امریکا کے سابق صدر ڈونلڈ ٹرمپ کے مشیر قومی سلامتی کا کہنا ہے کہ ٹرمپ شام کے صدر بشار الاسد کو قتل کروانا چاہتے تھے، انہیں اس اقدام سے یہ کہہ کر باز رکھا گیا کہ یہ اقدام جنگ تصور کیا جائے گا۔
بین الاقوامی میڈیا کے مطابق برطانوی نشریاتی ادارے بی بی سی کے ساتھ تیار ہونے والی ایک دستاویزی فلم کے حوالے سے بات کرتے ہوئے سابق امریکی صدر ڈونلڈ ٹرمپ کے سابق مشیر میک فارلینڈ نے کہا ہے کہ سنہ 2017 میں انہوں ںے بشار الاسد کو قتل کروانے کی بات کی تھی۔
امریکا میں قومی سلامتی کے مشیر کی حیثیت سے فرائض سنجام دینے والے میک فارلینڈ کا کہنا تھا کہ سول آبادی پر سارن گیس حملے کی تصاویر دیکھنے کے بعد صدر ٹرمپ نے زور دے کر کہا تھا کہ اسے اقتدار سے بے دخل کرو۔
مشیر نے بتایا کہ میں نے صدر ٹرمپ سے کہا کہ آپ یہ نہیں کرسکتے جس پر انہوں نے استفسار کیا کہ کیوں، تو میں نے جواب دیا کہ اسے جنگی اقدام تصور کیا جائے گا۔
میڈیا رپورٹ کے مطابق اپریل 2017 میں صدر بشار الاسد کی حکومت نے مغربی شام کے خان شیخون قصبے میں گیس کا حملہ کیا تھا جس میں 90 افراد ہلاک ہوگئے تھے۔
