لاہور(26 جولائی 2025): پاکستان شوبز انڈسٹری کے معروف اداکار عاصم بخاری کی صحت سے متعلق اہم خبر سامنے آگئی۔
عاصم بخاری پاکستان کے ایک تجربہ کار اداکار ہیں، انہوں نے ڈراموں، فلموں اور تھیٹر میں کام کیا ہے ساتھ ہی انہوں نے ملک کی ثقافت اور فن میں اہم کردار ادا کیا ہے۔
حال ہی میں عاصم بخاری سے متعلق یہ خبریں زیرگردش تھیں کہ انہیں دل کا دورہ پڑا ہے اور وہ لاہور کے پنجاب انسٹیٹیوٹ آف کارڈیالوجی میں زیر علاج ہیں۔
رپورٹس میں بھی بتایا گیا تھا کہ زائد العمری سمیت دیگر پیچیدگیوں کی وجہ سے عاصم بخاری کو پھیپھڑوں میں بھی مسائل ہیں اور انہیں سانس لینے میں دشواری کا سامنا ہے۔
تاہم اب عاصم بخاری نے خود ایک ویڈیو پیغام جاری کیا ہے جس میں انہوں نے اپنی صحت سے متعلق مداحوں کو خبر دی ہے۔
سینئر اداکار نے مختصر ویڈیو میں دل کا دورہ پڑنے سے متعلق خبروں پر بات کرتے ہوئے فینز کو بتایا کہ میرے سے متعلق خبریں چل رہی ہیں کہ مجھے دل کا دورہ پڑا ہے اور میں امراض قلب کے باعث اسپتال میں زیر علاج ہوں لیکن حقیقت میں ایسا نہیں۔
عاصم بخاری کا کہنا تھا کہ’ میرا اسپتال میں علاج جاری ہے اور الحمدللہ میں صحتیاب ہو رہا ہوں، ڈاکٹرز بہت عمدہ طریقے سے کام کر رہے ہیں اور اب میری طبیعت پہلے سے کافی بہتر ہے۔’
اداکار نے واضح کیا کہ’وہ امراض قلب میں زیر علاج نہیں بلکہ اپنے ذاتی معالج کے تحت زیر علاج ہیں اور ان کی صحت پہلے سے بہتر ہے۔
اگرچہ انہوں نے بتایا کہ وہ امراض قلب میں زیر علاج نہیں، تاہم انہوں نے واضح طور پر اپنی بیماری سے متعلق کچھ نہیں بتایا لیکن مختصر ویڈیو میں انہیں آکسیجن کی نلکی کے ساتھ دیکھا جا سکتا ہے۔