کراچی: انسداد اغوا برائے تاوان سیل نے جمالی پل کے قریب کارروائی کرتے ہوئے نزاکت نامی شہری کے اغوا اور قتل میں ملوث 3 ملزمان کو گرفتار کر لیا۔
تفصیلات کے مطابق کراچی میں 16 مئی 2022 کو نزاکت نامی ایک شہری اغوا ہوا تھا، ملزمان نے اغوا کے بعد تاوان کے لیے بھی فون کیا، تاہم بعد ازاں اغوا کاروں نے شہری کو قتل کر کے اس کی لاش پھینک دی تھی۔
واقعے کا مقدمہ سچل تھانے میں درج کیا گیا تھا، اینٹی وائلنٹ کرائم سیل (اے وی سی سی) نے اس اندھے قتل کا معمہ حل کر لیا ہے۔
اینٹی وائلنٹ کرائم سیل کے ایس ایس پی عبدالرحیم شیرازی کے مطابق گرفتار ملزمان میں رضوان، ندیم اور مشتاق عبدالخالق شامل ہیں، تفتیش میں معلوم ہوا کہ قتل کا ماسٹر مائنڈ رضوان تھا، جس نے دوران تفتیش قتل کی وجہ سے متعلق اہم انکشاف کر دیا ہے۔
رضوان نے پولیس کو بتایا کہ قتل ہونے والا مغوی نزاکت ملزم رضوان سے بدفعلی کرتا تھا، اور اسے بلیک میل بھی کر رہا تھا، جس پر رضوان نے بدنامی کے ڈر سے اپنے ساتھیوں سمیت قتل کا منصوبہ بنایا۔
رضوان کے بیان کے مطابق نزاکت کو اغوا کرنے کے بعد اسکرو ڈرائیور کی مدد سے قتل کیا گیا تھا، اے وی سی سی ٹیم نے مقتول کا موبائل فون اور آلہ قتل بھی برآمد کر لیا ہے، جب کہ گرفتار ملزمان سے مزید تفتیش کا عمل جاری ہے۔
