Tag: Asian Games

انچیون : ایشین گیمز میں پاکستان ہاکی ٹیم اپنے اعزاز کا دفاع آج سری لنکا کے خلاف میچ سے کرے گی۔ایشین گیمز میں پاکستان ہاکی ٹیم گروپ اے میں سری لنکا، بھارت، چین اور اومان کے ساتھ موجود ہے۔

گروپ بی بنگلہ دیش، جاپان، جنوبی کوریا، ملائیشیا اور سنگاپور کی ٹیموں پر مشتمل ہے۔ قومی ٹیم ایونٹ میں اپنی مہم جوئی کا آغاز سری لنکا کے خلاف میچ سے کرے گی۔

ٹیم کے ہیڈ کوچ شہناز شیخ کا کہنا تھا کہ سری لنکا اتنی مضبوط نہیں ہے لیکن اس کے باوجود وہ انہیں آسان نہیں لیں گے۔ پاکستان کیلئے ہر میچ اہم ہے۔ وہ صرف جیت کے لئے میدان میں اتریں گے۔

گرین شرٹس اتوار کو چین کے مدمقابل آئیں گے۔ پچیس ستمبر کو پاکستان کا اہم میچ روایتی حریف بھارت سے ہوگا۔ اور ستائیس ستمبر کو آخری پول میچ میں قومی ٹیم اومان کا سامنا کرے گی۔ ایشین گیمز میں پاکستان آٹھ مرتبہ گولڈ میڈل اپنے نام کرچکا ہے۔