Tag: Aung San Suu Kyi

میانمار: معزول رہنما آنگ سان سُوچی کو بدعنوانی کے 4 نئے الزامات کا سامنا ہے۔

تفصیلات کے مطابق میانمار کی معزول قائد آنگ سان سُو چی کے وکلا نے بتایا ہے کہ استغاثہ نے ان پر بدعنوانی کے چار نئے مقدمات قائم کیے ہیں۔

وکلا نے منگل کے روز بتایا کہ نئے الزامات سے متعلق عدالتی کارروائی کا آغاز 22 جولائی سے ہوگا، لیکن وہ ان کی تفصیلات سے لا علم ہیں کیوں کہ متعلقہ دستاویزات تک ان کی رسائی نہیں ہے۔

ملک کے سرکاری میڈیا نے گزشتہ ماہ اطلاع دی تھی کہ محترمہ سُو چی نے ایک علاقائی حکومتی عہدے دار سے 6 لاکھ ڈالر نقد اور تقریباً 11 کلوگرام سونا وصول کیا تھا۔ میڈیا کے مطابق انھوں نے اپنے عہدے کا غلط استعمال کرتے ہوئے، اپنے ایک ادارے کے ذریعے مارکیٹ ریٹ سے کم پر جائیدادیں کرائے پر دی تھیں۔

نئے مقدمات کا تعلق اِن الزامات سے ہو سکتا ہے، واضح رہے کہ سابق اسٹیٹ کونسلر پر پہلے ہی 6 مقدمات میں فرد جرم عائد کی جا چکی ہے۔ 5 الزامات کے تحت مقدمات کی کارروائی شروع ہو چکی ہے، تاہم ان کی پیش رفت وکلا کی توقع سے سست ہے کیوں کہ استغاثہ اضافی شہادتیں جمع کروا رہا ہے۔

میڈیا رپورٹس میں کہا گیا ہے کہ مزید الزامات کے ذریعے فوج، بظاہر آنگ سان سو چی کی حراست کو طول دینے کی کوشش کر رہی ہے۔

لندن: روہنگیا مسلمانوں کے خلاف جرائم کے نتیجے میں یورپی پارلیمنٹ نے آنگ سان سوچی کو اعزاز سے محروم کر دیا۔

تفصیلات کے مطابق یورپی یونین پارلیمنٹ نے میانمار کی خاتون رہنما آنگ سان سوچی کو ’سخاروف پرائز کمیونٹی‘ سے ہٹا دیا ہے، سوچی کو یہ 1990 میں یہ ایوارڈ دیا گیا تھا، سخاروف ایوارڈ لسٹ میں ان کا نام درج تھا جسے اب حذف کر دیا گیا ہے۔

رپورٹس کے مطابق آنگ سان سوچی کو روہنگیا مسلمانوں کے خلاف جرائم کا ’اعتراف‘ کرنے کے بعد یورپی پارلیمنٹ نے ’سخاروف پرائز کمیونٹی‘ سے ہٹایا۔

یوروپی یونین پارلیمنٹ کا کہنا ہے کہ میانمار کی اسٹیٹ کونسلر آنگ سان سوچی کو اب انسانی حقوق کی خدمات انجام دینے والوں کے لیے مقرر کردہ انعام کی کسی بھی سرگرمیوں کے لیے مدعو نہیں کیا جائے گا۔

فن لینڈ سے تعلق رکھنے والی یورپی پارلیمنٹ کی رکن ہائیڈی ہوٹالا نے بتایا کہ ہم نے جسے جمہوریت کا مجسمہ سمجھا اس نے نہ صرف روہنگیا کے خلاف مظالم پر خاموشی اختیار کی بلکہ انھوں نے ان مظالم کی حمایت بھی کی اور یورپی پارلیمنٹ کے تحفظات کو نظر انداز کر دیا۔

یورپی یونین پارلیمنٹ کا یہ فیصلہ سوچی کے اختیار کردہ مؤقف اور میانمار میں روہنگیا مسلمانوں کے خلاف بڑھتے جرائم کو روکنے میں ناکامی کے پیش نظر کیا گیا ہے۔

یاد رہے کہ سوچی اقتدار میں آنے سے قبل ایک طویل عرصے تک سیاسی قید میں رہیں، فوجی حکمرانی کے خلاف عدم تشدد کی جدوجہد کے لیے انھیں دنیا بھر میں سراہا گیا تھا، انھیں 1991 میں نوبل پرائز سے بھی نوازا گیا تھا، تاہم روہنگیا مسلمانوں پر عرصہ حیات تنگ کیے جانے کے بعد بین الاقوامی سطح پر سوچی کو شدید تنقید کا سامنا کرنا پڑا۔

واضح رہے کہ 2017 میں فوج کی وحشیانہ کارروائیوں کے نتیجے میں 7 لاکھ کے قریب روہنگیا مسلمان پڑوسی ملک بنگلا دیش ہجرت پر مجبور ہو گئے تھے، دوسری طرف جمہوریت کی علم بردار سمجھی جانے والی سوچی اس معاملے میں خاموش رہیں، جس پر عالمی برادری نے انھیں تنقید کا نشانہ بنایا۔

پارلیمنٹ کی جانب سے ایک بیان جاری کیا گیا ہے جس میں کہا گیا ہے کہ سوچی کے خلاف فیصلہ روہنگیا مسلمانوں کے خلاف جاری جرائم کو روکنے میں ناکامی، روہنگیا برادری کے خلاف جاری جرائم کو قبول کرنے کے ردِ عمل میں کیا گیا ہے۔

خیال رہے کہ میانمار میں پناہ گزین شہری آزادی سے محروم ہیں، میانمار میں رہنے والے 6 لاکھ روہنگیا باشندوں کی شہریت بھی ختم کی جا چکی ہے۔