کراچی : وزیراعظم عمران خان نے کہا ہے کہ ہم نے 20روپے پیٹرول اور فضل الرحمان کو کم کیا، اندرون سندھ والوں سے کہتا ہوں کہ زرداری سے آزادی کا وقت آگیا ہے۔
کراچی میں گورنر ہاؤس میں پی ٹی آئی کے کارکنوں سے خطاب میں ان کا کہنا تھا کہ مجھے آپ کے جوش اور جنون کا اندازہ ہے۔
علی زیدی اوران کی ٹیم کو سندھ کے دورے پرخراج تحسین پیش کرتا ہوں، سندھ کے دورے سے واضح ہوگیا پورے پاکستان میں سب سے زیادہ تبدیلی سندھ چاہتا ہے، سندھ کے لوگ ڈاکو زرداری سے آزادی چاہتے ہیں۔
وزیراعظم عمران خان کا سندھ کے دورے کا اعلان
وزیر اعظم نے کہا کہ اگلی بار اندرون سندھ کے دورے پر آپ کے ساتھ آرہا ہوں،14سال زرداری مافیا نے جو سندھ کے ساتھ کیا ہے اس کا حساب لیں گے، اندرون سندھ والوں سے کہتا ہوں کہ اب زرداری سے آزادی کا وقت آگیا ہے۔
عمران خان نے کہا کہ کراچی کے لوگوں کو کے سی آر کی مبارکباد دیتا ہوں، گرین لائن آچکی ہے کے سی آر بننے والی ہے، کراچی میں کسی حکومت نے وہ کام نہیں کئے جو ہم کرنے جارہے ہیں۔
عمران خان نے کہا کہ صرف عدم اعتماد میں نہیں پھنسے کپتان نے آگے کی تیاری کی ہوئی ہے، میں رکوں گا نہیں ان کے پیچھے جاؤں گا ،چھوڑوں گا نہیں، میرے ہاتھ پر جو زنجیر بندھی ہوئی تھی وہ اب کھل جائے گی۔
میرا پہلا نشانہ آصف زرداری ہوگا
وزیراعظم کا کہنا تھا کہ میرا پہلا نشانہ آصف زرداری ہوگا، زرداری تمہارا وقت آگیا ہے، زرداری کو جب نیب بلاتی ہے تو کمر میں درد ہوجاتا ہے۔
ان کا کہنا تھا کہ پاکستانیوں کا شکریہ جنہوں تاریخ کا سب سے زیادہ ٹیکس ہماری حکومت کو دیا، ہم نے 20روپے پیٹرول اور فضل الرحمان کو کم کیا، پاکستان میں پیٹرول اور فضل الرحمان دبئی سے زیادہ سستا ہے۔
،وزیراعظم نے کہا کہ اللہ کا شکر ہے کہ ہمارا ملک صحیح راستے پر نکل گیا ہے، ہم نے ملک کو دیوالیہ ہونے سے بچایا، ہماری حکومت ہر بحرانوں سے نکلتی جا رہی ہے۔
تحریک عدم اعتماد کا بہت دیر سے انتظار کررہا تھا
وزیراعظم کا کہنا تھا کہ ڈاکوؤں کے گلدستے کو اب خوف آنا شروع ہوگیا ہے، انہوں اسمبلی میں میرے خلاف تحریک عدم اعتماد جمع کرائی ہے، انہوں نے وہ کام کیا جس کی میں اللہ سے دعا کررہا تھا۔
عمران خان نے کہا کہ جب گیدڑ کی موت آتی ہے تو شہر کی طرف بھاگتا ہے، ان کی سیاسی موت آئی ہے تو انہوں نے تحریک عدم اعتماد جمع کرائی، میں بڑی دیر سے ان چوروں اور ڈاکوؤں کا انتظار کررہا تھا۔
وزیر اعظم نے کہا کہ میں 25سال سے ان چوروں کیخلاف سیاست نہیں بلکہ جہاد کررہا ہوں، میں ساڑھے3سال سے ملک کو سنبھال رہا تھا۔
یہ لوگ ملک سے اربوں ڈالر چوری کرکے بیرون ملک لے کرگئے میں سوچ رہا تھا کہ کسی طرح ان کی گردن میرے ہاتھ میں آجائے۔
کپتان نے آگے کی تیاری کی ہوئی ہے
انہوں نے کہا کہ یہ صرف عدم اعتماد میں ہی نہیں پھنسے بلکہ کپتان نے آگے کی تیاری کی ہوئی ہے، میں رکوں گا نہیں ان کے پیچھے جاؤں گا، چھوڑوں گا نہیں، میرے ہاتھ پر جو زنجیر بندھی ہوئی تھی وہ اب کھل جائے گی۔
