بلوچ/ آزاد کشمیر: نائب صدر مسلم لیگ (ن) مریم نواز نے مخالفین کو خبردار کیا کہ آزاد کشمیر الیکشن چوری کیا تو ایسانقصان ہوگا کہ زمین کے نیچے بھی منہ چھپانےکی جگہ نہیں ملےگی۔
تفصیلات کے مطابق آزاد کشمیر کے علاقے بلوچ میں انتخابی مہم سے خطاب کرتے ہوئے مریم نواز نے ایک بار پھر وفاقی حکومت کو کڑی تنقید کا نشانہ بنایا اور کہا کہ نوازشریف کو وزارت عظمیٰ سے ہٹادیا، مقدمات بنائے گئے، انہیں جیل میں ڈال دیا ،جیل میں قتل کی سازش بھی کی، مگر جعلی حکومت کے تین سال بعد بھی عمران خان کی صبح شام نواز شریف سےہوتی ہے، صبح سے شام ،رات صرف یہی پلاننگ ہوتی ہے نوازشریف کو کیسےروکناہے۔
مریم نواز نے کہا کہ اگر انسانی پلاننگ سے نوازشریف کو روکاجاسکتا تو کوئی نام لیوا نہ ہوتا، آج پاکستان اور کشمیر میں جہاں جہاں گئی لوگوں نے نوازشریف کی آواز پر لبیک کہا، نوازشریف کیساتھ اللہ کےبعد اسکی بیٹی سپاہی بن کر کھڑی ہے، عمران خان تم نواز شریف کو عوام کےدلوں سےنہیں نکال سکے، پروپیگنڈے، جھوٹ، الزامات کےباوجود آج یہ پہلےسے بڑھ کر نوازشریف کیساتھ ہیں۔
بلوچ میں انتخابی مہم سے خطاب کرتے ہوئے مریم نواز نے کہا کہ قائد مسلم لیگ لندن اور یہ یہاں ایک پیج پربیٹھےہیں، آج آپ موجود نہیں مگر کشمیر کے چپے چپے پر نواز شریف کے نام لیوا موجود ہیں، الیکشن چوری کے باوجود نواز شریف لندن بیٹھ کر انکےگھر گھس کر انکو مارتا ہے۔
اس موقع پر مریم نواز نے عوام کو مخاطب کرتے ہوئے کہا کہ آپ نے یہ نعرہ تو سنا ہوگا کہ جب عمران خان آئےگا تو نیا پاکستان بنے گا، اب نیا نعرہ سن لے، اب آیا عمران اور بِکے گا سارا پاکستان۔
مریم نواز کا کہنا تھا کہ عمران کو اگلا الیکشن ہارتے ہوئے نظر آرہاہے تو الیکشن ریفارمز یاد آگئے، الیکشن ریفارمز صرف ایک ہوتا ہے اور وہ ہے عوام کی طاقت،
آپ لوگ نوازشریف اور عوام کےدرمیان سے ہٹ جائیں، خبردار کررہی ہوں کہ الیکشن چوری کیاتو ایسانقصان ہوگا زمین کے نیچے بھی منہ چھپانےکی جگہ نہیں ملےگی، انشااللہ 25جولائی کو آزاد کشمیر کی وادیوں میں شیر دھاڑے گا۔
