Tag: Awais Leghari

کراچی: وفاقی وزیر توانائی اویس لغاری نے کہا ہے کہ کسی کو بھی معاہدے کے بغیر گیس نہیں دی گئی اس لیے کے الیکٹرک کو بھی گیس نہیں دے سکتے۔

تفصیلات کے مطابق کراچی میں توانائی کے شدید بحران پر جاری وسیع سطح کے احتجاج کے رد عمل کے طور پر وزیر توانائی نے میڈیا کو بیان دیتے ہوئے کہا ہے کہ ہم چاہتے ہیں کہ کراچی کے عوام کو لوڈشیڈنگ کے عذاب سے باہر نکالیں۔

انھوں نے لوڈشیڈنگ کے معاملے کو سمجھ بوجھ سے حل کرنے کی طرف اشارہ کرتے ہوئے کہا کہ کے الیکٹرک ایک نجی ادارہ ہے، آج تک کوئی بھی مسئلہ ایک ہی ہنگامی اجلاس میں حل نہیں ہوا، پانچ اپریل کو کے الیکٹرک، ایس ایس جی سی والے وزیراعلیٰ سندھ سے ملاقات کرچکے ہیں۔

وزیر توانائی کا کہنا تھا کہ وزیراعلیٰ سندھ سید مراد علی شاہ نے بھی صورت حال کی پیچیدگی کا اعتراف کیا تھا، وہ بجلی چوروں کے خلاف کارروائی یقینی بنائیں۔

کراچی میں بدترین لوڈ شیڈنگ، وزیر توانائی نے کے الیکٹرک اور سوئی سدرن گیس کمپنی حکام کو آج طلب کرلیا

اپنے بیان میں انھوں نے کہا کہ ہم بھی چاہتے ہیں کہ اس معاملے کو جلد سے جلد حل کیا جائے لیکن ہمارے سامنے کچھ اور باتیں کی جاتی ہیں اور کیمرے کے سامنے کچھ، یہ معاملہ اتنا سادہ نہیں ہے۔

واضح رہے کراچی میں لوڈشیڈنگ کے مسئلے نے نہایت نازک صورت اختیار کرلی ہے، کراچی کی بڑی سیاسی جماعتیں اس مسئلے کو مصنوعی قرار دے چکی ہیں اور اس کے ذمہ داروں کے خلاف ان کا بھرپور احتجاج جاری ہے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔