ARYNews.tv | Urdu – Har Lamha Bakhabar

Tag: august

  • ٹرمپ کا آئندہ جمعے کو روسی صدر پیوٹن سے ملاقات کا اعلان

    ٹرمپ کا آئندہ جمعے کو روسی صدر پیوٹن سے ملاقات کا اعلان

    واشنگٹن(9 اگست 2025): امریکی صدر ڈونلڈ ٹرمپ اور روسی صدر پوتن آئندہ جمعے کو امریکی ریاست الاسکا میں ملاقات کریں گے۔

    اس ملاقات کی تصدیق کرتے ہوئے امریکی صدر ڈونلڈ ٹرمپ نے سوشل میڈیا پر لکھا کہ ’بطور امریکی صدر میرے اور روس کے صدر ولادیمیر پیوٹن کے درمیان انتہائی اہم ملاقات اگلے جمعہ 15 اگست 2025 الاسکا میں ہوگی جس کی مزید تفصیلات جلد ہی سامنے آئیں گی۔‘

    دوسری جانب امریکا اور روس کے رہنماؤں نے بھی اس بات کی تصدیق کی ہے کہ وہ اگلے جمعے کو امریکی ریاست الاسکا میں ملاقات کریں گے تاکہ روس کی یوکرین کے خلاف جنگ پر بات چیت کی جا سکے۔

    دوسری جانب صدر ٹرمپ اور پیوٹن کی الاسکا میں ملاقات کے اعلان کے سامنے کے بعد روس نے امریکی صدر ماسکو  آنے کی دعوت بھی دے دی ہے۔

    کریملن کے بیان کے مطابق وہ امریکی صدر کو روس آنے کی دعوت دینے کے لیے بھی تیار ہیں، پیوٹن کے معاون یوری اوشاکوف کے مطابق اگلا سربراہی اجلاس ماسکو میں ہو سکتا ہے اور یہ دعوت پہلے ہی دے دی گئی ہے تاہم وائٹ ہاؤس کی جانب سے اب پر ردعمل نہیں دیا گیا۔

    یاد رہے کہ روس کا دورہ کرنے والے آخری امریکی صدر باراک اوباما تھے جنھوں نے 2013 میں سینٹ پیٹرزبرگ میں منعقدہ جی-20 اجلاس میں شرکت کی تھی۔

    واضح رہے کہ ٹرمپ کا روسی صدر سے ملاقات کا اعلان ایسے وقت میں سامنے آیا ہے، جب انہوں نے پیوٹن کو امن قائم کرنے یا سخت اقتصادی پابندیوں کا سامنا کرنے کی دھمکی دے رکھی ہے۔

  • سندھ میں مزید بارشوں کی پیش گوئی

    سندھ میں مزید بارشوں کی پیش گوئی

    کراچی: چیف میٹرولوجسٹ سردار سرفراز نے سندھ میں مزید بارشوں کی پیش گوئی کردی، انہوں نے کہا کہ مون سون کا اگلا اسپیل، پچھلے اسپیل کی طرح ہیوی نہیں، چوتھے اسپیل میں اربن فلڈنگ کا خدشہ نہیں ہے۔

    تفصیلات کے مطابق چیف میٹرولوجسٹ سردار سرفراز کا کہنا ہے کہ کراچی میں 6 سے 8 اگست تک ہلکی اور معتدل بارش کا امکان ہے، آنے والا بارش کا اسپیل مون سون کا چوتھا اور اگست کا پہلا اسپیل ہوگا۔

    سردار سرفراز کا کہنا ہے کہ مون سون کا چوتھا اسپیل تیسرے اسپیل کی طرح ہیوی نہیں، چوتھے اسپیل میں اربن فلڈنگ کا خدشہ نہیں ہے۔

    انہوں نے مزید کہا کہ کراچی، ٹھٹھہ، حیدر آباد، بدین، عمر کوٹ، تھر پارکر اور ٹنڈو الہٰ یار میں ہلکی بارش کا امکان ہے، مجموعی طور پر 5 سے 8 اگست تک سندھ بھر میں کہیں ہلکی اور کہیں تیز بارش کا امکان ہے۔

  • کویت میں یکم اگست سے مسافروں کے لیے نئی ہدایات کیا ہیں؟

    کویت میں یکم اگست سے مسافروں کے لیے نئی ہدایات کیا ہیں؟

    کویت حکومت نے فضائی مسافروں کو کورونا وائرس سے بچاؤ اور دیگر سہولیات کی فراہمی کیلئے احکامات جاری کیے ہیں، احکامات کے خلاف ورزی پر سخت کارروائی کا عندیہ دیا گیا ہے۔

    کویت سٹی : محکمہ شہری ہوا بازی نے فضائی کمپنیوں کو ایک سرکلر جاری کیا ہے جس میں کہا گیا ہے کہ کویت میں فضائی مسافروں سے متعلق نئے اقدامات یکم اگست سے نافذ ہوں گے۔

    کویتی خبررساں ادارے کونا کے مطابق محکمہ شہری ہوابازی نے بتایا کہ ویکسین لگوانے والے کویتی شہری یا مقیم غیرملکی پی سی آر فیس سے مستثنیٰ ہوں گے، پی سی آر فیس "کویت مسافر” ایپ کے ذریعے بیس دینار مقرر ہے۔

    کویتی محکمہ شہری ہوابازی کا کہنا ہے کہ کویت میں پی سی آر ان مسافروں کا کیا جاتا ہے جو ہاؤس آئسولیشن کی پابندی نہیں کرنا چاہتے۔ اگر پی سی آر رپورٹ کلیئر آئے تو ایسی صورت میں اسے ہاؤس آئسولیشن کی ضرورت نہیں ہوتی۔

    محکمہ شہری ہوا بازی کی ہدایت میں یہ بھی کہا گیا ہے کہ کورونا ویکسین کی دونوں خوراکیں نہ لینے والے کسی بھی کویتی شہری کو ملک سے باہر جانے کی اجازت نہیں ہوگی۔

  • کورونا کی خطرناک قسم ڈیلٹا اگلے ماہ شدت سے پھیلے گی، ماہرین نے خبردار کردیا

    کورونا کی خطرناک قسم ڈیلٹا اگلے ماہ شدت سے پھیلے گی، ماہرین نے خبردار کردیا

    بھارت میں پیداہونے والی کورونا وائرس کی خطرناک قسم ڈیلٹا نے اپنا دائرہ بڑھادیا، جس کا اثر یورپی ممالک پر بھی ہورہا ہے، ماہرین کا کہنا ہے کہ اگست کے اختتام تک کورونا کے 90 فیصد کیسز ڈیلٹا ویریئنٹ کے ہوں گے۔

    یورپی یونین کی ادویات کے حوالے سے فیصلے کرنے والی ایجنسی نے کہا ہے کہ منظور شدہ کسی بھی ویکسین کی دو خوراکیں کورونا کی ڈیلٹا قسم کے خلاف بھی زیادہ سے زیادہ حفاظت کرتی ہیں۔

    فرانسیسی خبر رساں ادارے اے ایف پی کے مطابق یورپین میڈیسن ایجنسی نے حکومتوں سے کہا ہے کہ وہ شہریوں کو ویکسین لگانے کی مہم میں تیزی لائیں۔

    خیال رہے کہ کورونا وائرس کی ڈیلٹا قسم سب سے پہلے انڈیا میں سامنے آئی تھی جو تیزی سے براعظم یورپ میں پھیلی ہے اور خدشہ ظاہر کیا گیا ہے کہ گرمیوں کے اختتام تک کورونا کے مثبت کیسز میں سے 90 فیصد ڈیلٹا قسم کے ہوں گے۔

    یورپین میڈیسن ایجنسی کے مطابق ابتدائی شواہد سے یہ واضح ہوتا ہے کہ کورونا ویکیسن کی دو خوراکیں ڈیلٹا قسم کے خلاف بھی مؤثر ہیں اور وائرس سے محفوظ رکھتی ہیں۔

    ایجنسی نے کہا ہے کہ تجویز کردہ ویکسین کی خوراکیں لینے سے ہی وائرس سے حد درجہ حفاظت میں رہا جا سکتا ہے۔ اپنے بیان میں یورپین میڈیسن ایجنسی کا کہنا ہے کہ کورونا کی ڈیلٹا قسم کے حوالے سے خدشات ہیں اور یہ یورپ میں تیزی سے پھیل رہی ہے جو عالمی وبا کو قابو میں لانے کی کوششوں کو متاثر کر سکتی ہے۔

    یورپین سینٹر فار ڈیزیز پریوینشن اینڈ کنٹرول نے نے کہا ہے کہ اگلے ماہ اگست کے اختتام تک ڈیلٹا قسم کے کورونا کیسز کی تعداد کُل کیسز کی تعداد کے 90 فیصد تک ہو جائے گی۔

    ایجنسی نے کہا ہے کہ یہ بہت ضروری ہو گیا ہے کہ کورونا کی ویکسینیشن کے عمل میں تیزی لائی جائے اور جلد از جلد شہریوں کو ویکسین لگائی جائے تاکہ کورونا کی مزید اقسام کو سامنے آنے کو روکا جا سکا۔

    خیال رہے کہ امریکہ اور انڈیا کے بعد یورپی ممالک عالمی وبا کورونا سے سب سے زیادہ متاثر ہوئے ہیں جہاں لاکھوں اموات ریکارڈ کی گئیں۔ دسمبر 2019 میں چین کے شہر ووہان میں سامنے آنے والے کورونا وائرس سے دنیا بھر میں 40 لاکھ سے زائد افراد ہلاک ہوچکے ہیں۔

  • ملک میں مہنگائی کی شرح میں بتدریج کمی آنا شروع

    ملک میں مہنگائی کی شرح میں بتدریج کمی آنا شروع

    اسلام آباد : ملک میں بھر مہنگائی میں بتدریج کمی واقع ہونے لگی ، اگست کے مہینے میں مہنگائی کی اوسط شرح گزشتہ ماہ سے دو فیصد کم ہو کر 8.21 فیصد رہی۔

    تفصیلات کے مطابق ادارہ شماریات نے مہنگائی کے حوالے سے ماہانہ رپورٹ جاری کردی، جس میں بتایا گیا اگست میں مہنگائی کی شرح میں 0.63 فیصداضافہ ریکارڈ کیاگیا اور مہنگائی کی شرح 8.21فیصد رہی جبکہ جولائی میں شرح 9.30 فیصد تھی۔

    ادارہ شماریات کا کہنا ہے کہ جولائی تا اگست 2020کےدوران مہنگائی کی شرح 8.74 فیصدرہی جبکہ اگست میں ماہانہ بنیادپرچینی13.53 فیصدمہنگی ہوئی۔

    رپورٹ کے مطابق چینی کی فی کلوقیمت ایک سال میں 28 فیصدبڑھی، گندم 12 ، پیاز 10 جبکہ بیکری مصنوعات 6 فیصد مہنگی ہوئیں۔

    ادارہ شماریات نے کہا ہے کہ اگست میں بجلی کی فی یونٹ قیمت میں11.39 فیصداضافہ ہوا جبکہ آلو5.8 ، کرائے5اور دودھ 4.78فیصد مہنگے ہوا جبکہ ایک ماہ میں چینی نو روپے فی کلو مہنگی ہوئی اور ایل پی جی کی قیمت میں تیرہ روپے، ڈیزل پانچ روپے اور پیٹرول کی قیمت میں چار روپے اضافہ ہوا۔

    رپورٹ میں بتایا گیا ہے کہ اگست میں چکن 36 ، ٹماٹر 32اور تازہ پھل 23فیصد، دال مونگ 6.5 ،سبزیاں 2.7 فیصد ستی ہوئیں۔

    سالانہ بنیادوں پرآلو 62، گندم 44اور مصالحہ جات 39فیصد ، دال مونگ 35، دال ماش 31اورانڈے 28فیصد، چینی 28،مکھن 25، گھی 16فیصد مہنگے ہوئے جبکہ ایک سال میں چکن 38، پیاز 33، موٹرفیول 10فیصد سستا ہوا۔

  • رواں ماہ مہنگائی کی شرح کم رہی، وفاقی ادارہ شماریات

    رواں ماہ مہنگائی کی شرح کم رہی، وفاقی ادارہ شماریات

    کراچی : رواں ماہ کے چوتھے ہفتے میں مہنگائی کی شرح میں معمولی کمی دیکھنے میں آئی ہے، پاکستان ادارہ شماریات نے رواں ماہ کے اعداد و شمار جاری کردیے۔

    تفصیلات کے مطابق رواں ماہ اگست کے تیسرے ہفتے میں مہنگائی کی شرح میں 0.14 فیصد کمی ریکارڈ کی گئی تاہم کم آمدنی والے طبقے کے لئے قیمتوں کے حساس اعشاریے میں 0.23 فیصد کمی دیکھنے میں آئی۔

    وفاقی ادارہ شماریات نے مہنگائی کے حوالے سے ہفتہ وار رپورٹ جاری کی ہے جس میں کہا گیا ہے کہ اگست کے تیسرے ہفتے مہنگائی میں 0.14 فیصد کمی ہوئی، مہنگائی کی شرح 8.39فیصدتک پہنچ گئی۔

    ادارہ شماریات کے مطابق ایک ہفتےمیں12اشیائے ضروریہ کی قیمتوں میں اضافہ ہوا، ایک ہفتےمیں 11 اشیائے ضروریہ کی قیمتوں میں کمی ہوئی جبکہ28 اشیائے ضروریہ کی قیمتوں میں استحکام رہا۔

    وفاقی ادارہ شماریات کی رپورٹ کے مطابق گزشتہ8 ہفتے کے بعد پہلی بار چینی سستی ہوئی، ایک ہفتے میں چینی 96 پیسے فی کلو سستی ہوئی، چینی کی اوسط قیمت96.07 سے95.11 روپے فی کلو ہوگئی۔

    اس کے علاوہ ٹماٹر، پیاز، چاول، گڑ، خوردنی تیل اور خشک دودھ مہنگے ہوئے، دال مسور، دال ماش،دال چنااور دال مونگ کی قیمت میں اضافہ ہوا جبکہ زندہ چکن 10روپے اور آٹے کا20کلو کا تھیلا4روپے سستا ہوا۔

    ادارہ شماریات کے مطابق کیلے، انڈے،دودھ، دہی اور لہسن بھی سستے ہوئے، مٹن، باسمتی چاول، ملبوسات، بجلی اور گیس کے نرخ برقرار رہے۔

  • پاکستان یکم اگست سے یورو5 کوالٹی کے پٹرول کی درآمد شروع کر دے گا

    پاکستان یکم اگست سے یورو5 کوالٹی کے پٹرول کی درآمد شروع کر دے گا

    اسلام آباد : پاکستان یکم اگست سے یورو5کوالٹی کے پٹرول کی درآمد شروع کر دے گا، ملک امین اسلم نے کہا کوالٹی بہترہونےکےباوجودقیمت پرفرق نہیں پڑےگا، سب سے پہلے یہ پٹرول اسموگ سے متاثرہ علاقوں میں سپلائی کیا جائے گا۔

    تفصیلات کے مطابق مافیا اور مخصوص لابنگ کےدباؤکے باوجود وفاقی حکومت نے اہم فیصلہ کرلیا ، وزیراعظم کے مشیر ماحولیات ملک امین اسلم کا کہنا ہے کہ یکم اگست سے پاکستان یورو5کوالٹی کے پٹرول کی درآمد شروع کر دے گا، پٹرول کی کوالٹی بہترہونےکےباوجودقیمت پرفرق نہیں پڑےگا۔

    امین اسلم نے کہا کہ وزیراعظم اوروفاقی کابینہ نےتاریخی فیصلہ کیا ہے، پاکستان1992سے یورو2 جیسا کم کوالٹی پٹرول استعمال کررہاہے، مخصوص لابنگ نے فائدے کے لئے کبھی یہ فیصلہ کرنے ہی نہیں دیاتھا۔

    ان کا کہنا تھا کہ مافیاباہرسےسستاپٹرول لے کریہاں مہنگابیچتےرہےہیں، بہت کم ممالک ایسا گندافیول خریدتےہیں جیساہم لے رہے تھے، وزیراعظم نے فیصلہ کیا ہے کہ 70 فیصد امپورٹ فیول یورو5 کوالٹی کا ہی ہو گا۔

    مشیر ماحولیات نے مزید کہا کہ اسموگ سے متاثرہ علاقوں میں سپلائی کیا جائے گا۔

    یاد رہے وفاقی کابینہ نے پاکستان میں پٹرول و ڈیزل کوالٹی یورو 2 سے یورو 5 تک بڑھانے کا فیصلہ کیا تھا ، جس کے بعد وزیراعظم عمران خان کی جانب سے پٹرول و ڈیزل کی یورو 5 پرمنتقلی کی منظوری دے دی گئی تھی۔

    اس حوالے سے مشیر برائے ماحولیات ملک امین اسلم کا کہنا تھا کہ وزیراعظم نے 6 ماہ پہلے پٹرول کی کوالٹی بہتر بنانے کا وعدہ کیا تھا، یکم اگست سے پٹرول یورو 5 پر منتقل کر دیا جائےگا جبکہ ڈیزل جنوری2021 سے یورو 5 کے برابر چلا جائےگا۔

  • جرمنی : تارکین وطن کو اگست 2018 سے قبل ملک بدر کرنے کا فیصلہ

    جرمنی : تارکین وطن کو اگست 2018 سے قبل ملک بدر کرنے کا فیصلہ

    برلن : جرمنی کے صوبے باویریا کی حکومت نے پناہ گزینی کی درخواست مسترد ہونے والے تارکین وطن کو اگست 2018 سے قبل جرمنی سے بے دخل کرنے کا فیصلہ کرلیا۔

    تفصیلات کے مطابق یورپی یونین کے رکن ملک جرمنی کے صوبے باویریا کے حکومتی اراکین نے غیر ملکی تارکین وطن کو خصوصی طیاروں سے ملک بدر کرنے کا فیصلہ کرلیا ہے.

    غیر ملکی خبر رساں ادارے کا کہنا تھا کہ حکومت کی جانب سے ان مہاجرین کو ملک بدر کرنے کا فیصلہ کیا گیا ہے جن کی پناہ کے لیے دی گئی درخواست مسترد کردی گئی ہے.

    غیر ملکی خبر رساں ادارے کا کہنا تھا کہ ریاست باویریا کے وزیر اعلیٰ کی جانب سے غیر قانونی مہاجرین کو ملک بدر کرنے کا فیصلہ اس وقت میں کیا گیا ہے کہ جب چند ماہ بعد صوبائی الیکشن کا انعقاد ہونا ہے.

    واضح رہے کہ جرمنی کی وفاقی حکومت قدامت پسند جماعت کرسچن سوشل یونین کے پاس ہے۔ جس کی سربراہ جرمنی کی چانسلر انجیلا مریکل ہیں۔

    وزیر اعلیٰ مارکوس زونڈر کا کہنا تھا کہ صوبائی حکومت کی جانب سے غیر قانونی تارکین وطن کو اگست 2018 سے قبل ملک بدر کرنے کی منصوبہ کی گئی ہے، جس میں مہاجرین کو خصوصی طیاروں کے ذریعے ملک بدر کرنا بھی شامل ہے۔

    غیر ملکی خبر رساں اداروں سے گفتگو کرتے ہوئے صوبے کے وزیر اعلیٰ کا کہنا تھا کہ صوبائی حکومت تارکین وطن کی سہولت کے لیے سات بڑے رجسٹریشن سینٹر بھی قائم کیے جارہے ہیں، جب تک تارکین وطن کی پناہ گزینی کا فیصلہ نہیں آجاتا مہاجرین کو ان مراکز میں ہی قیام کرنا ہوگا۔

    مارکوس زونڈر کا کہنا تھا کہ جرمنی کا رخ کرنے والے تارکین وطن کی اکثریت آسٹریا کی سرحد عبور کرکے جرمنی میں داخل ہوئی ہے۔ محتاط اندازے کے مطابق سنہ 2015 سے ابتک باویریا میں ایک ملین سے زائد تارکین وطن پہنچ چکے ہیں۔

    خیال رہے باویریا کے گذشتہ الیکشن میں انجیلا مریکل کی قدامت پسند جماعت سی ایس یو کے حامیوں نے عوامیت پسند جماعت کو ووٹ دے کر کامیاب کیا تھا۔ سی ایس یو نے ناراض کارکنوں کو منانے کےلیے تارکین وطن کے متعلق سخت مؤقف اختیار کرلیا ہے۔

    سی ایس یو سربراہ اور سابق وزیر اعلیٰ باویریا بورسٹ زیہوفر نے بھی ملکی وزیر داخلہ بننے کے بعد ملکی سطح پر تارکین وطن کے متعلق سخت اقدامات کرنے کا اعلان کر رکھا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں

  • ستمبر کا دوسرا ہفتہ /مہنگائی کی شرح میں22 0. فیصد اضافہ

    ستمبر کا دوسرا ہفتہ /مہنگائی کی شرح میں22 0. فیصد اضافہ

    کراچی: نئے مالی سال 2015-16ء کے تیسرے ماہ ( اگست 2015ء ) کے دوسرے ہفتے کے دوران مہنگائی کی شرح میں 0.22 فیصد اضافہ ریکارڈ کیا گیا، جبکہ کم آمدنی والے طبقے کے لئے قیمتوں کے حساس اشاریئے میں 0.42 فیصد اضافہ دیکھنے میں آیا۔

    پاکستان بیورو شماریات کے اعداد و شمار کے مطابق 11 ستمبر کو ختم ہونے والے ہفتے کے دوران ایل پی جی ،آلو، لہسن ،پیاز ،دال ماش، چنے کی دال ،گندم ،آٹا،مٹن ، سرخ مرچ ، تازہ دودھ ، گڑ، ٹماٹر، اور کیلے سمیت 17 اشیائے ضروریہ کی قیمتوں میں اضافہ ہوا، زندہ مرغی، انڈے،مونگ کی دال،چینی ،اری چاول ،مٹی کاتیل ،ویجی ٹیبل گھی سمیت9 اشیائے ضروریہ کی قیمتوں میں کمی ریکارڈ کی گئی۔

     ادارہ شماریات کے مطابق پٹرول ،ڈیزل ، گیس نرخ ،مسور کی دال ،بیف ،چائے ،مسٹرڈ آئل ، باسمتی چاول ،دھی ،خوردنی تیل، ملک پاؤڈ، نمک ، بجلی کے نرخ ،کپڑے اورکھلا گھی سمیت 27 اشیائے کی قیمتوں میں استحکام رہا، ادارہ شماریات کے مطابق گزشتہ ہفتہ کے مقابلے میں آٹھ ہزار تا بارہ ہزار آمدنی ، بارہ ہزار تا اٹھارہ ہزارآمدنی ، اٹھارہ ہزار تا پینتیس ہزار تک اور پینتیس ہزار روپے سے زائد آمدنی والے افراد کے گروپوں کیلئے قیمتوں کے حساس اعشاریے میں بالترتیب 0.35، 0.29 ،0.23 اور 0.14 فیصد اضافہ ریکارڈ کیا گیا ۔

  • اگست کے چوتھے ہفتے میں مہنگائی کی شرح میں اعشاریہ 35 فیصد کمی

    اگست کے چوتھے ہفتے میں مہنگائی کی شرح میں اعشاریہ 35 فیصد کمی

    اسلام آباد : نئے مالی سال 2015-16ء کے دوسرے ماہ ( اگست 2015ء ) کے چوتھے ہفتے کے دوران مہنگائی کی شرح میں 0.06 فیصد کمی ریکارڈ کی گئی، جبکہ کم آمدنی والے طبقے کے لئے قیمتوں کے حساس اعشاریئے میں 0.24 فیصد کمی دیکھنے میں آئی۔

    پاکستان بیورو شماریات کے اعداد و شمار کے مطابق 28 اگست کو ختم ہونے والے ہفتے کے دوران مسور کی دال ،دال ماش، چنے کی دال ،ایل پی جی ، لہسن ،گڑ،پیاز ، سرخ مرچ ،بیف ،مٹن ،مسٹرڈ آئل ، باسمتی چاول ،دھی ،انڈے،چائے سمیت 19 اشیائے ضروریہ کی قیمتوں میں اضافہ ہوا، ٹماٹر،زندہ مرغی ،آلو، گندم ، آٹا،چینی ،مونگ کی دال،ویجی ٹیبل گھی ،اور کیلے سمیت9 اشیائے ضروریہ کی قیمتوں میں کمی ریکارڈ کی گئی۔

    ادارہ شماریات کے مطابق پٹرول ،ڈیزل ، مٹی کاتیل ،گیس نرخ ،خوردنی تیل، ملک پاؤڈ، نمک ، تازہ دودھ، اری چاول ، بجلی کے نرخ ،کپڑے اورکھلا گھی سمیت 25 اشیائے کی قیمتوں میں استحکام رہا۔

    ادارہ شماریات کے مطابق گزشتہ ہفتہ کے مقابلے میں آٹھ ہزار تا بارہ ہزار آمدنی ، بارہ ہزار تا اٹھارہ ہزارآمدنی ، اٹھارہ ہزار تا پینتیس ہزار تک اور پینتیس ہزار روپے سے زائد آمدنی والے افراد کے گروپوں کیلئے قیمتوں کے حساس اعشاریے میں بالترتیب 0.25، 0.12 ،0.04 اور 0.00 فیصد کمی ریکارڈ کی گئی ۔