اسلام آباد: اسپیکر قومی اسمبلی ایاز صادق نے کہا ہے کہ انتخابی اصلاحات کا بل ایوان میں منظوری کے لیے رواں اجلاس میں پیش کردیا جائے گا جس کے بعد الیکشن کمیشن اپنا کام شروع کرے گا۔
اسلام آباد میں میڈیا سے گفتگو کرتے ہوئے اسپیکر قومی اسمبلی نے کہا کہ شیخ رشید کو تحفظ دینے کی ہرطرح سے کوشش کی مگر وہ چاہتے ہیں کہ اُن کی ہر چیز کی خبر بنے۔
انہوں نے کہا کہ اراکین اسمبلی سے کئی بار استدعا کرچکا ہوں کہ آمد و رفت کے لیے اسپیکر کی لفٹ اور پارکنگ استعمال کریں مگر شیخ رشید نے میری بات نہیں مانی اس کے باوجود انہیں سیکیورٹی اسٹاف کے حصار میں گاڑی تک پہنچایا گیا۔
ایاز صادق نے کہا کہ انتخابی اصلاحات کا بل رواں اجلاس میں پیش ہوجائے گا اور اگر یہ بل ایوان سے منظور ہوا تو اس پر الیکشن کمیشن بھی اپنا کام شروع کردے گا۔
اسپیکر قومی اسمبلی کا کہنا تھا کہ پریس گیلری میں غیر متعلقہ افراد کا داخلہ روکنے کے لیے ہدایت جاری کردی اور اجلاس کی فوٹیج بنانے کے لیے تمام لوگوں کو آخری وارننگ جاری کی ہے۔
یاد رہے گزشتہ روز قائد ایوان کے انتخاب کے لیے قومی اسمبلی میں ووٹنگ ہوئی تھی جس میں تحریک انصاف کی جانب سے شیخ رشید احمد کو بطور وزیراعظم مقرر کیا گیا تھا، اجلاس کے اختتام پر قومی اسمبلی کے باہر لیگی کارکنان نے شیخ رشید احمد کو گھیر کر نوازشریف کی حمایت میں خوب نعرے بازی کی تھی۔
لاہور : اسپیکر قومی اسمبلی سردار ایاز صادق نے کہا ہے کہ ایران اور افغانستان پاکستان کے ساتھ بہتر تعلقات کے خواہش مند ہیں۔ حسن روحانی نے تو بھارت کو کرارا جواب دے دیا ہے۔
یہ بات انہوں نے جامعہ اشرفیہ لاہور میں میڈیا سے گفتگو کرتے ہوئے کہی، سردار ایاز صادق نے کہا کہ دورہ افغانستان میں افغان حکام سے ملاقاتیں مثبت رہیں، ناکامی کی باتیں کرنے والے وطن سے مخلص نہیں۔ افغان صدر اشرف غنی نے باہمی تعلقات میں پارلیمنٹ کے کردار کو سراہا۔
انہوں نے بتایا کہ سابق صدر حامد کرزئی جلد ہی پاکستان کا دورہ کریں گے جبکہ چیف ایگزیکٹو عبداللہ عبداللہ نے بھی پاکستان دورے کی دعوت قبول کرلی ہے۔ سردارایاز صادق نے کہا کہ دہشت گردوں کی نقل و حرکت کو روکنے کے لئے سرحد پر باڑ لگانے اور فوجی چوکیاں بنانے کے حوالے سے افغان حکام کو بتادیا گیا ہے۔
اسپیکر قومی اسمبلی نے کہا کہ ان کی ایران کے صدراور وزیرخارجہ سے بھی ملاقات مثبت رہی۔ صدر روحانی نے پاکستان سے لاتعلقی کی بھارتی خواہش مسترد کردی کیونکہ وہ ہمسائے کی اہمیت کو سمجھتے ہیں۔
انہوں نے کہا کہ پانامہ کیس میں سپریم کورٹ کی وضاحت کے بعد عمران خان تعمیری سیاست شروع کریں، ان کا کہنا تھا کہ فواد حسن فواد کو کرپشن پر ہٹانے کی باتیں درست نہیں۔
اسلام آباد: عوامی مسلم لیگ کے سربراہ شیخ رشید نے دعویٰ کیا ہے کہ اسپیکر قومی اسمبلی نے مستعفی ہونے کی پیشکش کی ہے‘ ایاز صادق اپنا استعفیٰ وزیراعظم کو ارسال کریں گے.
تفصیلات کے مطابق عوامی مسلم لیگ کےسربراہ شیخ رشید نے ایوان میں ہنگامہ آرائی کا ذمے داراسپیکر ایاز صادق کو قرار دے دیا ہے، ان کا کہنا ہے کہ سارے معاملے کی جڑ اسپیکر قومی اسمبلی ہیں.
انہوں نے کہا کہ اسپیکر کا کام غیر جانب دار رہ کر اپنی ذمے داری ادا کرنا ہوتا ہے جب اسپیکر وزرا کودیکھ کرفیصلے کریں گے تو ایسا ہی ہوگا۔
شیخ رشید نے دعویٰ کیا ہے کہ اسپیکر ایازصادق نے مستعفی ہونے کی پیشکش کی ہے، اسپیکر نے کہا ہے کہ اپوزیشن کو اعتماد نہیں تو استعفیٰ وزیراعظم کوبھیج دوں گا۔
دوسری جانب اسپیکر قومی اسمبلی ایاز صادق نے گذشتہ روز ایوان میں پیش آنے والی بد مذگی پر شدید ردعمل کا اظہار کرتے ہوئے کہا کہ گزشتہ روزکا واقعہ بہت افسوس ناک تھا، جس کی ذمے داری دونوں فریقین پرعائد ہوتی ہے، حکومتی ارکان اور حزب اختلاف نے غیر پارلیمانی الفاظ استعمال کئے.
اسلام آباد: اسپیکرقومی اسمبلی ایاز صادق کاکہنا ہے کہ گذ شتہ روزکا واقعہ بہت افسوس ناک تھا، حکومتی ارکان اور حزب اختلاف نے غیر پارلیمانی الفاظ استعمال کئے۔
تفصیلات کے مطابق قومی اسمبلی کے اجلاس میں رولنگ کے دوران اسپیکر سردار ایاز صادق نے کہا کہ ایوان میں گزشتہ روزکا واقعہ بہت افسوس ناک تھا، جس کی ذمے داری دونوں طریفین پرعائد ہوتی ہے، حکومتی ارکان اور حزب اختلاف نے غیر پارلیمانی الفاظ استعمال کئے.
یہاں پڑھیں:قومی اسمبلی کا اجلاس، حکومتی اور پی ٹی آئی ارکان میں مار پیٹ
اسپیکر قومی اسمبلی کا کہنا تھا کہ گذ شتہ روز کے واقعے سے ایوان کا تقدس مجروع ہوا ہے، ہم سب پر پارلیمنٹ کا احترام واجب ہے ، امید کرتا ہوں اس قسم کے واقعات مستقبل میں پیش نہ آئیں۔
انہوں کہا کہ گذشتہ واقعہ کے تناظرمیں اب ضرورت اس امرکی ہے کہ پارلیمانی اراکین کے ساتھ مشاورت کے ذریعے ضابطہ اخلاق وضع کیا جائے . تاکہ آئند ہ اس قسم کی صورتحال کا سامنا نہ کرنا پڑے۔
اس کے بعد قومی اسمبلی کی کاروائی پارلیمانی لیڈرز سے اجلاس کے لئے گھنٹے تک کے لئے ملتوی کردی گئی.
لاہور: وفاقی وزیر ریلوے خواجہ سعد رفیق کا کہنا ہے کہ آصف علی زرداری کی وطن واپسی سے خوشی ہوئی، امید ہے وہ پیپلز پارٹی کے سیاسی معاملات اپنے کنٹرول میں رکھیں گے ۔
لاہور کے نو منتخب میئر اور ڈپٹی میئرز کے اعزاز میں تقریب سے خطاب کرتے ہوئے سعد رفیق نے کہا کہ نواز شریف صادق اور امین ہیں، عمران خان خود کو سیاست میں ضائع نہ کریں۔
تقریب میں شریک اسپیکر قومی اسمبلی سردار ایاز صادق نے کہا کہ نا اہل قرار دینے والے جج کو بھولا نہیں قیامت کے دن اس کا گریبان پکڑوں گا۔
تقریب سے نو منتخب لارڈ میئر لاہور کرنل (ر ) مبشر جاوید، صوبائی وزرا زعیم حسین قادری، خواجہ عمران نذیر اور دیگر نے بھی خطاب کیا۔
قبل ازیں وزیراعظم نواز شریف نے بھی سابق صدر آصف علی زرداری کی وطن واپسی کا خیر مقدم کیا اور امید ظاہر کی کہ وہ ان کی واپسی سے مثبت سیاست کو فروغ ملے گا۔
اسلام آباد : عوامی مسلم لیگ کے سربراہ شیخ رشید احمد نے قومی اسمبلی کے اجلاس میں اسپیکر ایاز صادق کو مخاطب کرتے ہوئے کہا کہ اگر آپ عمران خان کے کیس کے ساتھ وزیراعظم نواز شریف کا کیس بھی الیکشن کمیشن میں بھیج دیتے تو آپ کی خوبصورتی میں مزید اضافہ ہوجاتا۔
تفصیلات کے مطابق قومی اسمبلی میں ساڑھے تین سال بعد فلور ملنے پر خطاب کرتے ہوئے شیخ رشید نے اسپیکر سردار ایاز صادق کو خوبصورتی بڑھانے کانسخہ بتا تے ہوئے کہا کہ جناب اسپیکر آپ خوبصورت ہیں، آپ نے عمران خان کا کیس الیکشن کمیشن بھیجا، اگرنوازشریف کابھی بھیج دیتے تو آپ کی شان میں اوراضافہ ہوجاتا۔
شیخ رشید احمد کا کہنا تھا کہ ہمیں تو پتا بھی نہیں تھا کہ آف شور کمپنی کیا ہوتی ہے ، ہمیں اس کا اس وقت پتا لگا جب ایک محترم ٹی وی چینل پر آئے اور اپنی آف شور کمپنی کا اعتراف کیا جس کے بعد پاناما پیپرز میں مزید انکشافات ہوئے۔ پاناما پیپرز آنے کے بعد پوری دنیا میں کھلبلی مچ گئی اور دنیا میں کسی نے بھی پاناما پیپرز کو نہیں جھٹلایا، پاناما پیپرز آنے کے بعد وزیر اعظم نے ایک ماہ میں جتنی مرتبہ خطاب کیا وہ بھی ایک ریکارڈ ہے۔
انہوں نے کہا کہ پاناما کے ایشو پر ساڑھے سات مہینے یہ لوگ فٹ بال بنے رہے لیکن ٹی او آر ہی نہیں بنے، خورشید شاہ پارلیمنٹ کی بات کرتے ہیں 27 دسمبر کے بعد پیپلز پارٹی کا بھی پتہ چل جائے گا۔
عوامی مسلم لیگ کے سربراہ نے کہا کہ ہمارے بچے بڑی بڑی ڈگریاں لے کر بھی بیروزگار ہیں لیکن ان کے وہ بچے جنہوں نے داخلے بھی سیلف فنانس پر لیے ہیں 19 سال کی عمر میں اربوں کی پراپرٹی بنا لیتے ہیں، پاناما کیس کی سماعت کے دوران سپریم کورٹ میں وزیر اعظم کے وکیل نے ہاتھ اٹھادیے اور کہا کہ ہمارے پاس کوئی ثبوت نہیں ہیں۔
اسلام آباد: قومی اسمبلی کے اجلاس کے دوران پی ٹی آئی ارکان نے بولنے کی اجازت نہ ملنے پر ہنگامہ آرائی کرتے ہوئے ایجنڈے کی کاپیاں پھاڑی دیں، اسپیکر کی نشست کا گھیراؤ کیا جس پر اسپیکرایازصادق نے اجلاس پندرہ منٹ کےلیے ملتوی کردیا اور نشست چھوڑ گئے، خورشید شاہ نے بھی حکومت کو شدید تنقید کا نشانہ بنایا۔
قومی اسمبلی کا اجلاس اسپیکر ایاز صادق کی زیر صدارت جاری رہا، اپوزیشن لیڈر خورشید شاہ نے حکومت کو شدید تنقید کا نشانہ بنایا۔ خورشید شاہ کی تقریر کے بعد اسپیکر ایاز صادق کی جانب سے حکومتی بینچ سے خواجہ سعد رفیق کو پوائنٹ آف آرڈر پر تقریر کرنے کی اجازت دینے پر اپوزیشن اراکین نے شدید احتجاج شروع کردیا، پی ٹی آئی اراکین اسمبلی کی جانب سے وزیراعظم کے خلاف نعرے بازی کی گئی، اراکین نے اسپیکر کے ڈائس کے سامنے جا کر ایجنڈے کی کاپیاں پھاڑ دیں جس کے باعث خواجہ سعد رفیق کو اپنی تقریر روکنا پڑی۔
اسپیکر ایازصادق کا کہنا تھا کہ پوائنٹ آف آرڈر پر پہلے اپوزیشن لیڈر نے بات اب حکومتی رکن کی باری ہے اس کے بعد آپ کو بھی موقع دیا جائے گا لیکن مشتعل پی ٹی آئی کے اراکین نہ مانے اور مطالبہ کیا کہ پہلے پوری اپوزیشن کو بات کرنے دی جائے بعدازاں حکومتی رکن کو ایک ہی بار بولنے کا موقع دیا جائے ہر تنقید کے بعد نہیں جواب میں اسپیکر اپنے موقف پر قائم رہے کہ پہلے سعد رفیق بات کریں گے بعدازاں پی ٹی آئی ارکان جس پر تنازع بڑھ گیا۔
خواجہ سعد رفیق کی تقریر کے دوران پی ٹی آئی ارکان نے ہنگامہ آرائی کرتے ہوئے ایجنڈے کی کاپیاں پھاڑی دیں، اسپیکر کی نشست کا گھیراؤ کیا جس پر اسپیکرایازصادق نے اجلاس پندرہ منٹ کےلیے ملتوی کردیا اور نشست چھوڑ گئے۔
قبل ازیں اپنی تقریر میں قومی اسمبلی کے اپوزیشن لیڈر اور پیپلز پارٹی کے مر کزی رہنما سید خورشید شاہ نے کہا ہے کہ پارلیمنٹ پر اس کے اندر سے ہی حملہ ہو رہا ہے، چیف جسٹس آف پاکستان کو کیوں متنازع بنایا جا رہا ہے، وہ پورے پاکستان کے چیف جسٹس ہیں، آج پاکستان کا وزیر اعظم ایک قطری شہزادے کے پیچھے چھپ رہا ہے۔
خورشید شاہ نے کہا کہ جھوٹ ایک لعنت ہے، اس سے قومیں تباہ ہوجاتی ہیں لیکن وزیراعظم آج اس ایوان میں آکر جھوٹ بولتے ہیں،وزیراعظم کو یہ خیال ہونا چاہیے کہ وہ پارلیمنٹ کی پیداوار ہیں، پارلیمنٹ نے ہی ان کی اہمیت کو تسلیم کروایا، جھوٹ چاہے خورشید شاہ بولے یا کوئی اور یہ مقدس ایوان ہے یہاں جھوٹ بولنے سے اس ایوان کا استحقاق مجروح ہورہا ہے۔
خورشید شاہ نے کہا کہ جمہوری نظام میں پارلیمنٹ کا رتبہ سب سے زیادہ ہوتا ہے، ایوان عدلیہ اور عدالت سے زیادہ مقدس ہے، اس ایوان کو بچانے کے لیے اپوزیشن نے ہر دور میں اہم کردار ادا کیا۔
خورشید شاہ نے کہا کہ پارلیمنٹ ایک سپریم ادارہ ہے یہاں پر کہے گئے ایک ایک لفظ کی اہمیت ہوتی ہے، ایوان بڑی قربانیوں اور مشکلوں سے حاصل ہواہے، یہی ایوان آئین بناتا ہے ادارے اس سے جنم لیتے ہیں ،ہماری پارٹی نے اس ایوا ن کے لیے ڈنڈے کھائے جیل میں گئے، ضرورت پڑنے پر گولیاں بھی کھائیں۔
خورشید شاہ کی جانب سے پاناما کیس پر اظہار خیال کیا گیا تو اسپیکر قومی اسمبلی ایاز صادق نے خورشید شاہ کو پاناما کیس کے معاملے پر بات کرنے سے گریز کرنے کی ہدایت اور کہا کہ پاناما کا معاملہ عدالت میں ہے۔ اس پر اپوزیشن لیڈر نے کہا پارلیمنٹ سپریم ہے جو عدالت سے زیادہ مقدس ہے۔
خورشید شاہ نے مزید کہا کہ وزیراعظم کا پارلیمنٹ میں اپنی تقریر کو سیاسی قرار دینا افسوس ناک ہے اس کا مطلب یہ ہے کہ کیا سیاست جھوٹ ہے؟۔ سیاست خدمت اور عبادت ہے جبکہ سیاست کو جھوٹ سمجھنے والے آمریت کی سوچ رکھتے ہیں۔
لاہور : اسپیکر قومی اسمبلی سردار ایاز صادق نے کہا ہے کہ پاکستان پیپلز پارٹی ملک کی بڑی سیاسی جماعت ہے۔ پیپلز پارٹی کے قائدین اور ورکرز کو لاہور میں خوش آمدید کہتے ہیں۔
ان خیالات کا اظہار انہوں نے لاہور میں مسلم لیگ ن کے ورکرز سے خطاب کے بعد میڈیا سے گفتگو کرتے ہوئے کیا، ایاز صادق نے کہا کہ بلاول بھٹو زرداری منتخب ہو کر ایوان میں آئیں، ہم ان سے حلف بھی لیں گے اور خوش آمدید بھی کہیں گے۔
ایاز صادق نے کہا کہ بھارت کا ہر محاذ پر منہ توڑ جواب دیا جا رہا ہے۔ جنگ کسی مسئلے کا حل نہیں۔ مسئلہ کشمیر کا ایشو ہر عالمی محاذ پر اٹھایا جا رہا ہے۔
ایک سوال کے جواب میں اسپیکر قومی اسمبلی نے لاہور میں بسنت منانے کے فیصلے کو خوش آئند قرار دیا۔ ان کا کہنا تھا کہ قاتل ڈور کے خاتمے اورسیکیورٹی انتظامات کو یقینی بنایا جائے گا۔
سردار ایاز صادق نے کہا کہ وزیراعظم نواز شریف کی جانب سے ڈونلڈ ٹرمپ کو فون کرنا کوئی حیرانگی کی بات نہیں۔ اسے ایشو نہ بنایا جائے۔
لاہور: اسپیکر قومی اسمبلی سردار ایاز صادق نے کہا ہے کہ طیب اردوگان کی آمد پر اُن کا تاریخی اور پرتپاک استقبال کیا جائے گا تاہم کچھ لوگوں نے پارلیمنٹ کے مشترکہ اجلاس میں نہ آنے کا فیصلہ کر کے ثابت کردیا کہ وہ ملکی ترقی سے خوش نہیں ہیں۔
لاہور میں میڈیا سے گفتگو کرتے ہوئے اسپیکر قومی اسمبلی کا کہنا تھا کہ پاک ترک تعلقات پہلے سے بہتر اور مضبوط ہوئے ہیں، ملک میں امن قائم ہوگیا ہے اس لیے دوسرے ممالک کے لوگ پاکستان آنے کی خواہش ظاہر کررہے ہیں۔
سردار ایاز صادق نے کہا کہ طیب اردگان کی آمد پر اُن کا پرتپاک استقبال کریں گے تاہم کچھ لوگ جو پارلیمنٹ میں آتے وہ اپنے بائیکاٹ کی ضد پوری کر لیں مگر اس سے اچھا پیغام نہیں جائے گا۔
پاناما لیکس پر تبصرہ کرتے ہوئے انہوں نے کہاکہ ’’عمران خان نے سپریم کورٹ میں جو دستاویزات جمع کروائے وہ ثبوت نہیں ہیں، پاناما لیکس کا فیصلہ عدالت پر چھوڑتے ہیں اور دیگر لوگ بھی اس کا انتظار کریں۔
خیال رہے ترکی کے صدر اگلے ہفتے دو روزہ دورے پر پاکستان آرہے ہیں، اُن کی آمد پر پارلیمنٹ کا مشترکہ اجلاس طلب کیا گیا ہے۔ تحریک انصاف کے چیئرمین نے اس اجلاس کے بائیکاٹ کا فیصلہ کرتے ہوئے شرکت نہ کرنے کا اعلان کیا ہے۔
گزشتہ روز ترکی کے سفیر نے بنی گالہ میں چیئرمین تحریک انصاف اور پی ٹی آئی کی اعلیٰ قیادت سے ملاقات کر کے مشترکہ اجلاس میں شرکت کے لیے استدعا کی تھی تاہم تحریک انصاف نے مشترکہ اجلاس کے بائیکاٹ کا فیصلہ برقرار رکھنے اعلان کردیا ہے۔
لاہور: اسپیکر قومی اسمبلی سردار ایاز صادق نے کہا ہے کہ فوج نے پاکستان میں جمہوریت کو مضبوط کرنے کے لیے اہم کردار ادا کیا، وہ حکومت کا تختہ نہیں الٹے گی کیونکہ فوج حکومت کا حصہ ہے۔
لاہور میں میڈیا سے گفتگو کرتے ہوئے ایاز صادق کا کہنا تھا کہ وزیر اعظم نے اقوام متحدہ میں مسئلہ کشمیر کو بھرپور طریقے سے اٹھایا اسی لئے بھارت کو تکلیف شروع ہوئی ہے۔
انہوں نے کہا کہ وہ پارلیمنٹری یونین آف کنٹریز کے اجلاس میں شرکت کیلئے ترکی جا رہے ہیں، جہاں وہ مسئلہ کشمیر کو بھرپور طریقے سے اجاگر کریں گے۔ اسپیکر قومی اسمبلی کا کہنا تھا کہا کہ وہ اس دورے میں کشمیریوں پر ہونے والے مظالم کی تصاویر اور ویڈیوز ساتھ لے کر جا رہے ہیں تاکہ کہ بھارتی افواج کی جانب سے پیلٹ گن کے استعمال سمیت کشمیریوں پر ڈھائے جانے والے ظلم و بربریت سے پردہ اٹھایا جا سکے۔
