ARYNews.tv | Urdu – Har Lamha Bakhabar

Tag: ATR plane of PIA

  • اے ٹی آرطیارے ایک بارپھرگراؤنڈ، متعدد پروازیں منسوخ

    اے ٹی آرطیارے ایک بارپھرگراؤنڈ، متعدد پروازیں منسوخ

    کراچی: سول ایوی ایشن اتھارٹی نے پی آئی اے کے خلاف سخت ایکشن لیتے ہوئے اسے تمام اے ٹی آر طیارے گراؤنڈ کرنے کی ہداہت دے دی،قبل ازیں حویلیاں حادثے کے بعد بھی ان طیاروں کو گراؤنڈ کیا گیا تھا۔

    تفصیلات کے مطابق سول ایوی ایشن اتھارٹی نے اپنے شدید تحفظات کا اظہار کرتے ہوئے پی آئی اے کو تمام اے ٹی آر طیاروں کو گراؤنڈ کرنے کا کہا ہے کیونکہ یہ طیارے قواعد و ضوابط پر پورے نہیں اتر رہے جس پرخدشہ ظاہر کیا جارہا تھا کہ سو گھنٹے پرواز کے بجائے 500 گھنٹوں کے بعد اس کے انجنوں کی مرمت کی جارہی تھی۔

     اس صورتحال پراعتراض کرتے ہوئے سول ایوی ایشن اتھارٹی نے کہا کہ ہر سو گھنٹے کے اندر اندر جہازوں کا فلٹر تبدیل کیا جائے، ان ہدایات کے بعد پی آئی اے کی جانب سے متعدد پروازوں کو منسوخ کرنا پڑا۔

    مزید پڑھیں : شیک ڈاؤن ٹیسٹ‘پی آئی اے کےاے ٹی آر طیارےگراؤنڈ

    پی آئی اے نے اندرونِ ملک چلنے والی چھ سے زائد اے ٹی آر طیاروں کی پروازوں کو منسوخ کیا۔ دوسری جانب اے ٹی آر طیارے گراؤنڈ ہونے کے باعث پروازیں منسوخ ہونے سے مسافروں کو شدید مشکلات کا سامنا کرنا پڑا۔ مسافروں کا کہنا ہے کہ ایئر لائن کی جانب سے اٹھائے گئے اقدام کی پیشگی اطلاع نہیں دی گئی۔

    مزید پڑھیں : پی آئی اے کے نو میں سے چار اے ٹی آرطیارے خراب نکلے

    یاد رہے کہ اس سے قبل حویلیاں سانحہ کے بعد 12 دسمبر کو بھی سول ایوی ایشن کی جانب سے تمام 10 اے ٹی آر طیاروں کو جانچ پڑتال کے لیے گراؤنڈ کیا گیا تھا جس کے بعد چار طیارے خراب حالت میں نکلے تھے۔

  • پی آئی اے کے نو میں سے چار اے ٹی آرطیارے خراب نکلے

    پی آئی اے کے نو میں سے چار اے ٹی آرطیارے خراب نکلے

    اسلام آباد : حویلیاں طیارہ حادثے کے بعد گراؤنڈ کئے گئے اے ٹی آر طیاروں کی جانچ پڑتال میں چار طیارے خراب ہونے کاانکشاف ہوا ہے، پی آئی حکام کے مطابق نو میں سے پانچ جہازوں کو قابل پرواز قراردیا گیا ہے۔

    تفصیلات کے مطابق پی آئی اےحکام نے سینیٹ کی قائمہ کمیٹی کو بریفنگ دیتے ہوئے اہم رازکا پردہ فاش کردیا۔ سینیٹ کی قائمہ کمیٹی کی ممبرز پی آئی اے حکام کے انکشاف پر چونک اٹھے۔

    پی آئی اے حکام کا کہنا تھا کہ حویلیاں سانحے کے بعد جب طیاروں کو گراؤنڈ کرکے ان کی جانچ پڑتال کی گئی تو نو میں سے چار طیارے قابل پرواز نہیں تھے، جبکہ انسپکشن کے بعد پانچ طیارےآپریشنل ہیں۔

    مزید پڑھیں: شیک ڈاؤن ٹیسٹ‘پی آئی اے کےاے ٹی آر طیارےگراؤنڈ

    سینیٹرشاہی سید نےسوال کیا کہ کیا انسپکشن میں چاروں طیارے خراب نکلے تو پی آئی اے حکام جواب ہی گول کرگئے، چیئرمین کمیٹی طلحہ محمود نے پوچھا کہ بکرے کاٹنے والا کون تھا؟ صدقہ دینا اچھا کام ہے آپ نے بکرے ہی کاٹنے ہیں تو وہ آدھے گھنٹےکا کام ہے۔

    مزید پڑھیں: اے ٹی آر طیارے کی اڑان سے قبل کالے بکرے کا صدقہ

    ایم کیوایم کے طاہر مشہدی نے کہا کہ پی آئی اے تو پہلے ہی دعاؤں پرچل رہی ہے اب اسے صدقے دینے کی نوبت آگئی۔ ایک طیارہ گراتو آپ کو انسپکشن کا خیال آیا۔ اتنے عرصےسے کیا کررہے تھے؟

    مزید پڑھیں : پی آئی اے کے ایک اور اے ٹی آر طیارے میں آتشزدگی

  • تباہی سے کچھ دیر قبل طیارے سے اترنے والے مسافر کے انکشافات

    تباہی سے کچھ دیر قبل طیارے سے اترنے والے مسافر کے انکشافات

    چترال: حادثے کا شکار طیارے سے ایک پرواز قبل اترنے والے مسافر نے انکشاف کیا ہے کہ طیارے میں دھماکا ہوا تھا، بائیں ونگ میں ارتعاش ہوا اور لینڈنگ ایسی ہوئی جیسے آسمان سے زمین پر پھینک دیا گیا ہو۔

    تفصیلات کے مطابق بدقسمت طیارے میں سفر کرنے والے ایک مسافر نے طیارے سے متعلق اہم انکشافات کیے ہیں، مسافر چترال میں اتر گیا تھا بعدازاں جہاز وہاں سے اسلام آباد کے لیے روانہ ہوا اور پہاڑوں میں گرگیا۔

    چترال کے وکیل وقاص احمد، 7 دسمبر کو 20 منٹ قبل اسی طیارے میں سوار تھے جو حویلیاں میں حادثے کا شکار ہوا، وقاص احمد پی آئی اے کے اے ٹی آر طیارے میں شام 3 بجے پشاور سے چترال پہنچے تھے۔

    مسافر وقاص نے بتایا کہ پشاور سے چترال آتے ہوئے طیارے میں دھماکا ہوا، طیارے کے بائیں ونگ میں ارتعاش شروع ہوگیا تھا، لینڈنگ ایسے ہوئی جیسےآسمان سے زمین پر پھینک دیا گیا ہو۔

    وقاص نے بتایا کہ چترال پر لینڈ کرنے سے پہلے جہاز میں دھماکا سنائی دیا اور وائبریشن (ارتعاش) شروع ہوگئی، جہاز کی لینڈنگ ایسے ہوئی جیسے کسی نے آسمان سے زمین پر پھینک دیا ہو،جس طیارے میں وقاص تین بجے چترال پہنچے وہی 3 بج کر 20 منٹ پر اسلام آباد کے لیے پرواز کرگیا بعدازاں یہی طیارہ سوار چار بجے تباہی کا شکار ہوگیا۔

    اگر وقاص کا دعویٰ درست ہے تو اس بات میں کوئی شک نہیں رہ جاتا کہ حویلیاں حادثہ مجرمانہ غفلت کے نتیجے میں پیش آیا۔