اسلام آباد: اقوام متحدہ میں پاکستانی مندوب عاصم افتخار نے کہا ہے کہ پاکستان بھارت کے ساتھ مستقل بنیادوں پر جنگ بندی کے لیے پرعزم ہے۔
تفصیلات کے مطابق اقوام متحدہ میں پاکستانی مندوب عاصم افتخار نے برطانوی ٹی وی سے گفتگو میں کہا ’’جنگ بندی کے لیے پاکستان نے امریکی صدر کے کردار کو سراہا، پاکستان بھارت کے ساتھ مستقل بنیادوں پر جنگ بندی کے لیے پرعزم ہے۔‘‘
انھوں نے کہا صورت حال اب بھی نازک اور غیر یقینی کا شکار ہے، کیوں کہ پاکستان اور بھارت کے درمیان مسئلہ کشمیر اہم اور حل طلب معاملہ ہے، مسئلہ کشمیر کو کشمیری عوام کی خواہشات کے مطابق حل کیا جانا چاہیے، جنوبی ایشیا میں پائیدار امن کے لیے مسئلہ کشمیر کا حل ضروری ہے۔
پاک بھارت چھوٹی نہیں بڑی ایٹمی طاقتیں ہیں، ایٹمی جنگ کے قریب تھے، ڈونلڈ ٹرمپ
دریں اثنا، یو این پاکستانی مشن، نیویارک قونصلیٹ میں یوم تشکر منایا گیا، اس موقع پر اپنے خطاب میں اقوام متحدہ میں پاکستان کے مستقل مندوب عاصم افتخار کا کہنا تھا کہ پوری قوم کو اپنی افواج کی جرات پر فخر ہے، جس نے بھارت کی بالادستی کے خواب چکنا چور کر دیے۔
انھوں نے کہا قوم بھارتی جارحیت کے خلاف متحد ہے اور رہے گی، پاکستان کا مؤقف یو این چارٹر، عالمی قانون پر مبنی ہے، بھارت نے خود مختاری کی خلاف ورزی کی، ہم نے تحمل کا مظاہرہ کیا، بھارتی قیادت کے بیانات خطے کے امن کے لیے خطرہ ہیں۔
پاکستانی قونصل جنرل عامر اتوزئی نے کہا کہ پہلگام واقعے پر پاکستان کا ردعمل ذمہ دارانہ تھا، جنوبی ایشیا میں امن کا دار و مدار مسئلہ کشمیر کے حل پر ہے۔
