اٹک: سابق وزیر اعظم نواز شریف کی صاحبزادی مریم نواز نے کہا ہے کہ میاں صاحب نے بتادیا ان کو کیوں نکالا اور کس نے نکالا، نواز شریف کو عوام سے محبت کی سزا مل رہی ہے۔

ان خیالات کا اظہار انہوں نے اٹک میں جلسہ عام سے خطاب کرتے ہوئے کیا، مریم نواز نے کہا کہ نواز شریف نے 18 سال پہلے بھی عوام سے محبت کی سزا بھگتی، میاں صاحب روزے کی حالت میں چار، چار گھنٹے نیب میں بیٹھے رہے، 70 سے زیادہ پیشیاں بھگت چکے ہیں۔

انہوں نے کہا کہ جس کا نام پاناما میں ہے ہی نہیں وہ 70 سے زائد پیشیاں بھگت چکا ہے، جن کے پاناما میں نام آئے وہ آزاد گھوم رہے ہیں، کیا کوئی کبھی اپنے بیٹے سے تنخواہ لیتا ہے؟ بیٹے سے تنخواہ لے سکتے تھے کیوں نہیں لی اب نکلو وزیر اعظم ہاؤس سے، پاناما کے باقی 400 لوگوں کو کسی نے پوچھا بھی نہیں۔

مریم نواز کے مطابق نواز شریف ووٹ لے کر آتے ہیں، کچھ لوگ سازش کرکے نکال دیتے ہیں، آپ لیڈر سرخرو ہوا، ایک پائی کی منی لانڈرنگ، کرپشن ثابت نہ ہوئی، نواز شریف کو پارٹی صدارت سے نکالا گیا، عوام کی محبت کم نہ ہوئی۔

انہوں نے کہا کہ این اے 120 میں والدہ کے مقابلے میں 40 امیدوار اتارے گئے، این اے 120 الیکشن سے پہلے متحرک کارکنوں کو اٹھا لیا گیا۔ پولنگ اسٹیشن پر لیگی پرچی والے کو 6،6 چکر لگوائے جارہے تھے، کچھ لوگ روتے رہے، شیر کو ووٹ ڈال کر ہی جائیں گے۔

مریم نواز نے کہا کہ میاں صاحب کی نااہلی کے بعد چکوال اور لودھراں کے فیصلے آئے، مان لو تم ہار گئے، جتنی مرضی دھاندلی کرکے لوٹے بناؤ، الیکشن میں ووٹ عوام نے دینا ہے لوٹوں نے نہیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔