ARYNews.tv | Urdu – Har Lamha Bakhabar

Tag: Asian Games

  • ایشین گیمز اسکواش، پاکستان ٹیم نے فائنل میں جگہ بنالی

    ایشین گیمز اسکواش، پاکستان ٹیم نے فائنل میں جگہ بنالی

    ایشین گیمز میں قومی اسکواش ٹیم چھا گئی، پاکستان ٹیم نے ہانگ کانگ کو شکست دے کر فائنل میں جگہ بنالی۔

    تفصیلات کے مطابق ایشین گیمز اسکواش کے مقابلوں میں ہانگ کانگ کو شکست دیکر پاکستان مینز ٹیم کے فائنل میں پہنچ گیا۔

    پاکستانی ٹیم نے اسکواش کے سیمی فائنل مقابلے میں ہانگ کانگ کو دو ایک سے ہرایا، پاکستان کی جانب سے ناصر اقبال اور نور زمان نے میچز جیتے جبکہ عاصم خان کو اپنے میچ میں ناکامی ہوئی۔

    نور زمان نے ہانگ کانگ کے چی ہن ہینری کو پہلے میچ میں تین ایک سے شکست دی، نور زمان کی جیت کا اسکور 10-12، 11-7، 6-11 اور 8-11 تھا۔

    دوسرے میچ میں عاصم خان کو سنسنی خیز مقابلے کے بعد شکست ہوئی، عاصم خان دو ایک کی برتری کے بعد تین دو سے ناکام ہوئے۔

    فیصلہ کن میچ میں ناصر اقبال نے منگ ہونگ ٹینگ کو باآسانی زیر کیا، ناصر کی جیت کا اسکور 3 -11، 5-11اور 5-11 رہا۔

  • جاپان نے ایشین گیمز ہاکی ایونٹ میں گولڈ میڈل جیت لیا

    جاپان نے ایشین گیمز ہاکی ایونٹ میں گولڈ میڈل جیت لیا

    جکارتہ:‌ ایشین گیمز کے ہاکی ایونٹ میں‌ جاپان نے ملائیشیا  کو شکست دے کر گولڈ میڈل اپنے نام کر لیا.

    تفصیلات کے مطابق انڈونیشیا میں‌ جاری 18 ویں ایشین گیمز کا فائنل ملائیشیا اور جاپان کے درمیان کھیلا گیا۔ اس سنسنی خیز مقابلے کا فیصلہ پینالٹی شوٹ آؤٹ پر ہوا۔

    دونوں ہی ٹیموں نے عمدہ کھیل کا مظاہرہ کیا۔ جاپان اورملائیشیا میں مقررہ وقت تک مقابلہ 6-6 گول سے برابر تھا۔

    البتہ جاپان نے پینالٹی شوٹ آؤٹ پر ملائیشیا کو 3-1 سے ہرا کر اولمپکس 2020 کے لئے کوالیفائی کرلیا۔

    مزید پڑھیں: ایشین گیمز: بھارتی ہاکی ٹیم کانسی کا تمغہ لے اڑی، پاکستان خالی ہاتھ وطن لوٹنے پر مجبور

    واضح رہے کہ جاپان نے پاکستان کو شکست دے کر فائنل  میں کوالیفائی کیا تھا، جب ملائیشیا کی ٹیم بھارت کو شکست دے کر اس مرحلے میں پہنچی تھی۔

    یاد رہے کہ آج کانسی کے تمغے کے لیے روایتی حریف بھارت اور پاکستان مدمقابل آئے تھے۔ کانٹے دار مقابلے کے بعد بھارت دو ایک سے فاتح قرار پایا اور پاکستان کو ایک بار پھر خالی ہاتھ لوٹنا پڑا۔

  • ایشین گیمز: بھارتی ہاکی ٹیم کانسی کا تمغہ لے اڑی، پاکستان خالی ہاتھ وطن لوٹنے پر مجبور

    ایشین گیمز: بھارتی ہاکی ٹیم کانسی کا تمغہ لے اڑی، پاکستان خالی ہاتھ وطن لوٹنے پر مجبور

    جکارتہ: ایشین گیمز کے ہاکی ایونٹ میں‌ بھارت نے پاکستان کو شکست دے کر تمغے سے محروم کر دیا.

    تفصیلات کے مطابق انڈونیشیا میں کھیلے جانے والے 18 ویں ایشین گیمز میں‌ شکست کے عفریت نے پاکستان کا پیچھا نہیں چھوڑا.

    تیسری پوزیشن کے میچ میں بھارت نے پاکستان کوہرا کر ایشین گیمز ہاکی ایونٹ میں کانسی کا میڈل اپنے نام کر لیا.

    بھارتی ٹیم نے پاکستان کے خلاف میچ 1-2 سے اپنے نام کیا، میچ کے آخری حصے میں پاکستان نے واپسی کی کوشش کی، جو نتیجہ خیز ثابت نہیں ہوئی.

    یاد رہے کہ ایشین گیمز ہاکی ایونٹ کے ابتدائی راؤنڈ میں پاکستان کی کارکردگی خاصی متاثر کن تھی، پاکستان لگاتار پانچ میچز جیتنے میں‌کامیاب رہا،  جس کے بعد امید کی جارہی تھی کہ پاکستانی ٹیم فائنل تک رسائی کر لے گی.

    مزید پڑھیں: ایشین گیمز ہاکی: سیمی فائنل میں پاکستان کو جاپان کے ہاتھوں شکست

    البتہ سیمی فائنل میں پاکستان کی خوش قسمتی کا سفر تمام ہوگیا، جہاں جاپان نے پاکستان کو ایک گول سے ہرا کر  گولڈ میڈل کی دوڑ سے باہر کر دیا، جاپان سے شکست کھا کر پاکستان نے اولمپکس میں براہِ راست کوالیفائی کرنے کا موقع بھی ضائع کر دیا.

    بھارت سے شکست کے بعد اب پاکستان کو خالی ہاتھ وطن لوٹنا پڑے گا.

  • ایشین گیمز: پاکستان نے والی بال ایونٹ کے فائنل میں پہنچ کر نئی تاریخ‌ رقم کر دی

    ایشین گیمز: پاکستان نے والی بال ایونٹ کے فائنل میں پہنچ کر نئی تاریخ‌ رقم کر دی

    جکارتہ: ایشین گیمز میں‌ پاکستانی ٹیم چین کو شکست دے کر والی بال ایونٹ کے فائنل میں‌ پہنچ گئی۔

    تفصیلات کے مطابق ‌انڈونیشیا میں جاری 18 ویں ایشین گیمز میں گرین شرٹس نے شان دار کارکردگی کا مظاہرہ کرتے ہوئے چین کو دو کے مقابلے میں‌ تین سیٹس سے شکست دے دی.

    اس سنسی خیز مقابلے کا پہلا راؤنڈ چین کے نام رہا، البتہ دوسرے راؤنڈ میں‌ پاکستان نے کم بیک کیا اور فتح اپنے نام کی.

    مزید پڑھیں: ایشین گیمز: پاکستان بھارت کو شکست دے کر والی بال ایونٹ کے سیمی فائنل میں پہنچ گیا

    تیسرا مرحلہ پھر چین کے نام رہا، مگر گرین شرٹ نے ہمت نہیں ہاری اور اگلےراؤنڈ میں حیران کن کارکردگی کا مظاہرہ کرتے ہوئے  مقابلہ اپنے نام کر لیا.

    یاد رہے کہ کوارٹر فائنل میں پاکستان نے روایتی حریف انڈیا کو 3-1 سے شکست دی تھی.یہ پہلا موقع ہے جب پاکستان نے ایشین گیمز والی بال ایونٹ کی 10-7 کی کیٹیگری کے فائنل تک رسائی حاصل کی.

     ایشین گیمز میں پاکستان کی کارکردگی متاثر کن رہی ہے۔ پاکستان تین میڈلز اپنے نام کر چکا ہے۔ کراٹے ایونٹ میں نرگس حمید نے کانسی کا تمغہ جیت کر نئی تاریخ رقم کی تھی۔

  • ایشین گیمز میں میڈل جیتنے والی نرگس حمید کا وطن واپسی پر شان دار استقبال

    ایشین گیمز میں میڈل جیتنے والی نرگس حمید کا وطن واپسی پر شان دار استقبال

    لاہور: ایشین گیمز میں کانسی کا تمغہ جیتنے والی نرگس حمید کا پاکستان لوٹنے پر شان دار استقبال کیا گیا.

    تفصیلات کے مطابق پاکستان کراٹے فیڈریشن کے عہدے داروں اور کھلاڑیوں نے لاہور کے نیشنل کوچنگ سینیٹر میں نرگس کا استقبال کیا.

    اس موقع پر 19 سالہ نرگس کا کہنا تھا کہ ایشین گیمز میں  میڈل جیتنے کی خوشی الفاظ میں بیان نہیں کرسکتی. اس موقع پر نرگس نے اپنے کوچز اور فیڈریشن کا بھی شکریہ ادا کیا.

    نرگس کا یہ بھی کہنا تھا کہ کہ وہ مستقبل میں عالمی سطح پر گولڈ میڈل حاصل کرنے کی کوشش کریں گی.

    یاد رہے کہ نرگس پہلی خاتون کھلاڑی ہیں، جنھوں نے انفرادی کھیل میں‌ ایشیا کی سطح‌ پر پاکستان کے لیے میڈل حاصل کیا.

    پاکستان کراٹے فیڈریشن کی سیکریٹری عندلیب سندھو نے کہا کہ نرگس کا انٹرنیشنل کراٹے میں خود کو منوانا بہت بڑا کارنامہ ہے. ساتھ ہی انھوں نے امید ظاہر کی کہ نیا پاکستان میں‌ خواتین کو خود کو منوانے کے زیادہ سے زیادہ موقع فراہم کیے جائیں‌ گے.

  • ایشین گیمز: پاکستان ہاکی ٹیم کی لگاتار پانچویں فتح، بنگلادیش کو شکست

    ایشین گیمز: پاکستان ہاکی ٹیم کی لگاتار پانچویں فتح، بنگلادیش کو شکست

    جکارتہ: ایشین گیمز ہاکی ایونٹ کے آخری گروپ میچ میں گرین شرٹس نے بنگلادیش کو پانچ صفر سے شکست دے دی۔

    تفصیلات کے مطابق انڈونیشیا میں‌ جاری 18ویں ایشین گیمز میں پاکستان ہاکی ٹیم کی شان دار کارکردگی کا سلسلہ جاری ہے، گرین شرٹس نے لگاتار پانچویں فتح اپنے نام کر لی.

    گروپ کے آخری میچ میں پاکستان اور بنگلادیش مدمقابل تھے. یہ میچ پاکستان نے بہ آسانی پانچ صفر سے اپنے نام کر لیا.

    پاکستان کی جانب سے مبشر علی اور محمد عتیق نے دو دو ، علی شان نے ایک گول کیا۔ پاکستانی ٹیم پول بی میں 15 پوائنٹس کے ساتھ پہلے نمبر پر ہے، پول اے میں بھارت سرفہرست ہے.

    مزید پڑھیں: ایشین گیمز، ہاکی ایونٹ میں پاکستان نے ملائیشیا کو 4-1 گول سے شکست دے دی

    واضح رہے کہ پاکستان اور بنگلادیش کے درمیان ہونے والا یہ میچ بھارتی ہاکی ٹیم نے بھی خصوصی دل چسپی سے دیکھا، توقع کی جارہی ہے کہ پاکستان اور بھارت ایونٹ کے فائنل میں ٹکرائیں گے.

    یاد رہے کہ پاکستان ہاکی ٹیم ایونٹ میں اب تک 45 گول کرچکی ہے، جب کہ حریف ٹیمیں صرف ایک بار گیند کو پاکستانی نیٹ میں پہنچا سکیں.

  • ایشین گیمز: پاکستان بھارت کو شکست دے کر والی بال ایونٹ کے سیمی فائنل میں پہنچ گیا

    ایشین گیمز: پاکستان بھارت کو شکست دے کر والی بال ایونٹ کے سیمی فائنل میں پہنچ گیا

    جکارتہ: پاکستانی سورماؤں نے بھارت کو شکست دے کر والی بال ایونٹ کے سیمی فائنل تک رسائی حاصل کر لی.

    تفصیلات کے مطابق پاکستان نے انڈونیشیا میں جاری 18ویں ایشین گیمز کے کوارٹر فائنل میں‌ نے شان دار کھیل کا مظاہر کرتے ہوئے بھارت کو شکست دے دی.

    اس سنسنی خیز مقابلے میں پاکستان نے روایتی حریف کو ایک کے مقابلے میں‌تین سیٹس سے زیر کیا.

    بھارت نے پہلا سیٹ اکیس پچیس سے جیت کر برتری حاصل کی تھی، جس کے بعد پاکستانی کھلاڑیوں نے بھرپور کم بیک کیا اور  لگاتار تینوں سیٹس جیت کر نیا تاریخ‌ رقم کر دی.

    واضح رہے کہ یہ پہلا موقع ہے، جب پاکستان نے ایشین گیمز کے والی بال ایونٹ میں سیمی فائنل تک رسائی حاصل کی. ایشین گیمز میں پاکستانی ایتھلیٹ کی اب تک کی کارکردگی متاثر کن رہی. میڈلز کی تعداد تین ہوگئی ہے۔

    مزید پڑھیں: ایشین گیمز 2018: ندیم ارشد نے ملک کے لیے کانسی کا تمغا جیت لیا

    یاد رہے کہ گذشتہ روز خانیوال سے تعلق رکھنے والے ندیم ارشد نے نیزہ پھینکنے کے مقابلے میں کانسی کا تمغہ اپنے نام کیا تھا. اس سے قبل اس سے قبل پاکستان کراٹے اور کبڈی میں بھی ایک ایک کانسی کا تمغہ اپنے نام کر چکا ہے.

    پاکستانی وال بال ٹیم 30 اگست کو چین کا سامنا کرے گی، تجزیہ کار کانٹے دار مقابلے کی توقع کر رہے ہیں۔

  • ہاکی کھلاڑیوں کا احتجاج رنگ لے آیا، پی ایچ ایف نے ان کے واجبات ادا کردیئے

    ہاکی کھلاڑیوں کا احتجاج رنگ لے آیا، پی ایچ ایف نے ان کے واجبات ادا کردیئے

    لاہور : پاکستان ہاکی فیڈریشن نے کھلاڑیوں اور آفیشلز کے مکمل واجبات ادا کردیئے، صدر پی ایچ ایف کا کہنا ہے کہ ہم نے عہد پوراکردیا، اب کھلاڑی وعدہ پورا کریں گولڈ میڈل جیت کر لائیں۔

    تفصیلات کے مطابق پاکستان ہاکی ٹیم کے کھلاڑیوں کا احتجاج رنگ لے آیا، پی ایچ ایف نے کھلاڑیوں اور آفیشلز کے مکمل واجبات ادا کردیئے۔

    اس حوالے سے ترجمان پی ایچ ایف نے کہا ہے کہ صدر پی ایچ ایف نے ایشین گیمز سے قبل کھلاڑیوں اور آفیشلز کے بقایا جات ادا کرنے کا وعدہ پورا کردیا ہے، بریگیڈئیر (ر) خالد سجاد نے ذاتی حیثیت میں فنڈز کا انتظام کیا ہے۔

    ترجمان پی ایچ ایف کا مزید کہنا تھا کہ کھلاڑیوں کے واجبات اکاؤنٹس میں منتقل کردیئے گئے، اس کے علاوہ غیر ملکی اسٹاف کو بھی واجبات کی ادائیگیاں کردی گئیں ہیں۔

    دوسری جانب صدر پی ایچ ایف بریگیڈئیر (ر) خالد سجاد نے کہا ہے کہ ہم نے اپنا عہد پورا کردیا اب کھلاڑیوں کی ذمہ داری ہے کہ وہ بھی وعدہ پورا کریں اور ملک کیلئے گولڈ میڈل جیت کر لائیں۔

    انہوں نے کہا کہ کھلاڑی ایشین گیمز میں بھارت کو ہرا کر قوم کو تحفہ دیں، انہوں نے کہا کہ فنڈز کے حوالے سے اسپانسرز کے ساتھ بھی رابطے میں ہیں، قومی کھیل میں بہتری کیلئے نجی سیکٹر سے مدد لے رہے ہیں۔

    مزید پڑھیں: یومیہ الاؤنسز سے محروم پاکستان ہاکی ٹیم نے ایشین گیمز کا بائیکاٹ کردی

    یاد رہے کہ پاکستان ہاکی ٹیم کے کھلاڑیوں نے واجبات کی عدم ادائیگی پر احتجاجاً آئندہ ماہ انڈونیشیا میں ہونے والے ایشین گیمز کا بائیکاٹ کردیا تھا۔

    مزید پڑھیں: پاکستان ہاکی فیڈریشن کھلاڑیوں کی مقروض

    ان کا کہنا تھا کہ اگر جیب خالی ہو تو کارکردگی کیسے دکھائیں؟ قوم کے سامنے شرمندہ ہونا نہیں چاہتے۔ ان کا مزید کہنا تھا کہ کھلاڑی تا حال یومیہ الاؤنسز سے بھی محروم ہیں، پی ایچ ایف کے جھوٹے وعدوں اور اعلانات سے گھر کا چولہا نہیں جلا سکتے۔

  • چیمپیئنز ٹرافی کیلئے اٹھارہ رکنی پاکستان ہاکی ٹیم کا اعلان

    چیمپیئنز ٹرافی کیلئے اٹھارہ رکنی پاکستان ہاکی ٹیم کا اعلان

    کراچی: اگلے ماہ بھارت میں شروع ہونے والی چیمپیئنز ٹرافی ہاکی ٹورنامنٹ کیلئے اٹھارہ رکنی پاکستانی اسکواڈ کا اعلان کردیا گیا ہے۔

    ہاکی کلب آف پاکستان میں ہونے والے ٹرائلز کے بعد سیکریٹری پی ایچ ایف رانا مجاہد نے پریس کانفرنس کرتے ہوئے حتمی اٹھارہ رکنی اسکواڈ کا اعلان کیا۔ محمد عمران کو کپتان برقرار رکھا گیا ہے، دیگر کھلاڑٰوں میں عمران بٹ،امجد علی،محمد عرفان،کاشف علی،عماد بٹ،توثیق احمد،راشد محمود،رضوان جونئیر،تصور عباس،زوہیب اشرف، وقاص شریف،شفقت رسول،ارسلان قادر،عمر بھٹہ،رضوان سینئر،محمد دلبر اور شان علی شامل ہیں۔ شہناز شیخ ہیڈ کوچ کے فرائض انجام دینگے، پاکستان ہاکی ٹیم دو دسمبر کو براستہ واہگہ بارڈ بھارت روانہ ہوگی۔

  • ایشین بیچ کبڈی گیمز:فائنل میں پاکستان کو ایران سے شکست

    ایشین بیچ کبڈی گیمز:فائنل میں پاکستان کو ایران سے شکست

    تھائی لینڈ : ایشین بیچ کبڈی گیمز میں پاکستان نے چاندی کا تمغہ جیت لیا۔ فائنل میں ایران نے پاکستان کو ہرا دیا۔ تھائی لینڈ کے شہر پکھٹ میں ایشین بیچ کبڈی گیمز کا فائنل پاکستان اور ایران کے درمیان کھیلا گیا۔

    دونوں ٹیموں کے درمیان ابتدا سے ہی کانٹے دار مقابلہ رہا۔ ایران نے جارحانہ کھیل کا مظاہرہ کرتے ہوئے پاکستان کو ستائیس کے مقابلے چالیس پوائنٹس سے ہرا کر بیچ کبڈی گیمز میں طلائی تمغہ جیتا۔

    شکست کے بعد پاکستان کے حصے میں چاندی کا میڈل آیا۔ پاکستان نے ایشین بیچ گیمز میں دو سونے اور چار، چارچاندی اور کانسی کے تمغے سینے پر سجائے۔ دس میڈلز کے ساتھ پاکستان سولہویں نمبرپررہا۔