لندن: پاکستان پیپلز پارٹی کے شریک چیئرمین اورسابق صدرآصف علی زرداری آج لندن میں پارٹی رہنماؤں سے اہم ملاقات کررہے ہیں۔
پیپلز پارٹی کے لندن میں ہونے والے اجلاس میں ملک میں درپیش سیاسی صورتحال کا بھی جائزہ لیا جائے گا اور ساتھ میں تھرپارکرکی صورتحال بھی اجلاس کے ایجنڈے میں شامل ہے۔
قحط زدہ علاقوں میں معاملات کو بہتر بنانے کیلئے ہنگامی بنیادوں پرکام کے احکامات جاری کئے جائیں گے، اجلاس کے بعد سابق صدر آصف علی زرداری پریس کانفرنس بھی کریں گے ۔
اسلام آباد: نیب عدالت میں آصف علی زرداری کی ریفرنسز میں بریت کی درخواست کی سماعت ہوئی ، قومی احتساب بیورو نے ایس جی ایس اور کو ٹیکنا ریفرنسز پر دلائل مکمل کر لئے ہیں۔
اسلام آباد کی احتساب عدالت کے جج محمد بشیر نے آصف علی زرداری ریفرنسز میں بر یت کی درخواست پر سماعت کی، نیب کے دلائل مکمل ہونے پرمقدمے کی مزید کارروائی سترہ نومبر تک ملتوی کردی گئی، اگلی سماعت پر اے آر وائی آرسز ٹریکٹر ریفرنسز پر نیب دلائل دیں گے۔
آصف زرداری کے وکیل فاروق ایچ نائیک نے امید ظاہر کی کہ مقدمے میں انصاف ملے گا۔
کراچی: پیپلزپارٹی کی جانب سے گزشتہ روز جناح باغ کراچی میں عوامی و سیاسی قوت کا مظاہرہ کیا گیا، پیپلز پارٹی کے چئیرمن بلاول بھٹو نے اپنے سیاست کا عملی طور پر آغاز کر تے ہو ئے تقرر کے دوران عمران خان اورشریف برادران پر شدید تنقید کی، بلاول نے اسلام آباد دھرنوں کواسکرپٹ قراردے دیا۔ بلاول نے کہا کہ کٹھ پتلی وزیراعظم کےآنےتک یہ اسکرپٹ ختم نہیں ہوگا۔
گزشتہ شب کراچی میں جناح باغ میں بلاول بھٹو نے جلسے کے دوران دھواں دھار تقریر کرتے ہو ئے حکمران جماعت کو آڑے ہاتھوں لیا اور وزیراعلیٰ پنجاب کو مخاطب کر تے ہو ئے کہا کہ مارتے بھی ہو اور رونے بھی نہیں دیتے۔ دوسری جانب انھوں نے ایم کیو ایم کوساتھ چلنے کی دعوت دی اور ساتھ ساتھ شدید تنقید کا نشانہ بھی بناتے رہے۔ بلاول کا کہنا تھا کہ دوہزار اٹھارہ میں اگر صاف شفاف الیکشن ہو ئے تو کراچی کا ہر شہری بو کاٹا کہے گا۔
جلسے سے سابق صدرآصف زرداری نے بھی خطاب کیا اورعمران خان پر شدید تنقید کرتے ہو ئے کہا کہ اسلام آباد میں ایک مداری نے کھیل لگایا ہوا ہےاور پیپلز پارٹی جانتی ہے کہ کون ان جلسوں اور دھرنوں کو فنانس کررہا ہے۔
پیپلز پارٹی کی جانب سے کراچی جناح باغ پر ہو نے والے عوامی جلسے سے پیپلز پارٹی کے سابق وزراعظم، سابق اسپیکر قومی اسمبلی اور دووزراعلی نے بھی خطاب کیا۔ جلسے سے خطاب کر تے ہو ئے اعتزازاحسن کا کہنا تھا کہ ملتان کی ہارپر ہمیں معافی مانگنی چاہیے۔
لاہور: سابق صدر آصف علی زرداری نے کہا ہےکہ موجودہ حالات میں ٹیکنو کریٹ سیٹ اپ یا آمریت کی گنجائش نہیں۔ ملتان این اے ایک سو انچاس کے امیدوار عامر ڈوگرنے اپنے والد کی زبان کی بھی لاج نہیں رکھی۔
بلاول ہاؤس لاہور میں ایک تقریب سے خطاب کرتے ہوئے سابق صدر آصف علی زرداری کا کہنا تھا کہ پہلی بار اپوزیشن حکومت کے ساتھ صرف جمہوریت کیلئے کھڑی ہے۔
پیپلز پارٹی کی وجہ سے مخالفین کو حکومت گرانے کا موقع نہیں مل رہا۔ بہت جلد یہ بلبلے ختم ہوجائیں گے۔ سابق صدر آصف علی زردای نے ملتان این اے ایک سو انچاس کے امیدوار عامر ڈوگرکو بھی سخت تنقید کا نشانہ بنایاْ۔
ان کا کہنا تھا کہ جو پیپلز پارٹی چھوڑ کرگیا وہ ہمیشہ دربدر ہوا۔عامر ڈوگر نے پیپلز پارٹی چھوڑ کر اپنے والد کی زبان کی بھی لاج نہیں رکھی، ان کا کہنا تھا کہ سابق چیف جسٹس نے ہمارے منتخب وزیراعظم کو گھر بھیجا اور دوسرے پر بھی مقدمات چلائے.
عدالت عظمیٰ پیپلز پارٹی کے سابقہ دور میں ترقی کی راہ میں رکاوٹ بنی رہی۔ سابق صدر آصف علی زرداری نے اس موقع پر حاضرین کو بتایا کہ بہت جلد آصفہ اور بختاور بھی عملی سیاست میں سرگرم ہونگی۔
لاہور: میاں منظور وٹو اوراشرف سوہنا کے حامیوں نے وہ نعرے لگائے کہ زمین ہل گئی، لاہور میں سابق صدرآصف علی زردای کی زیر صدارت پیپلز پارٹی پنجاب کی ڈویژنل تنظیموں کا اجلاس جاری تھا کہ منظور حسین وٹو اور اشرف خان سوہنا کے کارکنوں کے درمیان نعرے بازی شروع ہو گئی ۔
ایک جانب سے گو وٹو گو کے نعرے تھے تو دوسری جانب گو سوہنا گو کے نعروں سے ہال گونجنے لگا، جس پر آصف علی زرداری نے مداخلت کرتے ہوئےمعاملے کو رفع دفع کرایا لیکن اجلاس کے بعد باہر آتے ہی دونوں گروپ ایک بار پھر نعرے بازی کرنے لگے ۔
اس موقع پر میاں منظو روٹو کے حامیوں کا کہنا تھا کہ اشرف سوہنا نے ایک بار منظور وٹو کے خلاف نازیبا زبان استعمال کی تھی، اس موقع پر اشرف سوہنا کے حامی بھی میاں منظوروٹو کے خلاف نعرے لگاتے رہے ۔
پیپلزپارٹی پنجاب کے صدر میاں منظور وٹو کا کہنا تھا کہ انہیں نعروں کی پروا نہیں یہ پیپلز پارٹی کا کلچر ہے اگر نعرے نہ لگیں تو یہ پیپلز پارٹی نہیں رہے گی بلکہ مسلم لیگ بن جائے گی۔
لاہور: پیپلزپارٹی کے شریک چیئرمین اور سابق صدر آصف علی زرداری نے پشاورمیں بھی بلاول ہاؤس بنانے کا اعلان کر دیا۔
بلاول ہاؤس لاہور میں پیپلزپارٹی خیبر پختونخواہ کے اجلاس کی صدارت کرتے ہوئے آصف علی زرداری کا کہنا تھا کہ بھارت اتناشریف ملک نہیں ہے کہ اس کا نوٹس نہ لیا جائے، ہندوستان ورلڈ اکانومی کا چیمپئن بننا چاہتا ہے، ہم میوزیکل چیئر کی سیاست ختم کرنا چاہتے ہیں۔
اُنہوں نے عمران خان کو شدید تنقید کا نشانہ بناتے ہوئے کہا کہ وہ جو جنت بنانا چاہتے ہیں خیبرپختونخو میں بنالیں وہ اٹھارہ سال کے نوجوانوں کو بے وقوف بنارہے ہیں، اُن کا یہ بھی کہنا تھا کہ ووٹر کیلئے اٹھارہ سال کی عمر پرویز مشرف نے عمران خان کیلئے رکھوائی تھی ۔
اُنہوں نے کہا کہ بھٹو کا اسٹائل اپنانے سے کوئی بُھٹو نہیں بن سکتا، اُنہوں نے خیبر پختونخواہ میں بلاول ہاوس بنانے کا اعلان کرتے ہوئے کہاپارٹی کو یونین کونسل کی سطع پر منظم کیاجائے گا، کارکنوں کے مسائل حل کیئے جائینگے ۔ آصف علی زرداری کا کہنا تھا کہ القاعدہ کے بعد اب داعش کی دہشتگردی پھیلتی جا رہی ہے۔
آصف علی زرداری نے شہاز شریف کے بارے میں کہا وہ اپنے ارکان کو فنڈ نہیں دیتے اس لیئے ہمارے ارکان گلہ نہ کریں ۔
لاہور: پیپلز پارٹی کے شریک چیئرمین آصف زرداری نے کہا ہے الیکشن تین سال تک ہوں یا اس کے بعد فیصلہ پیپلز پارٹی ہی کرے گی۔
پیپلز پارٹی کے شریک چیئرمین آصف زرداری کی زیرصدارت پیپلز پارٹی فیصل آباد ڈویژن کا اجلاس ہوا، جس میں سابق صدر کا کہنا تھا کہ الیکشن تین سال تک ہوں یا اس کے بعد فیصلہ پیپلز پارٹی کرے گی، آصف زرداری نے تحریک انصاف کے چیئرمین عمران خان کو تنقید کا نشانہ بناتے ہوئے کہا کہ عمران خان سیاست کا بلبلہ ہیں،ان کی بھاگ ڈور کسی اور کے ہاتھ میں ہے۔
ان کا کہنا تھا کہ گو نواز گو کے نعرے لگانے والے یاد رکھیں کہ گو عمران گو کے نعرے بھی لگ سکتے ہیں، سیاست میں شائستگی کا دامن کسی ہاتھ سے نہیں چھوڑنا چاہیئے۔ نواز شریف کا ساتھ جمہوریت بچانے کیلئے دیا ہے۔ پیپلز پارٹی اپوزیشن کی فرینڈلی جماعت نہیں، پیپلز پارٹی کے اعلٰی عہدیدار اور سابق وفاقی وزیر دفاع احمد مختار نے بھی شریک چیئرمین سے علیحدگی میں ملاقات کی۔
لاہور: تحریک انصاف کے بانی وائس چیئرمین وائس ایڈمرل ریٹائرڈ جاوید اقبال نے آصف زرداری کے ساتھ ملاقات کے بعد پیپلز پارٹی میں شمولیت اختیار کر لی۔ ان کا کہنا ہے کہ اصل مرد حر آصف زرداری ہیں۔
وائس ایڈمرل ریٹائرڈ جاوید اقبال نے پیپلز پارٹی میں شمولیت کا اعلان بلاول ہاؤس لاہور میں آصف زرداری کی زیرصدارت پیپلز پارٹی راولپنڈی ڈویژن کے اجلاس میں کیا۔
جس میں سابق وزیراعظم راجہ پرویز اشرف بھی شریک تھے۔ اجلاس سے خطاب کرتے ہوئے وائس ایڈمرل ریٹائرڈ جاوید اقبال کا کہنا تھا کہ پیپلز پارٹی میں ان کی شمولیت غیرمشروط ہے، وہ آج سمجھتے ہیں کہ ان کی آنکھوں پر پٹی بندھی ہوئی تھی، اس لئے حقائق کا ادراک نہ کر سکے۔
انہوں نے کہا کہ شریف برادران، عمران خان اور ڈاکٹر عبدالقدیر خان کے ساتھ کام کیا ہے لیکن وہ محسوس کرتے ہیں کہ اصل مرد حر آصف زرداری ہیں۔ جاوید اقبال نے کہا کہ ذوالفقار بھٹو سے بھی ان کی ملاقاتیں تھیں۔
وہ پیپلز پارٹی کے منشور سے اتفاق کرتے ہیں۔ آصف زرداری سے سابق وزیر پٹرولیم ڈاکٹر عاصم حسین کی قیادت میں ینگ سی ای اوز کے ایک وفد نے بھی ملاقات کی اور باہمی دلچسپی کے امور پر تبادلہ خیال کیا۔
لاہور: سابق صدر آصف زرداری نے پیپلزپارٹی کے کارکنوں سے کہا ہے کہ دوپہلوان آپس میں لڑرہے ہیں، اس لیئے وہ موقع سے فائدہ اُٹھائیں اور تنظیم سازی پر توجہ دیں۔
بلاول ہاوس لاہور میں کارکنوں کے وفد سے بات کرتے ہوئےسابق صدر آصف علی زرداری نے کہا کہ میرے بزرگوں نے سندھ میں مدرستہ اُلا اسلام بنایا جس میں قائداعظم نے تربیت حاصل کی لیکن ہم نے اس سے سیاسی فائدہ نہیں اُٹھایا، اُنہوں نے کارکنوں سے کہا کہ دو پہلوان لڑرہے ہیں آپ پارٹی کی تنظیم نو کریں اُنہوں نے کہا کہ سیاست کے پانچ مونہہ ہوتے ہیں، جن لوگوں نے میرے خلاف غلط زُبان استعمال کی تھی اب وہ اُن کے گلے آگئی ہے ۔
اُنہوں نے کہا کہ کارکنوں کے صبرسے ملک اورپارٹی کو فائدہ ہوا ہے، پاکستان شام اور عراق بننے جارہا تھا ہم نے پاکستان کو بچایا، آصف زرداری کا کہنا تھا کہ پاکستان کو لاحق خطرات اورمسائل کو تمام سیاسی جماعتوں کو سنجیدگی سے لینا چاہئیےاجلاس کے بعد پارٹی کے سیکریٹری اطلاعات فیصل میر نے صحافیوں کو بریفنگ دیتے ہوئے بتایا کہ کارکنوں اور رہنماوں نے پارٹی قیادت پر اپنے بھرپور اعتماد کا اظہار کیا۔
اسلام آباد: ڈاکٹرطاہرالقادری کا کہنا ہے کہ عوام کو جان بوجھ کر جہالت کے اندھیروں میں رکھا جاتا ہے اور یہ جمہوری نہیں آمرانہ رویہ ہے۔
پاکستان عوامی تحریک کے سربراہ نے انقلاب مارچ کے شرکاء سے خطاب کرتے ہوئے کہا تھا کہ یہ آمروں کا طریقہ ہے کہ عوام کو جہالت کی چھری سے ذبح کردیتے ہیں۔
ان کا کہنا تھا کہ موجودہ سیاست دانوں نے سیاست کا چہرہ اس قدر مسخ کردیا ہے کہ اب کوئی شخص تبدیلی کی بات بھی کرتا ہے تو عوام بھروسا کرتے ہوئے ڈرتے ہیں۔
ڈاکٹر طاہرالقادری نے پیپلز پارٹی کے شریک چیئرمین آصف علی زرداری کو تنقید کا نشانہ بناتے ہویئ کہا کہ وہ ان کی حقیقت سے واقف ہیں اور سب جانتے ہیں کہ زرداری کے بچے کتنے پاکستانی ہیں۔
انہوں نے خطاب کے دوران اعلان کیا کہ فیصل آباد اورلاہور میں جلسوں کے بعدکے بعد تیسرا جلسہ ایبٹ آباد میں ہوگا۔
پاکستان پیپلز پارٹی کے سینیٹر بابر اعوان نے ڈاکٹرطاہر القادری کے لئے اونٹ کا تحفہ بھیجا جسے پاکستان عوامی تحریک کے رہنماء رحیق عباسی دھرنے میں لے کر داخل ہوئے۔