Tag: aslaha baramad

کمالیہ : رفیقی ایئر بیس پاک فضائیہ کے نواحی علاقہ چک نمبر 301گ ب سے کالعدم تنظیم غلبہ اسلام کے دودہشت گردوں سے دوران تفتیش ڈیڑھ کلو وزنی دستی بم ،ہینڈ گرنیڈ اور ڈیٹو نیٹر بم برآمد کرلیے گئے.۔

دو ہفتے قبل 16 دسمبر کو کائونٹر ٹیررازم ڈیپارٹمنٹ نے ڈسٹرکٹ جیل ٹوبہ ٹیک سنگھ کے قریب آبادی سے تحریک غلبہ اسلام کے ایک کارکن حماد غالب اور اسکے چچا زاد بھائی ارباز غالب کو حراست میں لیا تھا ،اور ان سے پاک فوج کے خلاف ترانہ پر مشتمل ایک کیسٹ برآمد ہوئی تھی ، جس پر کائونٹر ٹیرر ازم ڈیپارٹمنٹ نے انکے خلاف دہشت گردی کی دفعات کے تحت مقدمہ درج کرکے کارروائی شروع کررکھی تھی ۔

دوران تفتیش حماد غالب اور ارباز غالب نے انکشاف کیا کہ ان کے ڈیرے پر دھماکہ خیز مواد موجود ہے ،جسے انہوں نے زمین میں گڑھا کھود کر چھپا رکھا ہے ،جس پر سول ڈیفنس عملہ نے کائونٹر ٹیررازم ڈیپارٹمنٹ اور پولیس کے ہمراہ چک نمبر 301گ ب میں انکے ڈیرہ پر چھپائے گئے دھماکہ خیز مواد کو برآمد کرلیا ،اور سول ڈیفنس آفس میں لاکر اسے ناکارہ بنایا ۔

،سول ڈیفنس بم ڈسپوزل کے ٹیکنیشن محمد عارف نے بتایا کہ تقریباً دو کلو گرام دھماکہ خیز مواد پر مشتمل یہ دیسی ساختہ بم چلانے کیلئے بالکل تیار تھا ،اور کہیں بھی تباہی پھیلانے کیلئے استعمال کیا جاسکتا تھا ،جبکہ ہینڈ گرنیڈ درہ خیل ساخت کا ہے ۔

بتایا گیا ہے کہ حماد غالب اسلام آباد کے ایک مدرسہ میں مدرس تھا دہشت گردوں نے افغانستان سے جہادی تربیت اور بارود تیار اور استعمال کرنے کی بھی تربیت حاصل کی ہوئی ہے ۔

دہشت گردوں نے اپنی ایک ویب سائٹ بھی تیار کی ہوئی تھی جس کی مدد سے دہشت گرد ایک دوسرے کو معلومات فراہم کرنے کے ساتھ ساتھ پیغام رسانی کا بھی کام لیتے تھے ان دہشت گردوں کو سی ٹی ڈی ٹوبہ ٹیک سنگھ نے خفیہ معلومات حاصل کرنے کے بعد 16دسمبر کو حراست میں لے کر ان کے خلاف انسداد دہشت گردی 9AWکے تحت مقدمہ درج کرکے تفتیش کا عمل شروع کیا تھا۔

اس حوالہ سے ڈسٹرکٹ انچارج سی ٹی ڈی نے ہمارے نمائندہ کو بتایا کہ دیگر ملزمان کی گرفتاری کے لئے متعدد مقامات پر تشکیل دی گئی ٹیمیں روانہ کردی گئی ہیں اور بہت بڑی کامیابی کی امید ہے۔