Tag: asif ali zardari contact altaf hussian

کراچی: پیپلزپارٹی کے شریک چیئرمین آصف علی زرداری نے گورنر سندھ ڈاکٹر عشرت العبادخان کو ٹیلی فون کیا ہے اور اس بات کی یقین دھانی کرائی ہے کہ اس مشکل گھڑی میں پیپلزپارٹی ، متحدہ قومی موومنٹ کے ساتھ ہے ۔

گورنر ہاؤس کے ذرائع کے مطابق گورنر سندھ ڈاکٹر عشرت ا لعباد خان کو سابق صدر آصف علی زرداری نے ٹیلی فون کیا اور اس دوران ایم کیو ایم کی صورتحال اور ان کے استعفے کے حوالے سے بات کی ، گورنر سندھ نے سابق صدر کو بتایا کہ وہ بدستور کام کررہے ہیں اور وفاقی و صوبائی حکومت کے ساتھ رابطے میں ہیں، استعفے کی خبروں کے حوالے سے کوئی صداقت نہیں ہے۔

پیپلزپارٹی کے شریک چیئرمین آصف علی زرداری کاکہنا تھا کہ پیپلزپارٹی مفاہمت کی پالیسی پر یقین رکھتی ہے ، مشکل کی اس گھڑی میں ایم کیو ایم کے ساتھ ہیں اور ساتھ لیکر چلیں گے۔

ان کاکہنا تھا کہ ایم کیو ایم اور پیپلزپارٹی مل کر سندھ کی خدمت کریں گی۔

دوسری جانب ذرائع کے مطابق رابطہ کمیٹی کے کئی گھنٹے سے جاری اجلاس میں یہ فیصلہ کیا گیا کہ فوری طور پر حکومت میں شمولیت کا فیصلہ نہیں کرسکتے، ایم کیو ایم قانونی مسائل میں الجھی ہوئی ہے ، اورایم کیو ایم پر بلاجواز آپریشن کا سلسلہ جاری ہے ،اور کارکنوں کو گرفتار کیا جارہا ہے۔

ذرائع کے مطابق رابطہ کمیٹی کے اجلاس میں غور کیا جارہا ہے کہ وہ بلاجواز آپریشن کے خلاف قانونی اور آئینی حق استعمال کرے گی، ذرائع کے مطابق ارکان رابطہ کمیٹی کا کہنا تھا کہ پیپلزپارٹی کے مشکور ہیں کہ وہ اس مشکل گھڑی میں ایم کیو ایم کا ساتھ دے رہی ہے۔

کراچی :پیپلز پارٹی کے شریک چیئرمین اور سابق صدر آصف زرداری اور ایم کیوایم کے قائد الطاف حسین کے درمیان ٹیلی فونک رابطہ ہوا، دونوں رہنماؤں نے ٹیلیفون پر سیاسی صورتحال اور ملک کودرپیش ان گنت مسائل پر تفصیلی تبادلہ خیال کیا گیا۔

زرائع کے مطابق دونوں رہنماؤں نے سیاسی صورتحال اور ملک کودرپیش ان گنت مسائل پر تفصیلی تبادلہ خیال کے ساتھ ساتھ بین الاقوامی مسائل پر بھی سیر حاصل گفتگو کی، دونوں رہنماؤں کے درمیان ماضی کی تلخیوں، بدگمانیوں اور ناانصافیوں کے بارے میں بھی تفصیلی تبادلہ خیال ہوا۔

اس موقع پر سابق صدرآصف علی زرداری نے کہا کہ اردو بولنے والوں کا بھی سندھ پر اتنا ہی حق ہے جتنا سندھی بولنے والوں کاحق ہے، انہوں نے کہاکہ اگردونوں جماعتوں کے مابین دوبارہ ساتھ چلنے کا معاہدہ ہوا تو میں یقین دلاتا ہوں کہ اس مرتبہ 40/60 کے طے شدہ معاہدے پر مکمل دیانتداری کے ساتھ عمل ہوگا۔

دونوں رہنماؤں کے مابین سینیٹ کے الیکشن کے معاملات پر بھی تفصیلی اورمثبت پیش رفت ہوئی، اس سلسلے میں جلد ہی دونوں جماعتوں کے رہنماؤں کے درمیان تفصیلی بات چیت کا آغاز ہوگا۔

سابق صدرآصف زرداری اور الطاف حسین  نے سابق وفاقی وزیرِداخلہ رحمان ملک سمیت ان تمام رہنماؤں کے کردار کو سراہا، جو لڑائی جھگڑے کے بجائے مفاہمت اوراتحاد و یکجہتی پر یقین رکھتے ہیں۔