدات میں اضافہ اور اداروں کو مستحکم کرنا ہوگا۔